ធនាគារថៃអះអាងថា រកមិនឃើញភស្តុតាងណាមួយ ថាធនាគារត្រូវបានប្រើប្រាស់ដើម្បីជួយរបបយោធាមីយ៉ាន់ម៉ាទិញអាវុធឡើយ
បាងកក៖ ធនាគារកណ្តាល និងទីភ្នាក់ងារប្រឆាំងការលាងលុយរបស់ប្រទេសថៃ បានអះអាងកាលពីថ្ងៃចន្ទទី៣០ធ្នូថា ពួកគេមិនបានរកឃើញភស្តុតាងណាមួយ ដើម្បីគាំទ្ររបាយការណ៍ពីអ្នកជំនាញរបស់អង្គការសហប្រជាជាតិ ដែលថាធនាគារមួយចំនួនរបស់ប្រទេសនេះ ត្រូវបានប្រើប្រាស់ដើម្បីជួយរបបយោធាមីយ៉ាន់ម៉ាទិញអាវុធនៅឆ្នាំ២០២៣ឡើយ។
ធនាគារកណ្តាលថៃ (BoT) និងការិយាល័យប្រឆាំងការលាងលុយកខ្វក់ (Amlo) បានបញ្ជាក់នៅក្នុងសេចក្តីថ្លែងការណ៍រួមថា ពួកគេបានចាប់ផ្តើមការស៊ើបអង្កេតភ្លាមៗ និងបានបញ្ជាឱ្យស្ថាប័នហិរញ្ញវត្ថុពិនិត្យមើលប្រតិបត្តិការមួយចំនួន បន្ទាប់ពីរបាយការណ៍ខែមិថុនា ឆ្នាំ២០២៤ ដោយការិយាល័យឧត្តមស្នងការអង្គការសហប្រជាជាតិសម្រាប់សិទ្ធិមនុស្ស។
ការស៊ើបអង្កេតបានរកឃើញថា ស្ថាប័នហិរញ្ញវត្ថុមួយចំនួនបានធ្វើប្រតិបត្តិការជាមួយបុគ្គលដែលមាននៅក្នុងរបាយការណ៍របស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ប៉ុន្តែគ្មានភស្តុតាងណាមួយ ត្រូវបានរកឃើញដែលភ្ជាប់ប្រតិបត្តិការទាំងនេះទៅនឹងលទ្ធកម្មអាវុធនោះទេ។
យ៉ាងណា របាយការណ៍ BoT និង Amlo បានទទួលស្គាល់ថា មានផ្នែកដែលត្រូវការការកែលម្អ។ របាយការណ៍ BoT និង Amlo បានលើកឡើងថា ស្ថាប័នហិរញ្ញវត្ថុនីមួយៗមានកម្រិតនៃភាពតឹងតែងខុសៗគ្នាក្នុងប្រតិបត្តិការរបស់ពួកគេ ហើយថា មានតម្រូវការដើម្បីលើកកម្ពស់ការប្រឆាំងភេរវកម្ម និងការអនុវត្តប្រឆាំងនឹងការលាងលុយកខ្វក់។
របាយការណ៍របស់អង្គការសហប្រជាជាតិ មានចំណងជើងថា«ធនាគារលើពាណិជ្ជកម្មមរណៈ៖ របៀបដែលធនាគារ និងរដ្ឋាភិបាលធ្វើការជាមួយរបបយោធាក្នុងប្រទេសមីយ៉ាន់ម៉ា» បានកត់សម្គាល់ការកើនឡើងចំនួនប្រាំដងនៃការវាយប្រហារតាមអាកាសរបស់របបយោធាមីយ៉ាន់ម៉ាទៅលើគោលដៅជនស៊ីវិល។ របាយការណ៍នេះបានអះអាងថា ក្រុមប្រឹក្សារដ្ឋបាលរដ្ឋមីយ៉ាន់ម៉ា (របបយោធា) កំពុងពឹងផ្អែកលើធនធានចម្បងពីរពីបរទេសគឺអាវុធ និងលុយ។
បន្ថែមពីនោះ របាយការណ៍នេះបានអះអាងថា ថៃបានក្លាយជាប្រភពនាំមុខគេនៃការផ្គត់ផ្គង់យោធារបស់ក្រុមប្រឹក្សារដ្ឋបាលរដ្ឋមីយ៉ាន់ម៉ា ដែលបានទិញតាមរយៈប្រព័ន្ធធនាគារអន្តរជាតិ។ ការផ្ទេរអាវុធ និងសម្ភារៈពាក់ព័ន្ធពីក្រុមហ៊ុនដែលបានចុះបញ្ជីក្នុងប្រទេសថៃបានកើនឡើងទ្វេដងពីជាង៦០លានដុល្លារ ក្នុងឆ្នាំសារពើពន្ធឆ្នាំ២០២២ ដល់ជាង១២០លានដុល្លារក្នុងឆ្នាំសារពើពន្ធឆ្នាំ២០២៣។របាយការណ៍របស់អង្គការសហប្រជាជាតិ បានបញ្ជាក់ថា ខ្លួនមិនបានរកឃើញភស្តុតាងណាមួយដែលថារាជរដ្ឋាភិបាលថៃមានជាប់ពាក់ព័ន្ធ ឬដឹងពីការផ្ទេរទាំងនេះទេ៕
