រាជរដ្ឋាភិបាល បញ្ចូលថ្ងៃ២៩ ធ្នូ «ទិវាសន្តិភាពនៅកម្ពុជា» ក្នុងប្រតិទិនឈប់សម្រាកការងារ របស់មន្ត្រីរាជការ កម្មករ និយោជិតជាផ្លូវការ
ភ្នំពេញ៖ សម្ដេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា បានសម្រេចបញ្ចូលថ្ងៃទី២៩ ខែធ្នូ ជា«ទិវាសន្តិភាពនៅកម្ពុជា» ទៅក្នុងប្រតិទិន ឈប់សម្រាកការងារ របស់មន្ត្រីរាជការនិយោជិត កម្មករ ប្រចាំឆ្នាំ២០២៥ ។
ការដាក់បញ្ជូលថ្ងៃ «២៩ ធ្នូ» ទៅជាថ្ងៃឈប់សម្រាកនេះ ជាមហាជោគជ័យរបស់ខ្មែរ មិនត្រឹមតែជាថ្ងៃទិវាសន្តិភាពប៉ុណ្ណោះទេ ។
ក្នុងករណីនេះយើងត្រូវគោរពថ្លែងអំណរគុណ និងដឹងគុណដ៏ជ្រាលជ្រៅបំផុតចំពោះសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានសម្រេចឱ្យឈប់សម្រាកមួយថ្ងៃនៅថ្ងៃ «២៩ ធ្នូ» នៅឆ្នាំក្រោយ ពោលថ្ងៃ២៩ ខែធ្នូ ឆ្នាំ២០២៥តទៅ តាមរយៈសម្តេចបានចុះហត្ថលេខា លើអនុក្រឹត្យស្ដីពីប្រតិទិនឈប់សម្រាកការងាររបស់មន្ត្រីរាជការនិយោជិត កម្មករ ប្រចាំឆ្នាំ២០២៥ ។
សេចក្តីប៉ងប្រាថ្នារបស់ប្រជារាស្ត្រខ្មែរ បានជោគជ័យហើយព្រោះថ្ងៃនេះ កាលពី ២៥ឆ្នាំមុន សម្តេចតេជោបានដាក់ចេញ «ទស្សនៈនយោបាយ ឈ្នះ ឈ្នះ» នៅខែកុម្ភៈ ឆ្នាំ១៩៩៨ ហើយបានបញ្ចប់ ជាស្ថាពរនៅថ្ងៃ ២៩ ធ្នូ ១៩៩៨ក្រោយសមាហរណកម្មកម្លាំងឧទ្ទាមនៅអន្លង់វែង ខេត្តឧត្តរមានជ័យដោយ សម្តេច ពិជ័យសេនា ទៀ បាញ់ តំណាងដ៏ខ្ពង់ខ្ពស់របស់សម្តេចតេជា ហ៊ុន សែន នាយករដ្ឋមន្ត្រី នៃកម្ពុជា។ ចាប់ពីពេលនោះមកប្រទេសខ្មែរ ស្គាល់សន្តិភាពពិតប្រាកដ ដែលជារបស់ខ្មែរ ដែលសម្តេចតេជោ ជាអ្នកដាក់ចេញនូវគោលនយោបាយ ដ៏មានមហិទ្ធិឫទ្ធិនេះ។
ចំពោះអ្នកនយោបាយខ្មែរ គួរចាប់ផ្តើមគិតលើបញ្ហានេះហើយ ទស្សនៈវិជ្ជានយោបាយដ៏ខ្លាំងពូកែនេះ អាចនាំឱ្យយើងស្ថិត លើតារាវិថីដ៏ភ្លឺស្វាងនិងខ្មែរ ឈប់ចាញ់បោកបរទេស។ ជយោ ទស្សនៈវិជ្ជានយោបាយ «ឈ្នះ ឈ្នះ ២៩ ធ្នូ ១៩៩៨» របស់បិតាសន្តិភាព សម្តេចតេជោ ហ៊ុន សែន នៃកម្ពុជាស្ថិតស្ថេរជាអមតៈ។
ទន្ទឹមគ្នានេះដែរនៅឆ្នាំ២០២៥ខាងមុខនេះ មន្ត្រីរាជការ កម្មករនិយោជិតមានរយៈពេលឈប់សម្រាក ២២ថ្ងៃ។
ប្រតិទិនឈប់សម្រាកដែលចុះសហត្ថលេខាដោយសម្តេចធិបតី ហ៊ុន ម៉ាណែត ចេញផ្សាយនៅថ្ងៃទី២៩ ខែសីហា ឆ្នាំ២០២៤ បានកំណត់ថ្ងៃឈប់សម្រាកការងារមានថ្ងៃទី១មករា ទិវាចូលឆ្នាំសកល សម្រាក១ ថ្ងៃ ។ថ្ងៃទី៧មករា ទិវាជ័យជម្នះលើរបបប្រល័យពូជសាសន៍ សម្រាក១ថ្ងៃ។ ថ្ងៃទី៨ មីនា ទិវាអន្តរជាតិនារី សម្រាក១ ថ្ងៃ ។ ថ្ងៃទី១៤,១៥,១៦ មេសា ពិធីបុណ្យចូលឆ្នាំថ្មី ប្រពៃណីជាតិ ឆ្នាំម្សាញ់ សម្រាក៣ ថ្ងៃ។ ថ្ងៃទី១ ឧសភា ទិវាពលកម្មអន្តរជាតិ សម្រាក១ ថ្ងៃ ។ ថ្ងៃទី១១ឧសភា ពិធិបុណ្យវិសាខបូជា សម្រាក១ថ្ងៃ។ ថ្ងៃ ១៤ឧសភា ព្រះរាជពិធីបុណ្យចម្រើនព្រះជន្ម ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា សម្រាក១ថ្ងៃ។ ថ្ងៃទី១៥ឧសភា ព្រះរាជពិធីច្រត់ព្រះនង្គ័លសម្រាក១ថ្ងៃ។ថ្ងៃ១៨ មិថុនា ព្រះរាជពិធីបុណ្យចម្រើនព្រះជន្មសម្តេចព្រះមហាក្សត្រី នរោត្តមមុនិមាថ សីហនុ ព្រះវរាជមាតាជាតិខ្មែរ សម្រាក១ថ្ងៃ។ ថ្ងៃទី២១,២២,២៣ កញ្ញា ពិធីបុណ្យភ្ជុំបិណ្ឌសម្រាក៣ថ្ងៃ។ ថ្ងៃទី២៤ កញ្ញា ទិវាប្រកាសរដ្ឋធម្មនុញ្ញ សម្រាក១ថ្ងៃ ។ ថ្ងៃទី១៥ តុលា ទិវាប្រារព្ធពិធីព្រះវិញ្ញាណក្ខន្ធ ព្រះករុណាព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវរាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ សម្រាក១ថ្ងៃ។ ថ្ងៃ៤,៥,៦ វិច្ឆិកា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក សម្រាក៣ថ្ងៃ។ ថ្ងៃទី៩ វិច្ឆិកា ពិធីបុណ្យឯករាជជាតិ សម្រាក ១ថ្ងៃ។ ថ្ងៃទី២៩ ធ្នូ ទិវាសន្តិភាពនៅកម្ពុជា សម្រាក១ថ្ងៃ៕
