មហាសេដ្ឋី អ៊ីឡុន ម៉ាស អំពាវនាវឱ្យបិទវិទ្យុអឺរ៉ុបសេរី (RFE/RL) និងវិទ្យុសំឡេងសហរដ្ឋអាម៉េរិក (VOA)
វ៉ាស៊ីនតោន៖ កំពូលមហាសេដ្ឋី លោក អ៊ីឡុន ម៉ាស ដែលជាប្រធាននាយកដ្ឋានប្រសិទ្ធភាពរដ្ឋាភិបាលអាម៉េរិក (DOGE) បានអំពាវនាវឱ្យបិទវិទ្យុអឺរ៉ុបសេរី ឬវិទ្យុសេរីភាព (RFE/RL) និងវិទ្យុសំឡេងសហរដ្ឋអាម៉េរិក (VOA) ខណៈអង្គការប្រព័ន្ធផ្សព្វផ្សាយធំៗទាំងពីរគឺត្រូវបានផ្តល់មូលនិធិគាំទ្រដោយរដ្ឋាភិបាលសហរដ្ឋអាម៉េរិក។
ជាការឆ្លើយតបទៅនឹងការអត្ថាធិប្បាយរបស់បេសកជនពិសេសរបស់ប្រធានាធិបតីសហរដ្ឋអាម៉េរិក លោក រីឆាដ ហ្គ្រែននែល (Richard Grenell) លោក ម៉ាស បានសរសេរនៅលើបណ្តាញសង្គម X ថា ៖«បាទ បិទវាចោលទៅ។ អឺរ៉ុបមានសេរីភាពហើយ ឥឡូវនេះ។ គ្មាននរណាម្នាក់ស្តាប់ពួកគេទៀតទេ។ វាគ្រាន់តែមនុស្សឆ្កួតនិយាយទៅកាន់ខ្លួនឯងប៉ុណ្ណោះ ខណៈពួកគេកំពុងដុតលុយអ្នកបង់ពន្ធអាម៉េរិកចំនួន១ ពាន់លានដុល្លារចោលក្នុងមួយឆ្នាំៗ»។
ការលើកឡើងរបស់លោក ម៉ាស ធ្វើឡើង បន្ទាប់ពីលោក ហ្គ្រែននែល បានលើកឡើងកាលពីថ្ងៃទី៩ ខែកុម្ភៈថា ៖«វិទ្យុអឺរ៉ុបសេរី និងវិទ្យុសំឡេងសហរដ្ឋអាម៉េរិកគឺជាប្រព័ន្ធផ្សព្វផ្សាយដែលទទួលបានមូលនិធិពីអ្នកបង់ពន្ធអាម៉េរិក។ វាគឺជាប្រព័ន្ធផ្សព្វផ្សាយរបស់រដ្ឋ។ បណ្តាញផ្សព្វផ្សាយទាំងនេះពោរពេញទៅដោយសកម្មជនឆ្វេងនិយម។ ខ្ញុំបានធ្វើការជាមួយអ្នកសារព័ត៌មានទាំងនេះអស់ជាច្រើនទសវត្សរ៍មកហើយ។ វាចាស់កំរិលណាស់។ យើងមិនត្រូវការប្រព័ន្ធផ្សព្វផ្សាយដែលចំណាយលុយរដ្ឋាភិបាលនោះទេ»។
សូមរំឭកថា វិទ្យុអឺរ៉ុបសេរី និងវិទ្យុសំឡេងសហរដ្ឋអាម៉េរិកដំណើរការនៅក្រោមទីភ្នាក់ងារសហរដ្ឋអាម៉េរិកសម្រាប់ប្រព័ន្ធផ្សព្វផ្សាយសកល ហើយត្រូវបានបង្កើតឡើងដំបូងដើម្បីប្រឆាំងការឃោសនាក្នុងអំឡុងពេលសង្គ្រាមត្រជាក់ ហើយពួកគេក៏បន្តចាក់ផ្សាយនៅក្នុងតំបន់ដែលមានសេរីភាពសារព័ត៌មានរឹតត្បិត រួមមានរុស្ស៊ី អ៊ីរ៉ង់ និងផ្នែកខ្លះនៃអាស៊ីកណ្តាល។
ក្រៅពីនេះ លោក អ៊ីឡុន ម៉ាស បានរិះគន់ការបង់ប្រាក់សហព័ន្ធដល់ស្ថាប័នប្រព័ន្ធផ្សព្វផ្សាយដូចជា៖ Politico, Associated Press និង The New York Times ដោយចាត់ទុកថា ពួកគេប្រើប្រាស់មូលនិធិមិនមានប្រសិទ្ធភាព។ លោកក៏បានថ្កោលទោសជាសាធារណៈចំពោះការចំណាយរបស់រដ្ឋាភិបាលប្រព័ន្ធផ្សព្វផ្សាយទាំងនោះ ហើយអំពាវនាវថា ប្រព័ន្ធផ្សព្វផ្សាយទាំងនោះត្រូវបានបិទភ្លាមៗ។ ការអំពាវនាវទាំងនេះកើតឡើងចំពេលមានការត្រួតពិនិត្យយ៉ាងទូលំទូលាយ និងភាពចម្រូងចម្រាសជុំវិញប្រព័ន្ធផ្សព្វផ្សាយដែលផ្តល់មូលនិធិដោយរដ្ឋាភិបាលអាម៉េរិក ដោយរដ្ឋបាល ត្រាំ ចាត់វិធានការដើម្បីបញ្ឈប់ការផ្ដល់មូលនិធិដល់ប្រព័ន្ធផ្សព្វផ្សាយទាំងនោះ៕
