ឯកឧត្តម ប៊ុន ហុន ដឹកនាំកិច្ចប្រជុំក្រុមការងាររបស់ក្រសួងមហាផ្ទៃ ដើម្បីរៀបចំកិច្ចប្រជុំអភិបាលខេត្តជាប់ព្រំដែនកម្ពុជា-ថៃ លើកទី៨
ភ្នំពេញ៖ នៅទីស្តីការក្រសួងមហាផ្ទៃ នារសៀលថ្ងៃទី៧ ខែតុលា ឆ្នាំ២០២៤ ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ បានអញ្ជើញដឹកនាំកិច្ចប្រជុំក្រុមការងាររបស់ក្រសួងមហាផ្ទៃដើម្បីរៀបចំកិច្ចប្រជុំអភិបាលខេត្តជាប់ព្រំដែនកម្ពុជា-ថៃ លើកទី៨ ដែលមានចែងក្នុងសេចក្តីសម្រេចលេខ ៤៣០៤សសរ ចុះថ្ងៃទី១៨ ខែកក្កដា ឆ្នាំ២០២៤ របស់ក្រសួងមហាផ្ទៃ។
កិច្ចប្រជុំនេះមានការអញ្ជើញចូលរួមពី ឯកឧត្តម អគ្គនាយក ឯកឧត្តម នាយឧត្តមសេនីយ៍ អគ្គស្នងការរង អគ្គនាយករង លោក-លោកស្រី ប្រធាននាយកដ្ឋាន អនុប្រធាននាយកដ្ឋាន តំណាងរដ្ឋបាលខេត្ត និងស្នងការខេត្តនៅជាប់ព្រំដែន ដែលជាអនុប្រធាន និងសមាជិក-សមាជិកា ដែលមានសមាសភាពសរុបចំនួន ៨០រូប។
កិច្ចប្រជុំនេះមានរបៀបវារៈសំខាន់ៗចំនួន៣ គឺ៖
១-ការប្រកាសសមាសភាពដែលមានចែងក្នុងសេក្តីសម្រេចលេខ ៤៣០៤សសរ ចុះថ្ងៃទី១៨ ខែកក្កដា ឆ្នាំ២០២៤ របស់ក្រសួងមហាផ្ទៃ ស្តីពីការបង្កើតក្រុមការងារដើម្បីរៀបចំកិច្ចប្រជុំអភិបាលខេត្តជាប់ព្រំដែនកម្ពុជា-ថៃ លើកទី៨។
២-ពិភាក្សា និងផ្លាស់ប្ដូរយោបល់លើការរៀបចំកិច្ចការនានារបស់ក្រុមការងារនីមួយៗ។
៣-ការពិនិត្យ និងពិភាក្សាលើសេចក្តីព្រាងកំណត់ហេតុរួម និងសេចក្តីព្រាងសេចក្តីប្រកាសរួម។
ឯកឧត្តមរដ្ឋលេខាធិការ និងជាប្រធានអង្គប្រជុំ បានអនុញ្ញាតឱ្យតំណាងរដ្ឋបាលខេត្ត ស្នងការខេត្តនៅជាប់ព្រំដែន និងអង្គប្រជុំទាំងអស់ ជួយពិនិត្យលើសេចក្តីព្រាងកំណត់ហេតុរួម និងសេចក្តីព្រាងសេចក្តីប្រកាសរួម ព្រមទាំងបញ្ហាប្រឈមដែលបានជួបកន្លងមក ដើម្បីយកមកពិភាក្សារកដំណោះស្រាយ ៕
