ឧត្តមសេនីយ៍ឯក លឹម សុខារស្មី កោតសរសើរ ចំពោះមន្ត្រីនគរបាលជាតិនារី ដែលខិតខំប្រឹងប្រែងក្នុងការបំពេញតួនាទីភារកិច្ចរបស់ខ្លួនបានយ៉ាងល្អប្រសើរ

ភ្នំពេញ៖ នៅថ្ងៃសុក្រ ៩កើត ខែផល្គុន ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី០៧ ខែមីនា ឆ្នាំ២០២៥ ឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្តិសុខឯកជន បានអញ្ជើញជួបសំណេះសំណាលជាមួយមន្ត្រីនគរបាលជាតិនារី នៃនាយកដ្ឋានគ្រប់គ្រងសន្តិសុខឯកជន ដើម្បីអបអរសាទរ ខួបលើកទី១១៤ ទិវាអន្តរជាតិនារី ៨ មីនា ឆ្នាំ២០២៥ ក្រោមប្រធានបទ «សិទ្ធិ សមភាព និងភាពអង់អាចចំពោះស្រ្តី និងក្មេងស្រីគ្រប់រូប»។

ក្នុងឱកាសនោះដែរ ឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្តិសុខឯកជន បានកោតសរសើរ ចំពោះមន្ត្រីនគរបាលជាតិនារី ដែលខិតខំប្រឹងប្រែងក្នុងការបំពេញតួនាទីភារកិច្ចរបស់ខ្លួនបានយ៉ាងល្អប្រសើរ និងលើកទឹកចិត្តសូមឱ្យបន្តពង្រឹងសមត្ថភាព ចំណេះជំនាញបន្ថែម ព្រមទាំងមានសាមគ្គីភាពផ្ទៃក្នុងល្អ ដើម្បីទទួលបានលទ្ធផលកាន់តែល្អប្រសើរផងដែរ។

បន្ថែមពីនេះ ឧត្តមសេនីយ៍ឯក លឹម សុខារស្មី ក៏បានផ្សព្វផ្សាយនូវអនុសាសន៍របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ សម្រាប់មន្ត្រីនគរបាលជានារីរួមមាន៖

ទី១៖ ស្នើឲ្យថ្នាក់ដឹកនាំ និងមន្ត្រីនគរបាលជានារីទាំងអស់ បន្តខិតខំប្រឹងប្រែងក្នុងការពង្រឹងសមត្ថភាព វិជ្ជាជីវៈរបស់ខ្លួនឲ្យបានខ្លាំងពូកែបន្ថែមទៀត ដើម្បីឲ្យមានលក្ខណៈសម្បត្តិសមស្របក្នុងការបំពេញ តួនាទី និងភារកិច្ច ទាំងក្នុងក្របខ័ណ្ឌការងារដឹកនាំ និងការងារជំនាញបច្ចេកទេស។ ជាការពិតណាស់គោលនយោបាយបានជួយគាំទ្រ និងផ្ដល់អាទិភាពដល់នារីរួចហើយ ប៉ុន្តែផ្អែកតាមការរីកចម្រើន ជឿនលឿននៃសកលលោក និងប្រទេសជាតិរបស់យើង នារីក៏ត្រូវជួយខ្លួនឯងបន្ថែមទៀត តាមរយៈការពង្រឹង និងអភិវឌ្ឍន៍សមត្ថភាពខ្លួនឯងជាប់ជាប្រចាំ ទើបយើងអាចអនុវត្តគោលការណ៍សមភាពយេនឌ័រ បានជោគជ័យឆ្លើយតបទៅនឹងយុគសម័យឌីជីថល។

ទី២៖ សូមឲ្យស្ត្រីទាំងអស់ដើរតួនាទីជាអ្នកផ្តល់យោបល់ល្អៗ ទាំងនៅអង្គភាពការងារ ក្នុងសង្គម និងក្នុងគ្រួសារ ជៀសវាងការរក្សាភាពស្ងៀមស្ងាត់ ហើយរង់ចាំតែស្តាប់យោបល់របស់បុរស ព្រមទាំងបន្តរក្សានូវប្រពៃណីថ្លៃថ្នូរ មានមនសិកាការងារ គោរពវិន័យ និងក្រមសីលធម៌ វិជ្ជាជីវៈ ជាពិសេសរក្សាបាននូវគុណតម្លៃ និងគុណធម៌ ឲ្យស័ក្តិសមនឹងកិត្តិនាមរបស់ស្ត្រីជា «មាតាពិភពលោក»។

ទី៣៖ សូមឲ្យនគរបាលជានារីទាំងអស់ បន្តលើកកម្ពស់ឧត្តមភាពរបស់ខ្លួន ក្នុងនាមជាភរិយា ជាមាតា ជាម្ដាយមីង បងស្រី ឬជាកូនស្រីគំរូក្នុងគ្រួសារ ដើម្បីចូលរួមចំណែកក្នុងការអប់រំសមាជិកគ្រួសារទាំងមូល ឲ្យចូលរួមគ្រប់សកម្មភាពសង្គម ចេះគោរពច្បាប់ គោរពសិទ្ធិមនុស្ស មានសុជីវធម៌ សីលធម៌ល្អ ជៀសផុតនូវអំពើឧបាយមុខ អំពីខុសច្បាប់ ជៀសឆ្ងាយពីគ្រឿងញៀន ល្បែងស៊ីសង ដើម្បីធ្វើជាពលរដ្ឋល្អ ដែលជាមូលដ្ឋានធនធានមនុស្សប្រកបដោយសក្តានុពលក្នុងការកសាងសង្គមខ្មែរ ឲ្យមានភាពរឹងមាំសុខដុមនីយកម្ម និងការអភិវឌ្ឍសម្បូរណ៍រុងរឿង។

ចុងបញ្ចប់ ឧត្តមសេនីយ៍ឯក លឹម សុខារស្មី ក៏បានប្រគល់បាច់ផ្កាអនុស្សាវរីយ៍ និងថវិកាជូនដល់មន្ត្រីនគរបាលជាតិនារីផងដែរ ព្រមទាំងជូនពរឱ្យមន្ត្រីនគរបាលជាតិនារីទាំងអស់ ទទួលបាននូវសុខភាពល្អ សំណាងល្អ ជោគជ័យគ្រប់ភារកិច្ចការងារ ៕