អគ្គនាយកពន្ធនាគារ និងប្រធានបណ្ឌិត្យសភានគរបាលកម្ពុជា អញ្ជើញបិទវគ្គបណ្តុះបណ្តាលបឋមមន្ត្រីពន្ធនាគារ ជំនាន់ទី១៩ លើកទី៣
ភ្នំពេញ៖ នៅរសៀលថ្ងៃទី២២ ខែសីហា ឆ្នាំ២០២៤ ឯកឧត្តមឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ និងឯកឧត្តម នាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញជាសហធិបតីក្នុងពិធីបិទវគ្គបណ្តុះបណ្តាលបឋមមន្ត្រីពន្ធនាគារ ជំនាន់ទី១៩ លើកទី៣ ដែលមានការអញ្ជើញចូលរួមពី ឯកឧត្តម លោកជំទាវ អគ្គនាយករង ប្រធាននាយកដ្ឋាន អនុប្រធានបណ្ឌិត្យសភា នាយក នាយករង លោកគ្រូសាស្ត្រាចារ្យ និងមន្រ្តី រួមទាំងសិក្ខាមជ័យលាភី ចំនួន១០០នាក់។
ថ្លែងក្នុងពិធីនេះ ឯកឧត្តមអគ្គនាយកពន្ធនាគារ បានមានប្រសាសន៍ថា “ពាក្យថា ពន្ធនាគារ បានកើតឡើងតាំងតែពីជំនាន់បារាំងមកម្ល៉េះ ដែលស្ថិតនៅក្នុងឆ្នាំ១៨៦៣ កាលនោះប្រជាពលរដ្ឋខ្មែរយើងមិនបានបង់ពន្ធទៅកាន់បារាំង ហើយបារាំងក៏បានចាប់ប្រជាជនខ្មែរយើងដាក់ក្នុងអាគារ ដោយសារហេតុនេះទើប សម្តេច សង្ឃរាជ ជួនណាត បានបង្កើតពាក្យថា “ពន្ធនាគារ” នេះឡើង។
ឯកឧត្តមអគ្គនាយក បានផ្តល់នូវមតិផ្តាំផ្ញើមួយចំនួនដូចខាងក្រោម៖
ទី១.សូមយកចំណេះដឹង និងបទពិសោធន៍ដែលទទួលបានពីវគ្គបណ្តុះបណ្តាលនេះយកទៅអនុវត្តឲបានជោគជ័យដោយប្រកបដោយស្មារតីទទួលខុសត្រូវខ្ពស់ ជាមួយនឹងក្រមសីលធម៌ មនសិការ វិជ្ជាជីវៈ ក្នុងការបំពេញការងាររបស់ខ្លួន។
ទី២.ត្រូវបន្តអនុវត្តន៍ភារកិច្ចរបស់ខ្លួន ឲទទួលបានជោគជ័យថ្មីៗបន្ថែមទៀតដោយត្រូវប្រកាន់ ខ្ជាប់នូវវប្បធម៌គុណភាព ដើម្បីលើកកម្ពស់ សមត្ថភាព និងសីលធម៌វិជ្ជាជីវៈ ដើម្បីបន្តរក្សាវនូកិត្សានុភាព ឧត្តមភាព និងជំនឿរទុកចិត្តពីថ្នាក់ដឹងនាំ។
ទី៣.ត្រូវធ្វើការចែករំលែកចំណេះជំនាញនេះដល់មន្រ្តីរួមការងារ ឬមិនទាន់បានឆ្លងកាត់វគ្គបណ្តុះបណ្តាលផ្សេងៗ និងជំរុញលើកទឹកចិត្តមកចូលរួមសិក្សានៅវគ្គបន្តបន្ទាប់ទៀតនៅពេលខាងមុខ។
បន្ថែមពីនេះទៀត ឯកឧត្តមអគ្គនាយក បានសូមឲ្យមន្រ្តីទាំងអស់ត្រូវពង្រីកចំណេះដឹងតាមរយៈស្វ័យសិក្សា និងការសិក្សាស្រាវជ្រាវនូវគន្លឹះ ឬចំណេះចំនៀងថ្មីក្នុងយុគសម័យការងារតាមបច្ចេកវិទ្យាឌីជីថល Innovation Digital ត្រូវតាមដានយកចិត្តទុកដាក់។
ជាកិច្ចបញ្ចប់កម្មវិធី ឯកឧត្តមអគ្គនាយកពន្ធនាគារ បានឧបត្ថមថវិការដល់បណ្ឌិត្យសភានគរបាលកម្ពុជាចំនួន ៤លានរៀល គ្រូបង្គោល និងគ្រូឧទ្ទេសនាម ២៨នាក់ ១នាក់ ១០មុឺនរៀល និងជូនសិក្ខាកាម ១០០នាក់ ចំនួន ៥០០ដុល្លារសម្រាប់បាយសាមគ្គី ៕
