អភិបាលខេត្តបន្ទាយមានជ័យ៖ អំពើជួញដូរមនុស្ស គឺជាការរំលោភបំពានដ៏ធ្ងន់ធ្ងរ និងមិនអាចទទួលយកបាន
ភ្នំពេញ៖ នៅថ្ងៃទី៣០ ខែមករា ឆ្នាំ២០២៥ ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងប្រធានគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត អញ្ជើញជាអធីបតីបើកកិច្ចប្រជុំបូកសរុបលទ្ធផលការងារឆ្នាំ២០២៤ និងលើកទិសដៅបន្តឆ្នាំ២០២៥ របស់លេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្ត។
លោកស្រី រស់ សុផានី អភិបាលរងខេត្ត និងជាប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តបន្ទាយមានជ័យ បានឱ្យដឹងថា ក្នុងរយៈពេល ១២ខែ ឆ្នាំ២០២៤ កម្លាំងសមត្ថកិច្ចនគរបាលយុត្តិធម៌ បានបង្ក្រាបបទល្មើសពាក់ព័ន្ធនឹងច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ បានចំនួន ៤៥/៣០ករណី (កើនឡើង១៨) ស្មើ៤១% ដោយបានឃាត់ខ្លួនជនសង្ស័យចំនួន ៥១នាក់/ស្រី០១នាក់ អនិតិជន ៣នាក់។
មួយវិញទៀត អាជ្ញាធរបរទេស បញ្ជូនពលករត្រឡប់មកកម្ពុជាវិញ សរុបចនួន ៣៧៣លើក មាន ៧.០៧៩នាក់/ស្រី ២.២៩៣នាក់ កុមារ ៦៨៧នាក់ (ករណីឆ្លងដែនខុសច្បាប់)។ ដោយឡែក មជ្ឈមណ្ឌលសំចត និងស្ដានីតិសម្បទាសម្រាប់ជនរងគ្រោះប៉ោយប៉ែត ទទួលពលករបញ្ជូនត្រឡប់មកពីប្រទេសថៃតាមច្រកទ្វាអន្តរជាតិប៉ោយប៉ែត បាន ចំនួន ៤៣៣លើក មានមនុស្សសរុបចំនួន ៧៣៥០នាក់/ស្រ្តី ២៣១០នាក់ និងកុមារ ៣៦៣នាក់។ ក្នុងចំណោមពលករ ៧៣៥០នាក់ ក្រុមការងារបានរកឃើញអ្នកខេត្តបន្ទាយមានជ័យចំនួន ១៩៤៦នាក់/ស្រី៦១៣នាក់ និងកុមារ ២០៤នាក់។ តាមរយៈ ការសម្ភាសដើម្បីកំណត់រកជនសង្ស័យថា ជនរងគ្រោះដោយអំពើជួញដូរមនុស្ស និងធ្វើអាជីវកម្មផ្លូវភេទ ក្នុងចំណោមពលករ ៤៥១នាក់ ក្រុមការងារបានរកឃើញបុគ្គលសង្ស័យថា រងគ្រោះដោយការកេងប្រវ័ញ្ចកម្លាំងពលកម្ម មានចំនួន៣នាក់/ស្រី១នាក់។
នាឱកាសនោះ ឯកឧត្ដម អ៊ុំ រាត្រី មានប្រសាសន៍ថា អំពើជួញដូរមនុស្ស ជាការរំលោភបំពានដ៏ធ្ងន់ធ្ងរ មិនអាចទទួលយកបាន វាជាការរំលោភសិទ្ធិមនុស្ស និងបន្តឧបសគ្គដ៏ចម្បងរារាំងដល់ការចូលរួមក្នុងកិច្ចអភិវឌ្ឍជាតិ ដែលប្រការនេះ គឺជាការដាក់បន្ទុកយ៉ាងធ្ងន់ធ្ងរលើសេដ្ឋកិច្ចជាតិ និងសង្គម ព្រោះរដ្ឋបានខាតបង់ថវិកាលើការចំណាយសម្រាប់សេវាសុខភាព ការបាត់បង់ផលិតភាព ជម្រកសុវត្ថិភាពសម្រាប់ជនរងគ្រោះ សេវាសង្គមដើម្បីស្តារនីតិសម្បទា សេវាច្បាប់ និងសេវាគាំទ្រចាំបាច់មួយចំនួនទៀតផងដែរ។
ឯកឧត្ដម អភិបាលខេត្ត អំពាវនាវដល់ថ្នាក់ដឹកនាំ មន្រ្តីរាជការគ្រប់លំដាប់ថ្នាក់ កម្លាំងសមត្ថកិច្ច អាជ្ញាធរគ្រប់មូលដ្ឋាន ត្រូវបន្តបំពេញភារកិច្ចតាមតួនាទី ខិតខំតាមដានបាតុភាព និងបទល្មើសផ្សេងៗឱ្យបានជាប្រចាំ សមត្ថកិច្ចនៅតាមបណ្តាអង្គភាពត្រួតពិនិត្យច្រកទ្វារព្រំដែន កម្លាំងឈរជើងតាមខ្សែបន្ទាត់ព្រំដែន ត្រូវបង្កើនការទទួលខុសត្រូវដោយយកចិត្តទុកដាក់គ្រប់គ្រងព្រំដែន និងលំហូរឆ្លងកាត់ព្រំដែនគ្រប់ទីតាំងឱ្យបានគត់មត់ ដើម្បីទប់ស្កាត់មូលហេតុរួមផ្សំ ដែលនាំឱ្យមានអំពើជួញដូរមនុស្ស និងការរំលោភបំពានផ្សេងៗ៕
