មន្រ្តីនគរបាលខេត្តបាត់ដំបង បន្តចូលរួមរក្សាសន្តិសុខសណ្តាប់ធ្នាប់ នៅតាមមណ្ឌលប្រឡងបាក់ឌុប ក្រោមធាតុអាកាសភ្លៀងរលឹម
ភ្នំពេញ៖ នៅព្រឹកថ្ងៃទី៩ខែតុលាឆ្នាំ២០២៤ ដែលជាថ្ងៃទី២ និងជាថ្ងៃចុងក្រោយ នៃការប្រឡងសញ្ញាបត្រមធ្យមសិក្សាទុតិយភូមិ ក្នុងខេត្តបាត់ដំបង មន្រ្តីនគរបាល ក្រោមការដឹកនាំរបស់ លោកឧត្តមសេនីយ៍ទោ ដាញ់ អេងប៊ុនចាន់ ស្នងការ នៃស្នងការដ្ឋាននគរបាលខេត្តបាត់ដំបង បានបន្តចូលរួមរក្សាការពារសន្តិសុខ សណ្តាប់ធ្នាប់នៅតាមមណ្ឌលប្រ ឡងសញ្ញាប័ត្រទុតិយភូមិ នានាក្នុងក្រុងបាត់ដំបង និងស្រុកសង្កែស្ថិតក្រោមដំណក់ទឹកភ្លៀងនៃវស្សានៈរដូវ។
ទិដ្ឋភាពនៅតាមមណ្ឌលប្រឡង នាព្រឹកនេះ មានសភាពស្ងប់ស្ងាត់ល្អ បើទោះបីមានផលរំខានខ្លះពីដំណក់ទឹកភ្លៀង ក៏ដោយ តែបេក្ខជនគ្រប់រូបបានធ្វើដំណើរទៅកាន់មណ្ឌលប្រឡងរៀងខ្លួនប្រកបដោយទឹកមុខរីករាយ ក្រោមកិច្ចខិតខំប្រឹងប្រែង និងយកចិត្តទុកដាក់សម្រួលសណ្តាប់ធ្នាប់ ចរាចរណ៍ពីមន្រ្តីនគរបាលដែលមានវត្តមាន នៅទីនោះដោយការទទួលខុសត្រូខ្ពស់។
នៅមានរយៈពេលតែថ្ងៃរសៀលនេះប៉ុណ្ណោះ ការប្រឡងសញ្ញាបត្រ័នឹងត្រូវបានបញ្ចប់ហើយ តែភារកិច្ចរបស់មន្រ្តីនគរបាល នៅតែបន្តការពារសន្តិសុខសណ្តាប់ធ្នាប់ជូនបេក្ខជន ក្នុងការវិលត្រឡប់ទៅ កាន់លំនៅដ្ឋានវិញ ប្រកបដោយសុខសុវត្ថិភាព សូមជូនពរដល់បេក្ខជនទាំងអស់ទទួលបានជ័យលាភីក្នុងកិច្ចការប្រឡងនេះ៕
