ក្រុមBaseball LA Dodgers ផ្តល់ជំនួយ១លានដុល្លារ ជួយគ្រួសារដែលរងផលប៉ះពាល់ពីការចាប់ខ្លួនដោយ ICE

(បរទេស)÷ ថ្ងៃសៅរ៍ ទី២១ ខែមិថុនា ឆ្នាំ២០២៥ ក្រុមBaseball Los Angeles Dodgers បានសន្យាផ្តល់ជំនួយផ្ទាល់មួយចំនួនចំនួន ១លានដុល្លារ ដល់គ្រួសារជនអន្តោប្រវេសន៍ ដែលរងផលប៉ះពាល់ពីការចាប់ខ្លួន និងបញ្ជូនចេញពីសហរដ្ឋដោយអាជ្ញាធរ ICE នៅទីក្រុង Los Angeles។

ក្រុម Dodgers នឹងសហការជាមួយអាជ្ញាធរមូលដ្ឋាន និងអង្គការសហគមន៍ ដើម្បីចែករំលែកជំនួយទៅកាន់អ្នកដែលកំពុងត្រូវការយ៉ាងខ្លាំង។ ការសន្យានេះត្រូវបានធ្វើឡើងក្រោយសម្ពាធកើនឡើង ពីសំណាក់អ្នកគាំទ្រជាច្រើន យ៉ាងចម្បងពីសហគមន៍ Latin ដែលជាស្នូលនៃអ្នកគាំទ្ររបស់ក្រុម។

ប្រធានក្រុម Dodgers លោក Stan Kasten បាននិយាយថា ក្រុមមានបំណងដឹកនាំក្នុងការជួយសហគមន៍ ដែលរងអំពើចាប់ខ្លួនដោយអាជ្ញាធរដ្ឋបាល។

អភិបាលរដ្ឋក្រុងឡូសអានជេលេស លោកស្រី Karen Bass បានអបអរសាទរចំពោះជំនួយនេះ ដោយនិយាយថា អំពើចាប់ខ្លួនថ្មីៗនេះ បានបង្កភាពភ័យខ្លាច និងប៉ះពាល់ដល់សេដ្ឋកិច្ចក្នុងតំបន់។

ក្រុម Dodgers ក៏បានបដិសេធមិនឲ្យ ICE ប្រើប្រាស់ចំណតរថយន្តនៅ Dodger Stadium ហើយបញ្ជាក់ថារថយន្តរដ្ឋាភិបាលដែលបានចូលមកនោះ មិនពាក់ព័ន្ធនឹងក្រុមនោះឡើយ។

ព្រឹត្តិការណ៍នៃការចាប់ខ្លួន បានបង្កការតវ៉ាជាច្រើន បណ្ដាលឲ្យប្រធានាធិបតី Donald Trump ផ្ញើកងជាតិ និងទាហានមកការពារបុគ្គលិករដ្ឋាភិបាល និងទ្រព្យសម្បត្តិ នៅទីក្រុង។

ក្រុម Dodgers ដែលទើបឈ្នះពាន World Series ឆ្នាំ២០២៤ មានតួនាទីសំខាន់ក្នុងវប្បធម៌របស់ទីក្រុង។ ក្រុមសង្ឃឹមថា ជំនួយនេះនឹងជះឥទ្ធិពលដល់អង្គភាពផ្សេងទៀត ឲ្យចូលរួមជួយគ្រួសារដែលកំពុងរងការលំបាកសេដ្ឋកិច្ច ដោយសារអំពើបញ្ជូនចេញ។

អត្ថបទពីកញ្ញា ហេង គីមជូ