២០មិថុនា! ខួប៤៨ឆ្នាំថ្ងៃដែលសម្តេចតេជោ យកជីវិតធ្វើដើមទុន ដើម្បីរំដោះប្រទេសជាតិពីរបបប្រល័យពូជសាសន៍ ប៉ុលពត

ភ្នំពេញ៖ ថ្ងៃទី២០ ខែមិថុនា កាលពី៤៨ឆ្នាំមុន ជាថ្ងៃកំណត់ត្រាប្រវត្តិសាស្ត្រដ៏សំខាន់សម្រាប់កម្ពុជា ដែលសម្តេចតេជោ ហ៊ុន សែន សម្រេចចិត្តយកជីវិតធ្វើជាដើមទុនចេញតស៊ូរំដោះជាតិ និងប្រជាជនកម្ពុជាចេញពីរបបប្រល័យពូជសាសន៍ ប៉ុលពត។

សម្តេចតេជោ តាមរយៈបណ្តាញទំនាក់ទំនងសង្គមផ្លូវការ ក្នុងថ្ងៃនេះដែរ បានបង្ហោះសាររៀបរាប់ពីក្តីឈឺចាប់ខ្លោចផ្សា ឱ្យតែនឹកឃើញដល់រឿងរ៉ាវ ដែលសម្តេចបានជួបប្រទះ កាលពីថ្ងៃ២០ មិថុនា ១៩៧៧ ទឹកភ្នែករបស់សម្តេចតែងស្រក់ចុះមកជាប់មិនដាច់។បន្ថែមលើសពីនេះ សម្តេចបានចោទជាសំណួរថា ប្រសិនខ្ញុំស្លាប់នាពេលនោះ តើនឹងមានអ្វីកើតឡើងនាពេល៤៨ឆ្នាំកន្លងមកនេះ?

សម្តេចតេជោបានបង្ហោះរូបថតជាមួយខ្លឹមសារទាំងស្រុងដូច្នេះថា «ទោះពេលវេលាបានកន្លងហួសរយៈពេល ៤៨ឆ្នាំទៅហើយក្តី តែនៅពេលដែលខ្ញុំនឹកឃើញដល់រឿងរ៉ាវ ដែលបានជួបប្រទះកាលពីថ្ងៃ២០មិថុនា១៩៧៧ ទឹកភ្នែកខ្ញុំតែងស្រក់ចុះមកជាប់មិនដាច់។ ពិតជាខ្លោចផ្សានិងឈឺ ចាប់រកពាក្យនិយាយមិនបាន។ យើងមានតែជីវិតប៉ុណ្ណោះ ធ្វើជាដើមទុនដើម្បីរំដោះជាតិ និងប្រជាជនចេញពីរបបប្រល័យពូជសាសន៍ប៉ុល ពត។ ប្រសិនខ្ញុំស្លាប់នាពេលនោះតើនឹងមានអ្វីកើតឡើងនាពេល៤៥ឆ្នាំកន្លងមកនេះ?។ យកជីវិតទៅប្តូរយកការរស់រានមានជីវិតរបស់ប្រជាជន។ យកជីវិតទៅប្តូរយកសន្តិភាព ជូនប្រជាជនតាមរយៈនយោបាយឈ្នះ ឈ្នះ។

យកអំណាចទៅប្តូរជាមួយសន្តិភាព និងការអភិវឌ្ឍរយៈពេលវែង តាមរយៈផ្ទេរការដឹកនាំពីជំនាន់ចាស់ទៅកាន់ជំនាន់ថ្មី។ ចូលចងចាំថាគ្មានជោគជ័យ ឬលទ្ធផលណាមួយដោយគ្មានការបង់ថ្លៃ ឬការលះបង់នោះឡើយ»៕