មនុស្ស ៥៩នាក់ស្លាប់ និងជាង ១០០នាក់បានរងរបួសក្នុងហេតុការណ៍ភ្លើងឆេះក្លឹបរាត្រីនៅម៉ាសេដូនខាងជើង

បរទេស៖ យ៉ាងហោចណាស់មនុស្ស ៥៩នាក់បានស្លាប់ និងជាង ១០០នាក់ផ្សេងទៀតត្រូវបានបញ្ជូនទៅកាន់មន្ទីរពេទ្យ បន្ទាប់ពីអគ្គិភ័យដ៏សន្ធោសន្ធៅមួយបានផ្ទុះឡើងកាលពីថ្ងៃអាទិត្យនៅឯក្លឹបរាត្រីមួយក្នុងទីក្រុង Kocani ភាគខាងជើងប្រទេស Macedonia។

អាជ្ញាធរជឿថា អគ្គិភ័យនេះ ឆាបឆេះដោយសារឥទ្ធិពល ពីតូបដែលឆាបឆេះ សម្ភារៈពិដាន ដែលអាចឆេះបាន បណ្តាលឱ្យមានអណ្តាតភ្លើង និងផ្សែងយ៉ាងក្រាស់ រាលដាលយ៉ាងលឿន។ ខ្សែវីដេអូដែលបានផ្សព្វផ្សាយតាមអ៊ីនធឺណិតបង្ហាញពីពិដានដែលត្រូវភ្លើងឆាបឆេះខណៈមនុស្សកំពុងរត់គេចខ្លួន។

រដ្ឋមន្ត្រីក្រសួងមហាផ្ទៃ លោក Panche Toshkovski បានបញ្ជាក់ថា ក្នុងចំណោមអ្នករបួស ១៨នាក់ ស្ថិតក្នុងស្ថានភាពធ្ងន់ធ្ងរ។ ក្នុងចំណោមអ្នកដែលសម្រាកព្យាបាលនៅមន្ទីរពេទ្យនោះមានលោក Vladimir Blazevski ដែលជាសមាជិកនៃក្រុមចម្រៀងហ៊ីបហប DNK ដែលមានរបួសរលាក ប៉ុន្តែស្ថិតក្នុងស្ថានភាពមានស្ថិរភាព។

ប៉ូលិសបានឃាត់ខ្លួនជនសង្ស័យម្នាក់ និងចេញដីកាចាប់ខ្លួនមនុស្ស ៤នាក់ទៀត រួមទាំងម្ចាស់ក្លិបផងដែរ។ អ្នកស៊ើបអង្កេតកំពុងផ្តោតលើការបំពានសុវត្ថិភាពដែលអាចកើតមាន និងការធ្វេសប្រហែស។

រដ្ឋាភិបាលម៉ាសេដូនខាងជើងបានសន្យាថានឹងមានការស៊ើបអង្កេតយ៉ាងម៉ត់ចត់ដើម្បីការពារគ្រោះមហន្តរាយស្រដៀងគ្នានេះនាពេលអនាគត។ លោកនាយករដ្ឋមន្ត្រី Hristijan Mickoski បានលុបចោលការធ្វើដំណើរដែលបានគ្រោងទុករបស់គាត់ទៅកាន់ប្រទេសម៉ុងតេណេហ្គ្រោ ហើយបានធ្វើដំណើរទៅ Kocani ដើម្បីត្រួតពិនិត្យកិច្ចខិតខំប្រឹងប្រែងសង្គ្រោះបន្ទាន់។ រដ្ឋមន្ត្រីក្រសួងយុត្តិធម៌ លោក Igor Filkov បានអំពាវនាវឱ្យមានការទទួលខុសត្រូវដោយសង្កត់ធ្ងន់ថាសោកនាដកម្មបែបនេះមិនត្រូវកើតឡើងម្តងទៀតទេ។

លោកស្រី Marta Kos ស្នងការពង្រីកសហភាពអឺរ៉ុប ក៏បានចូលរួមរំលែកទុក្ខដល់ជនរងគ្រោះ និងក្រុមគ្រួសារពួកគេផងដែរ។