គណៈកម្មាធិការសាខា អនុសាខា ក្រុមប្រតិបត្តិ និងអ្នកស្ម័គ្រចិត្តនៃសាខាកាកបាទក្រហមកម្ពុជា ខេត្តត្បូងឃ្មុំ ចំនួន៣៩នាក់ ទទួលបានវគ្គបណ្តុះបណ្តាលតម្រង់ទិសស្ដីពី «ការងារឥស្សរជនឆ្នើមថ្នាក់ជាតិ និងប័ណ្ណផ្សព្វផ្សាយក្នុងសហគមន៍»
ភ្នំពេញ៖ នៅព្រឹកថ្ងៃពុធ ទី១៥ ខែមករា ឆ្នាំ២០២៥ គណៈកម្មាធិការសាខា កាកបាទក្រហមកម្ពុជា ខេត្តត្បូងឃ្មុំ និងអនុសាខាទាំង៧ក្រុង-ស្រុក រួមជាមួយក្រុមប្រតិបត្តិសាខា-អនុសាខា ព្រមទាំងអ្នកស្ម័គ្រចិត្តសរុបចំនួន៣៩នាក់ (ស្រី១២នាក់) បានទទួលវគ្គបណ្តុះបណ្តាលតម្រង់ទិសស្ដីពី «ការងារឥស្សរជនឆ្នើមថ្នាក់ជាតិ និងប័ណ្ណផ្សព្វផ្សាយក្នុងសហគមន៍» ពីក្រុមការងារឥស្សរជនឆ្នើមថ្នាក់ជាតិនៃទីស្នាក់ការកណ្តាល ដឹកនាំដោយលោកជំទាវ ម៉ែន នារីសោភ័គ អគ្គលេខាធិការធិការរងទី១ កាកបាទក្រហមកម្ពុជា និងជាអនុប្រធានអចិន្ត្រៃយ៍ក្រុមការងារឥស្សរជនឆ្នេីមថ្នាក់ជាតិ នៅសាលប្រជុំធំកាកបាទក្រហមកម្ពុជា សាខាខេត្តត្បូងឃ្មុំ ស្ថិតនៅភូមិនិគមលើ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ។
បន្ទាប់ពីបានជម្រាបជូនអំពីសមាសភាពរបស់ក្រុមការងារឥស្សរជនឆ្នេីមថ្នាក់ជាតិ នៃសាខា កក្រក ខេត្តត្បូងឃ្មុំ ដែលថ្លែងដោយលោក រស់ សុខន នាយកស្ដីទីសាខា, ឯកឧត្តមវេជ្ជបណ្ឌិត កែវ វណ្ណៈ អនុប្រធានគណៈកម្មាធិការសាខា និងជាតំណាង ឯកឧត្តម ប៉ែន កុសល្យ ប្រធានគណៈសាខាកាកបាទក្រហមកម្ពុជា ខេត្តត្បូងឃ្មុំ ក៏បានជម្រាបជូនអំពីសកម្មភាពការងារឥស្សរជនឆ្នើមថ្នាក់ជាតិ នៅថ្នាក់សាខា ដែលបាននិងកំពុងអនុវត្តនាពេលកន្លងមក។
មានមតិសំណេះសំណាលក្នុងឱកាសនេះ លោកជំទាវ ម៉ែន នារីសោភ័គ បាននាំយកនូវប្រសាសន៍ផ្តាំផ្ញើសួរសុខទុក្ខ និងការថ្លែងអំណរគុណយ៉ាងជ្រាលជ្រៅពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នេីមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ី -ប៉ាស៊ីហ្វិក ឆ្លេីយតបមេរោគអេដស៍ជំងឺអេដស៍ និងការអភិវឌ្ឍនៅកម្ពុជា និងជាឥស្សរជនឆ្នេីមថ្នាក់ជាតិ នៃផែនការសកម្មភាពរួម អគ្គលេខាធិការអង្គការសហប្រជាជាតិ ដេីម្បីសុខភាពស្ត្រីនិងកុមារ ជូនដល់ក្រុមការងារឥស្សរជនឆ្នើមថ្នាក់ជាតិនៃថ្នាក់សាខាខេត្តត្បូងឃ្មុំ ដែលបានខិតខំយកចិត្តទុកដាក់អនុវត្តន៍សកម្មភាពការងារមិនរួញរា និងបានជោគជ័យទោះជាលំបាកលំបិនយ៉ាងណាក៏ដោយ។
លោកជំទាវបានគូសបញ្ជាក់ថា៖ «វគ្គបណ្តុះបណ្តាលតម្រង់ទិសនៅពេលនេះគឺដើម្បីឱ្យដឹងកាន់តែច្បាស់ពីការងារឥស្សរជនឆ្នេីមថ្នាក់ជាតិ ហេីយជាពិសេសចាំបាច់ត្រូវមានការបណ្តុះបណ្តាលបន្តទៅដល់សាខា អនុសាខា និងរីកសាយទៅដល់កម្លាំងអ្នកស្ម័គ្រចិត្តតាមភូមិឃុំ។ ព្រោះថាការងារនេះមិនមែនផ្តោតលើតែសុខភាពមាតា ទារក កុមារ និងជំងឺអេដស៍ទេ គឺពាក់ព័ន្ធនឹងសុខភាពសាធារណៈរបស់ប្រជាពលរដ្ឋយើងក្នុងពេលបច្ចុប្បន្ន ជាពិសេសឆ្លើយតបទៅនឹងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា គឺលើកកម្ពស់ការគ្របដណ្តប់សុខភាពជាសកល ក៏ដូចជាការគិតគូរអំពីការទប់ស្កាត់បញ្ហាជំងឺមិនឆ្លងទាំង៤សំខាន់ៗដូចជា ជំងឺទឹកនោមផ្អែម ជំងឺបេះដូងសរសៃឈាម ជំងឺមហារីក និងជំងឺរលាកផ្លូវដង្ហេីមរ៉ាំរ៉ៃ ដែលកំពុងប្រឈមខ្លាំងនៅក្នុងប្រទេសកម្ពុជាយេីង»។
ក្នុងឱកាសនោះដែរលោកជំទាវ មុំ ចន្ធី នាយិការរងនាយកដ្ឋានសុខភាព កាកបាទក្រហមកម្ពុជា និងលេខាធិការក្រុមការងារឥស្សរជនឆ្នើមថ្នាក់ជាតិ ក៏បានបង្ហាញពីខ្លឹមសារនៃ «ប័ណ្ណអប់រំសុខភាព» ដែលបានធ្វើបច្ចុប្បន្នភាព អំពីស្ថានភាពសុខភាពសាធារណៈរបស់ប្រជាពលរដ្ឋកម្ពុជា ដោយក្នុងនោះមាននិយាយពីសុខភាពមាតា ទារក និងកុមារ ជំងឺមហារីកមាត់ស្បូន មហារីកសុដន់ មេរោគអេដស៍ ជំងឺអេដស៍ និងអំពីការថែទាំសុខភាពបឋម។
ចុងបញ្ចប់នៃកម្មវិធីវគ្គ សាខានិងអនុសាខាទាំង៧ ក្រុង-ស្រុក ក៏បានទទួលនូវឯកសារ ជាមួយប័ណ្ណផ្សព្វផ្សាយ ១ឈុត និងថតរូបអនុស្សាវរីយ៍។ ដោយឡែក សាខាកាកបាទក្រហមកម្ពុជា ខេត្តត្បូងឃ្មុំ បានទទួលប័ណ្ណថ្លែងអំណរគុណរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផងដែរ ៕
