សភាឥណ្ឌូណេស៊ី អនុម័តច្បាប់យោធាដ៏ចម្រូងចម្រាស ដែលនឹងបែងចែកតួនាទីស៊ីវិលបន្ថែមទៀតសម្រាប់មន្ត្រីយោធា
ហ្សាការតា៖ សភាប្រទេសឥណ្ឌូណេស៊ីនៅថ្ងៃទី២០មីនានេះ បានអនុម័តច្បាប់យោធាដ៏ចម្រូងចម្រាស ដែលនឹងបែងចែកតួនាទីស៊ីវិលបន្ថែមទៀតសម្រាប់មន្ត្រីយោធា ខណៈការតវ៉ាតាមដងផ្លូវប្រឆាំងនឹងសេចក្តីសម្រេចនេះ ត្រូវបានគេរំពឹងថា នឹងកើតឡើង។
ចំណាត់ការត្រូវបានរិះគន់ដោយក្រុមសង្គមស៊ីវិល ដោយបរិយាយថា វិសោធនកម្មច្បាប់នេះ នឹងទាញឥណ្ឌូណេស៊ីត្រលប់ទៅយុគសម័យបុរសខ្លាំង ស៊ូហាតូ ដែលមន្ត្រីយោធាគ្រប់គ្រងកិច្ចការស៊ីវិល។ លោក ភណ្ឌ ម៉ាហារ៉ានី (Puan Maharani) បានដឹកនាំការបោះឆ្នោតជាឯកច្ឆន្ទនៅក្នុងក្រុមប្រឹក្សាពេញអង្គ ហើយបានអនុម័តច្បាប់នេះជាផ្លូវការ ដោយនិយាយថា វាស្របតាមគោលការណ៍ប្រជាធិបតេយ្យ និងសិទ្ធិមនុស្ស។ ប្រធានាធិបតី ប្រាបូវ៉ូ ស៊ូប៊ីយ៉ានតូ បានចូលកាន់តំណែងកាលពីខែតុលាឆ្នាំមុន និងជាមេបញ្ជាការកងកម្លាំងពិសេសក្រោមការដឹកនាំរបស់លោក ស៊ូហាតូ បានពង្រីកតួនាទីរបស់កងកម្លាំងប្រដាប់អាវុធចូលទៅក្នុងការងារស៊ីវិល រួមទាំងកម្មវិធីដ៏ពេញនិយមរបស់លោក គឺការផ្ដល់អាហារឥតគិតថ្លៃសម្រាប់កុមារ។
ក្រុមសិទ្ធិមនុស្ស បានរិះគន់ការកើនឡើងនៃការចូលរួមរបស់យោធា ដោយសារពួកគេបារម្ភថា វាអាចនាំទៅរកការរំលោភអំណាច ការរំលោភសិទ្ធិមនុស្ស និងការគេចវេះពីការទទួលខុសត្រូវលើសកម្មភាពណាមួយ។ រដ្ឋាភិបាលបាននិយាយថា សេចក្តីព្រាងច្បាប់នេះ តម្រូវឱ្យមន្រ្តីលាលែងពីយោធា មុនពេលចូលកាន់តំណែងស៊ីវិលនៅនាយកដ្ឋាននានា ដូចជាលេខាធិការដ្ឋានរដ្ឋ និងការិយាល័យអគ្គមេធាវី។ ហើយសមាជិកសភាម្នាក់បាននិយាយថា មន្ត្រីមិនអាចចូលរួមជាមួយក្រុមហ៊ុនរបស់រដ្ឋបានទេ ដើម្បីប្រឆាំងនឹងការព្រួយបារម្ភថា យោធានឹងចូលរួមក្នុងអាជីវកម្ម។ បាតុករមកពីក្រុមប្រជាធិបតេយ្យ និងនិស្សិតមួយចំនួនបាននិយាយថា ពួកគេនឹងធ្វើបាតុកម្មនៅមុខអគារសភាក្នុងរដ្ឋធានីហ្សាកាតា។
និស្សិតមួយចំនួនបានបោះជំរំនៅច្រកទ្វារខាងក្រោយ នៃអគារសភាតាំងពីល្ងាចថ្ងៃពុធ ដោយតវ៉ានឹងច្បាប់ និងទាមទារឱ្យរដ្ឋាភិបាលដកបុគ្គលិកយោធាទាំងអស់ចេញពីការងារស៊ីវិល។ មន្ត្រីប៉ូលិសបានបង្ខំពួកគេឱ្យចាកចេញពីអគារ ហើយមានអ្នកតវ៉ាតែពីរបីនាក់ប៉ុណ្ណោះនៅពេលច្បាប់នេះត្រូវបានអនុម័តដោយសភា។ រដ្ឋមន្ត្រីការពារជាតិ សច្ចៈហ្វ្រី សច្ចេមសូអ៊ីឌីន (Sjafrie Sjamsoeddin) បានគាំទ្រវិសោធនាកម្មច្បាប់នេះ ដោយលើកឡើងថា៖«ការផ្លាស់ប្ដូរភូមិសាស្ត្រនយោបាយ និងបច្ចេកវិទ្យាយោធាពិភពលោក ទាមទារឱ្យយោធាផ្លាស់ប្ដូរ ដើម្បីប្រឈមមុខនឹងជម្លោះ។ យើងនឹងមិនធ្វើឱ្យប្រជាជនឥណ្ឌូណេស៊ីខកចិត្ត លើការរក្សាអធិបតេយ្យភាពរបស់យើងនោះទេ»។
