រដ្ឋបាលខេត្តព្រះសីហនុ ជូនដំណឹងស្តីពីការធ្វើលំហាត់សមយុទ្ធទ្រង់ទ្រាយធំ KOS EX 24 នៅអាកាសយានដ្ឋានអន្តរជាតិខេត្តព្រះសីហនុ

ភ្នំពេញ៖ ដោយយោងទៅតាមច្បាប់ ស្តីពីអាកាសចរណ៍ នៃព្រះរាជាណាចក្រកម្ពុជា និងអង្គការអាកាសចរណ៏ស៊ីវិលអន្តរជាតិ (ICAO) រដ្ឋនីមួយៗ ដែលជាសមាជិកតម្រូវឱ្យធ្វើផែនការគ្រប់គ្រងគ្រោះអាសន្ន នៅអាកាសយានដ្ឋានអន្តរជាតិ (Airport Emer-gency plan) ហើយត្រូវធ្វើលំហាត់សមយុទ្ធទ្រង់ទ្រាយធំ (Full Scale Airport Emergency Exercise) រៀងរាល់ពីរឆ្នាំម្តង ដើម្បីធានាបាននូវពេលវេលាឆ្លើយតប ការទំនាក់ទំនងសាកល្បងសមត្ថភាព និងការទទួល ខុសត្រូវរបស់ស្ថាប័ននីមួយៗ។

ក្នុងន័យនេះអាកាសយានដ្ឋានអន្តរជាតិខេត្តព្រះសីហនុ នឹងធ្វើលំហាត់សមយុទ្ធទ្រង់ទ្រាយធំ នៅថ្ងៃ ពុធ ទី១២ ខែមីនា ឆ្នាំ២០២៥ ចាប់ពីម៉ោង ១៣:០០ នាទីរសៀល រហូតដល់ម៉ោង ១៧:០០នាទីរសៀល។ លំហាត់ សមយុទ្ធនេះ នឹងមានដុតប្រេង និងកង់ឡានចាស់ៗ បង្កើតបានជាអណ្តាតភ្លើងសន្ធោសន្ធៅនៅក្នុងបរិវេណ អាកាសយានដ្ឋានអន្តរជាតិខេត្តព្រះសីហនុ ក្នុងនោះផងដែរក៏មានការចល័តរថយន្តអគ្គិសភ័យ រថយន្តសង្គ្រោះ ដោយមានការចូលរួមពីអាជ្ញាធរដែនដី កងកម្លាំងគណៈបញ្ជាការឯកភាពរដ្ឋបាលខេត្តព្រះសីហនុ មន្ទីរពេទ្យនានា ក្រុមហ៊ុនសម្បទានអាកាសយានដ្ឋាន SCA/CAMS និងក្រុមហ៊ុនចរាចរណ៏ដែនអាកាសCATS។

អាស្រ័យដូចបានជម្រាបជូនខាងលើ សូមសាធារណជន និងបងប្អូនប្រជាពលរដ្ឋក្នុងខេត្តព្រះសីហនុ ជ្រាប និងសូមកុំមានការភាន់ច្រឡំ សកម្មភាពខាងលើគ្រាន់តែជាលំហាត់សមយុទ្ធទ្រង់ទ្រាយធំ គឺជាការហ្វឹក ហាត់សាកល្បងដល់ស្ថាប័ន ភ្នាក់ងារពាក់ព័ន្ធ ត្រៀមឆ្លើយតបឱ្យបានឆាប់រហ័សនៅពេលមានគ្រោះមហន្តរាយ កើតឡើងសម្រាប់ជាបទពិសោធន៍ និងចំណេះដឹងលើការងារជួយសង្គ្រោះជនរងគ្រោះនៅពេលមានឧបទ្ទវហេតុគ្រោះថ្នាក់ណាមួយកើតឡើងនៅបរិវេណអាកាសយានដ្ឋានអន្តរជាតិខេត្តព្រះសីហនុ។

ទទួលបានសេចក្តីជូនដំណឹងនេះ នាយករដ្ឋបាលសាលាខេត្ត ស្នងការនគរបាលខេត្ត មេបញ្ជាការ កងរាជអាវុធហត្ថខេត្ត មេបញ្ជាការតំបន់ប្រតិបត្តិការសឹករងព្រះសីហនុ អភិបាល នៃគណៈអភិបាលក្រុង ស្រុក និងប្រធានមន្ទីរ អង្គភាពជុំវិញខេត្ត ត្រូវយកចិត្តទុកដាក់ផ្សព្វផ្សាយឱ្យបានទូលំទូលាយ៕