ហ្វូងត្រីជាង១០០តោនបានងាប់ លើផ្ទៃទឹកនៃកំពង់ផែប្រទេសក្រិកដោយសារបញ្ហាអាកាសធាតុក្តៅខ្លាំង

បរទេស៖ អាជ្ញាធរបាននិយាយថាហ្វូងសត្វត្រីងាប់ជាង១០០តោនត្រូវបានគេប្រមូលពីផ្នែកខាងក្នុង និងជុំវិញកំពង់ផែ Volos ភាគកណ្តាលនៃប្រទេសក្រិក បន្ទាប់ពីអាជ្ញាធរប្រទះឃើញវាងាប់ត្រៀបត្រាដោយសារតែការប្រែប្រួលអាកាសធាតុក្តៅខ្លាំងពេក។

ត្រីទឹកសាបដែលងាប់ពាសពេញដៃឈូងសមុទ្រនេះស្ថិតក្នុងចម្ងាយ៣២០គីឡូម៉ែត្រភាគខាងជើងនៃទីក្រុងអាថែន និងទន្លេក្បែរខាងនោះ បានកើតឡើងបន្ទាប់ពីកម្រិតទឹកបានហក់ឡើងខ្ពស់ដោយសារទឹកជំនន់កាលពីឆ្នាំមុន បន្ទាប់មកវាក៏រងគ្រោះរាំងស្ងួតធ្ងន់ធ្ងរជាច្រើនខែមកហើយក្នុងឆ្នាំនេះជាថ្មីម្តងទៀត។ ករណីងាប់ត្រីរាប់សិបតោននេះបានធ្វើឲ្យប៉ះពាល់ដល់អាជីវកម្មក្នុងតំបន់ ជាពិសេសតាមមាត់សមុទ្រជាមួយនឹងសកម្មភាពពាណិជ្ជកម្មក៏បានកាត់បន្ថយមកត្រឹមចំនួន ៨០% ដែរ ក្នុងរយៈពេល៣ថ្ងៃកន្លងមកនេះ នេះបើយោងតាមសភាពាណិជ្ជកម្ម Volos ដែលបានចុះផ្សាយ។

ទូកនេសាទជាច្រើនគ្រឿង និង អ្នករុករកត្រីជាច្រើនរយនាក់ត្រូវអាជ្ញាធរជួលដើម្បីកកាយយកសពត្រីទាំងនោះចេញពីផ្ទៃសមុទ្រ ហើយដឹកជញ្ជូនវាទៅរថយន្តទៅដុតកម្ទេចចោល។

លោកស្រី Anna Maria Papadimitriou ជាអភិបាលរងប្រចាំតំបន់នេះបានមានប្រសាសន៍ថាសពត្រីដែលងាប់ពាសពេញផ្ទៃទឹកនេះ ធ្លាប់បានកើតឡើងម្តងដែរកាលពីដើមទសវត្សរ៍ឆ្នាំ១៩៦០ និងត្រូវបានគេស្ដារឡើងវិញនៅក្នុងឆ្នាំ២០១៨ ដើម្បីប្រយុទ្ធប្រឆាំងនឹងផលប៉ះពាល់នៃគ្រោះរាំងស្ងួតនោះក្នុងតំបន់ Thessaly។ ចំណែកអភិបាលគ្រប់គ្រងតំបន់នេះក៏បាន សម្រេចប្រកាសភាពអាសន្នលើបញ្ហានេះដូចគ្នា ដើម្បីឲ្យប្រជាពលរដ្ឋក្នុងតំបន់មានការប្រុងប្រយ័ត្នខ្ពស៕