មន្ទីរកិច្ចការនារីខេត្តតាកែវ បើកវគ្គបណ្ដុះបណ្ដាលវិជ្ជាជីវៈជំនាញតម្បាញសំពត់សឹង ជូនដល់ស្ត្រីមេម៉ាយ ស្ត្រីទីទាល់ក្រ និងសិស្សក្រីក្របោះបង់ការសិក្សា

ភ្នំពេញ៖ នៅថ្ងៃទី១២ ខែមីនា ឆ្នាំ២០២៥នេះ លោកស្រី ម៉ន រតនា ប្រធានមន្ទីរកិច្ចការនារីខេត្តតាកែវ បានបើកវគ្គបណ្ដុះបណ្ដាលវិជ្ជាជីវៈជំនាញតម្បាញសំពត់សឹង ជូនដល់ស្ត្រីមេម៉ាយ ស្ត្រីទីទាល់ក្រ និងសិស្សក្រីក្របោះបង់ការសិក្សាចំនួន៥៥នាក់ នៅភូមិចុងអង្ករ ឃុំពេជសារ ស្រុកកោះអណ្ដែត។

លោកស្រី ម៉ន រតនា បានឱ្យដឹងថា ដោយមានការយកចិត្តទុកដាក់ពីសំណាក់ប្រមុខរាជរដ្ឋាភិបាល តាមរយៈក្រសួងកិច្ចការនារី ស្របទៅតាមផែនការយុទ្ធសាស្ត្រនារីរតនៈទី៦ និងផែនការយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្រោមការដឹកនាំដ៏ឈ្លាសវៃរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដើម្បីចូលរួមលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី។  ដូច្នេះ មន្ទីរកិច្ចការនារីខេត្ត បានរៀបចំបើកវគ្គបណ្ដុះបណ្ដាលនេះឡើង គោលដៅសំខាន់គឺជួយដល់ស្ត្រីមេម៉ាយ ស្ត្រីទីទាល់ក្រ និងសិស្សក្រីក្រ ដែលបានបោះបង់ការសិក្សា ឱ្យមានជំនាញផ្ទាល់ខ្លួនសម្រាប់ចិញ្ចីមជីវិត និងបង្កើនការងារជូនដល់ពួកគាត់ឱ្យមានជំនាញច្បាស់លាស់មួយ។

លោកស្រីប្រធានមន្ទីរកិច្ចការនារី បន្ថែមថា ការបើកវគ្គបណ្ដុះបណ្ដាលនេះ ក៏នឹងបំផុសគំនិតអ្នកចូលរួមក្នុងវិស័យតម្បាញ , អភិរក្ស និងផ្សព្វផ្សាយសិល្បៈនៃការតម្បាញដែលជាឯកសណ្ឋានវប្បធម៌ជាតិ។ លើកកម្ពស់ទីផ្សារ ជំរុញឱ្យអ្នករៀនអាចផលិត និងលក់ផលិតផលតម្បាញតាមទីផ្សារនានា បង្កើនភាពច្នៃប្រឌិត ជំរុញការច្នៃប្រឌិតក្នុងការរចនា និងបង្កើតលំនាំថ្មីៗដែលអាចតាមទាន់នឹងតម្រូវការទីផ្សារផងដែរ៕