កម្ពុជាបង្ហាញ វប្បធម៌ ទេសចរណ៍ និងផលិតផលខ្មែរក្នុងមហោស្រពអាស៊ីលើកទី៥នៅប្រទេសប៊ុលហ្គារី =====
ភ្នំពេញ៖ ឯកអគ្គរដ្ឋតូត កម្ពុជាប្រទេសប៊ុលហ្គារីដឹកនាំមន្ត្រី នៃស្ថានទូតចូលរួមមហោស្រពអាស៊ីលើកទី៥ នៅទីក្រុងSofia ប្រទេសប៊ុលហ្គារីក្រោមប្រធានបទ “រួបរួមក្នុងភាពចម្រុះ” ដែលរៀបចំកាលពីថ្ងៃសៅរ៍ទី១៤ចុងសប្តាហ៍មុនេះ។
ឯកឧត្តមជា ច័ន្ទបរិបូរណ៍ ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំសាធារណរដ្ឋប៊ុលហ្គារីបានប្របាប់ តាមបណ្តាញទំនាក់ទំនងតេលេក្រាមនៅព្រឹកថ្ងៃទី២៦ ខែមិថុនា ឆ្នាំ២០២៥នេះថា នាឱកាសនោះឯកឧត្តម និងសហការីបានចូលរួមចាក់បញ្ចាំវីដេអូសំខាន់ៗពីកម្ពុជាបង្ហាញ ពីវប្បធម៌ ទេសចរណ៍ និងមានតាំងផលិតផលខ្មែរមួយចំនួន រួមទាំងក្រមារខ្នែរ និងលក់ម្ហូបអាហារខ្មែរ មានបាយមាន់ និងចេកខ្ទិះ ។
ឯកឧត្តមឯកគ្គរដ្ឋតូតកម្ពុជាបានបញ្ជាក់ថា មហោស្រពអាស៊ីលើកទី៥ នៅទីក្រុងSofia ប្រទេសប៊ុលហ្គាសរី នេះត្រូវបានរៀបចំឡើងដោយស្ថានទូត និងបេសកកម្មការទូតជាច្រើន រួមទាំងប្រទេសចិន ឥណ្ឌូនេស៊ី សាធារណៈរដ្ឋកូរ៉េ ឥណ្ឌា ម៉ុងហ្គោលី និងវៀតណាម ព្រះរាជាណាចក្រកម្ពុជា គាំទ្រដោយក្រសួងទេសចរណ៍ប៊ុលហ្គារី ។ ដោយមានការចូលរួមពីអនុប្រធានាធិបតី លោកជំទាវ Iliana Iotova អនុរដ្ឋមន្ត្រីក្រសួងទេសចរណ៍ Pavlin Petrov អភិបាលរងក្រុង Sofia Ivan Vasilev និងអ្នកការទូតមកពីស្ថានទូតអាស៊ីនានាបានចូលរួមក្នុងពិធីបើក។
ឯកឧត្តមជា ច័ន្ទបរិបូរណ៍ បន្ថែមថា ភាពសម្បូរបែបនៃវប្បធម៌របស់កម្ពុជា និងប៊ុលហ្គារី មានដូចជា តន្រ្តី សិល្បៈប្រពៃណី របាំ ម្ហូប អាហារ និងប្រវត្តិសាស្ត្រ ដើរតួជាទ្វារឱ្យប្រជាជននៃប្រទេសទាំងពីរធ្វើដំណើរទៅវិញទៅមក ជាពិសេសវិស័យទេសចរណ៍ ពាណិជ្ជកម្ម និងការផ្លាស់ប្ដូរវប្បធម៌ជាដើម។ ឯកឧត្តមប្តេជ្ញា ផ្សព្វផ្សាយព្រឹត្តិការណ៍វប្បធម៌កម្ពុជាទៅកាន់ប្រទេសនានាឱ្យបានទូលំទូលាយ ។
នៅក្នុងសុន្ទរកថាសំខាន់របស់ឯកឧត្តម Iotova អនុប្រធាននាអិបតី ប្រទេសប៊ុលហ្គារីបានសង្កត់ធ្ងន់លើតួនាទីរបស់ពិធីបុណ្យក្នុងការលើកកម្ពស់ការរួបរួម និងការយល់ដឹង។ “ពិធីបុណ្យគឺជាឧបករណ៍ដ៏ល្អបំផុតប្រឆាំងនឹងការបែងចែកជាតិសាសន៍។ វាបង្កប់នូវមិត្តភាព កិច្ចសហប្រតិបត្តិការ និងការអភិវឌ្ឍន៍។ កាលណាយើងស្គាល់គ្នាកាន់តែច្រើន យើងអាចរស់នៅជាមួយគ្នាកាន់តែច្រើន និងជៀសវាងជម្លោះ”។
ឯកឧត្តម Pavlin Petrov អនុរដ្ឋមន្ត្រីក្រសួងទេសចរណ៍ប្រទេសប៊ុលហ្គារីបានបញ្ជាក់ថា មហោស្រពអាស៊ីលើកទី៥ និង “ពិធីបុណ្យផ្សេងៗគឺជាស្ពានរវាងវប្បធម៌ និងទេសចរណ៍ ព្រោះបានផ្តល់វេទិកាសម្រាប់ការផ្លាស់ប្តូរអន្តរជាតិ”។ ព្រឹត្តិការណ៍បែបនេះទាក់ទាញទស្សនិកជនទូទាំងពិភពលោក និងទំនាក់ទំនងប្រវត្តិសាស្រ្ត សេដ្ឋកិច្ច ការច្នៃប្រឌិត និងបេតិកភណ្ឌ៕
