មន្ត្រីជាន់ខ្ពស់ក្រសួងធនធានទឹក ដឹកនាំកិច្ចប្រជុំពិនិត្យវឌ្ឍនភាពនៃការអនុវត្តភាពជាដៃគូរវាងរដ្ឋ និងវិស័យឯកជន(PPP) នៅប្រព័ន្ធធារាសាស្ត្រព្រែកពោធិ ក្នុងភូមិសាស្ត្រខេត្តកំពង់ចាម

ភ្នំពេញ៖ នៅថ្ងៃទី២៧ ខែសីហា ឆ្នាំ២០២៤នេះ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម បានអញ្ជើញដឹកនាំការប្រជុំដើម្បីពិនិត្យលើវឌ្ឍនភាពនៃការអនុវត្តភាពជាដៃគូរវាងរដ្ឋនិងវិស័យឯកជន(PPP) របស់គម្រោងកែលម្អវិស័យធារាសាស្រ្តក្រោមហិរញ្ញប្បទានពីធនាគារអភិវឌ្ឍន៍អាស៊ី(ADB) នៅតំបន់ប្រព័ន្ធធារាសាស្រ្តព្រែកពោធិ ក្នុងស្រុកស្រីសន្ធរ ខេត្តកំពង់ចាម។

សូមជម្រាបថា កិច្ចប្រជុំនេះមានការចូលរួមពីឯកឧត្តម លោកជំទាវ លោក លោកស្រី ជាអភិបាល អភិបាលរងនៃគណៈអភិបាលខេត្តកំពង់ចាម អភិបាល អភិបាលរងនៃគណៈអភិបាលស្រុកស្រីសន្ធរ ប្រធានមន្ទីរធនធានទឹក និងឧតុនិយមខេត្តកំពង់ចាម មេឃុំមេភូមិពាក់ព័ន្ធទាំងអស់ សហគមន៍កសិករប្រើប្រាស់ទឹក(ស.ក.ប.ទ.) នៃប្រព័ន្ធធារាសាស្រ្តព្រែកពោធិ និងសហការីចំណុះក្រសួងជាច្រើនរូប។

ឯកឧត្តមរដ្ឋលេខាធិការបានបញ្ជាក់ឱ្យដឹងថា ក្រោមការគាំទ្រយ៉ាងពេញទំហឹង និងការយកចិត្តទុកដាក់ខ្ពស់ពីសំណាក់ថ្នាក់ដឹកនាំខេត្តកំពង់ចាម ពីគ្រប់ផ្នែក គ្រប់ថ្នាក់ទូទាំងគណៈបញ្ជាការស្រុកស្រីសន្ធរ និងមេឃុំពាក់ព័ន្ធទាំងអស់ក្នុងស្រុកស្រីសន្ធរ ស្របពេលលទ្ធផលសម្រេចបានជោគជ័យនៃសហគមន៍កសិករប្រើប្រាស់ទឹកប្រព័ន្ធធារាសាស្រ្តព្រែកពោធិ បានធ្វើឱ្យអ្នកវិនិយោគទុនក្នុងស្រុកពេញចិត្តក្នុងការបោះទុនវិនិយោគ ដោយសហការជាមួយសហគមន៍កសិករប្រើប្រាស់ទឹកនៃប្រព័ន្ធខាងលើ រួមជាមួយអាជ្ញាធរថ្នាក់ក្រោមជាតិគ្រប់លំដាប់ថ្នាក់ ដើម្បីធ្វើការថែទាំប្រព័ន្ធធារាសាស្រ្តព្រែកពោធិប្រកបដោយនិរន្តរភាព និងបន្ត សកម្មភាពដ៏រស់រវើក ក្នុងការបែងចែកទឹកជូនសមាជិកសមាជិកានៃសហគមន៍កសិករប្រើប្រាស់ទឹករបស់ប្រព័ន្ធធាសាស្រ្តព្រែកពោធិ និងសម្រាប់បម្រើឱ្យគ្រប់វិស័យទាំងអស់ប្រកបដោយចីរភាព។

ទន្ទឹមនឹងនេះ ឯកឧត្តមរដ្ឋលេខាធិការបានបញ្ជាក់ឱ្យដឹងបន្ថែមទៀតថា ក្រសួងធនធានទឹក និងឧតុនិយម ក្រោមកិច្ចសហការដ៏រឹងមាំជាមួយក្រសួងសេដ្ឋកិច្ច និងហិរញ្ញវត្ថុ និងក្រសួង ស្ថាប័នពាក់ព័ន្ធនានារបស់រាជរដ្ឋាភិបាល បានអនុវត្តនូវយុទ្ធសាស្រ្ត និយាម និងច្បាប់ស្តីការអនុវត្តភាពជាដៃគូរវាងរដ្ឋ និងវិស័យឯកជន( PPP) ក្នុងគម្រោងកែលម្អវិស័យធារាសាស្រ្ត (IAIP) ក្រោមហិរញ្ញប្បទានពីធនាគារអភិវឌ្ឍន៍អាស៊ី(ADB) នៅតំបន់ប្រព័ន្ធធារាសាស្រ្តព្រែកពោធិ៕