ព្រះសង្ឃថៃមួយអង្គបានសុគត និងបុរសជនជាតិថៃម្នាក់បានស្លាប់ ក្នុងហេតុការណ៍គ្រោះអគ្គិភ័យឆាបឆេះយ៉ាងសន្ធោសសន្ធៅ នៅវិហារព្រះពុទ្ធសាសនា ក្នុងទីក្រុងញូវយ៉ក
បាងកក៖ ព្រះសង្ឃថៃមួយអង្គបានសុគត និងបុរសជនជាតិថៃម្នាក់បានស្លាប់ ក្នុងហេតុការណ៍គ្រោះអគ្គិភ័យឆាបឆេះយ៉ាងសន្ធោសសន្ធៅនៅវិហារព្រះពុទ្ធសាសនាមួយឈ្មោះ Wat Usa Buddhayaram ក្នុងទីក្រុងញូវយ៉ក សហរដ្ឋអាម៉េរិក កាលពីថ្ងៃពុធទី១២ ខែកុម្ភៈ(ម៉ោងក្នុងតំបន់)។
យោងតាមរបាយការណ៍ក្នុងស្រុក អគ្គិភ័យបានឆាបឆេះនៅម៉ោងប្រហែល៦ព្រឹកនៅខាងក្នុងវត្តមួយមានទីតាំងនៅទីក្រុង Bronx ហើយបានរីករាលដាលឆាបឆេះយ៉ាងឆាប់រហ័សទៅកាន់ផ្ទះដែលនៅជាប់ព្រះវិហារនោះ។ របាយការណ៍បានបង្ហាញថា អ្នកពន្លត់អគ្គិភ័យប្រហែល១៥០នាក់ ព្យាយាមពន្លត់ភ្លើងអស់រយៈពេលជាង២ម៉ោង ចំពេលអាកាសធាតុត្រជាក់ខ្លាំង និងខ្យល់បក់បោកខ្លាំង។
ជុំវិញបញ្ហានេះ មន្ត្រីពន្លត់អគ្គិភ័យបានរាយការណ៍ថា អគ្គិភ័យឆេះវិហារព្រះពុទ្ធសាសនារបស់ប្រទេសថៃក្នុងទីក្រុងញូវយ៉ក បានឆក់យកជីវិតមនុស្ស២អង្គ/នាក់។ ជាចុងក្រោយ មន្ត្រីបញ្ជាក់ថា ការឆាបឆេះនេះបណ្តាលមកពីម៉ាស៊ីនកម្តៅមួយដាក់ជិតសម្ភារដែលងាយនឹងឆេះ៕
