លោក ដូណាល់ ត្រាំ នឹងសម្រេចចិត្តក្នុងពេលឆាប់ៗនេះថា តើត្រូវដកការនាំចូលប្រេងពីកាណាដា និងម៉ិកស៊ិកពីការដាក់ពន្ធ២៥ភាគរយដែរឬទេ
វ៉ាស៊ីនតោន៖ លោក ដូណាល់ ត្រាំ ប្រធានាធិបតីអាម៉េរិក នឹងសម្រេចចិត្តក្នុងពេលឆាប់ៗនេះថា តើត្រូវដកការនាំចូលប្រេងពីកាណាដា និងម៉ិកស៊ិកពីការដាក់ពន្ធ២៥ភាគរយដែរឬទេ ខណៈការដាក់ពន្ធនឹងចាប់ផ្តើមនៅថ្ងៃទី១ ខែកុម្ភៈ?
លោក ត្រាំ បាននិយាយថា ជុំវិញការដាក់ពន្ធលើប្រេងកាណាដា និងម៉ិកស៊ិក លោកប្រហែលជានឹងសម្រេចចិត្តនៅយប់នេះ ដោយបន្ថែម ថា មូលហេតុមួយ ផ្នែក អាស្រ័យ លើ តម្លៃ និង ថាតើ ប្រទេស ទាំង ពីរ ប្រព្រឹត្តត្រឹម ត្រូវ ឬ អត់?
លោក ត្រាំ បានកំណត់យកថ្ងៃសៅរ៍ទី១ ខែកុម្ភៈ ជាថ្ងៃចាប់ផ្តើមដាក់ពន្ធ២៥ភាគរយលើការនាំចូលពីម៉ិកស៊ិក និងកាណាដា ដើម្បីជំរុញដៃគូពាណិជ្ជកម្មធំបំផុតរបស់សហរដ្ឋអាម៉េរិកទាំង២ ឱ្យចាត់វិធានការដើម្បីបញ្ឈប់ជនចំណាកស្រុកខុសច្បាប់ និងរំហូរថ្នាំហ្វេតានីលឆ្លងកាត់ព្រំដែនរបស់ពួកគេចូលទៅក្នុងសហរដ្ឋអាម៉េរិក។
ទន្ទឹមគ្នា លោក ត្រាំ ក៏នៅតែពិចារណាលើការដាក់ពន្ធថ្មីលើទំនិញចិន។ លោកបានគំរាមយកពន្ធ១០ភាគរយលើទំនិញចិនទាំងអស់ បន្ទាប់ពីដាក់ទណ្ឌកម្មពន្ធលើការនាំចូលរបស់ចិនមានតម្លៃប្រហែល ៣៧០ពាន់លានដុល្លារ អំឡុងពេលអាណត្តិដំបូងរបស់លោកនៅក្នុងតំណែង។
លោក ត្រាំ បានប្រាប់អ្នកយកព័ត៌មាន៖«ចំពោះប្រទេសចិន ពួកគេកំពុងបញ្ជូនហ្វេតានីលចូលប្រទេសយើង បណ្តាលឱ្យប្រជាជនយើងរាប់រយពាន់នាក់បានស្លាប់ ដូច្នេះ ចិនក៏នឹងត្រូវបង់ពន្ធផងដែរ។ យើងនឹងសម្រេចចិត្តលើបញ្ហានេះ ប៉ុន្តែប្រទេសចិនត្រូវតែបញ្ឈប់ការបញ្ជូនសារធាតុហ្វេតានីលចូលមកក្នុងប្រទេសរបស់យើង និងសម្លាប់ប្រជាជនយើង»។
ទាក់ទិននឹងបញ្ហានេះ ប្រធានាធិបតីចិន លោក ស៊ី ជីនពីង បានសន្យានៅឆ្នាំ២០២៣ ដើម្បីធ្វើការជាមួយលោក ចូ បៃឌិន ដើម្បីទប់ស្កាត់ការនាំចេញសារធាតុហ្វេតានីលទៅកាន់សហរដ្ឋអាម៉េរិក ប៉ុន្តែរដ្ឋធានីប៉េកាំងបានអំពាវនាវឱ្យរដ្ឋធានីវ៉ាស៊ីនតោន ចាត់វិធានការដើម្បីទប់ស្កាត់តម្រូវការគ្រឿងញៀន៕
