ភ្នំពេញ៖ ក្រសួងសុខាភិបាល បានអំពាវនាវឱ្យពលរដ្ឋបញ្ឈប់ការប្រើប្រាស់ឱសថបុរាណ ឬថ្នាំបំប៉នសុខភាពដែលថាអាចព្យាបាលជំងឺទឹកនោមផ្អែមបាន ខណៈជំងឺនេះទាមទារឱ្យមានការពិគ្រោះ និងវិនិច្ឆយខ្ពស់ជាមួយគ្រូពេទ្យ។
យោងតាមសេចក្តីប្រកាសព័ត៌មានស្តីពី«ការផ្សព្វផ្សាយបំផ្លើស និងការលក់ឱសថ ផលិតផលបំប៉នសុខភាព និងឱសថបុរាណ គ្មានការអនុញ្ញាតពីក្រសួងសុខាភិបាល តាមបណ្តាញទំនាក់ទំនងសង្គម ដែលអាចព្យាបាលជំងឺទឹកនោមផ្អែម» ដែលចេញកាលពីថ្ងៃទី០៥ ខែសីហា ឆ្នាំ ២០២៤ បានឱ្យដឹងថា ការប្រកាសបដិសេធនេះធ្វើឡើងក្រោយក្រសួងសុខាភិបាលបានឃើញ មានការផ្សព្វផ្សាយពាណិជ្ជកម្ម និងលក់ឱសថ ផលិតផលបំប៉នសុខភាព និងឱសថបុរាណមួយ ចំនួនដូចជា ផលិតផល បាណាបា ផលិតផល Gymnova ផលិតផល Hypoly និងផលិតផលផ្សេងៗទៀត តាមបណ្ដាញទំនាក់ទំនងសង្គមដូចជា Facebook, TikTok… ដែលនិយាយថាអាចព្យាបាលជំងឺទឹកនោមផ្អែមជាសះស្បើយដោយមិនចាំបាច់ប្រើប្រាស់ឱសថសម័យ នោះគឺជារឿងមិនពិត។
សេចក្តីប្រកាសព័ត៌មានដដែលបន្តថា ការចេញលក់ថ្នាំបំប៉ន ឬឱសថបុរាណ ដែលអះអាងថាអាចព្យាបាលជំងឺទឹកនោមផ្អែមមានប្រសិទ្ធភាព ដោយមិនចាំបាច់ទៅព្យាបាលនៅមន្ទីរពេទ្យ ឬចាក់អាំងស៊ុយលី បានធ្វើឱ្យប្រជាពលរដ្ឋមានការយល់ច្រឡំ រហូតដល់ហ៊ានទិញផលិតផលទាំងនោះមកប្រើប្រាស់ ដោយអាចធ្វើឱ្យប៉ះពាល់ដល់សុខភាពថែមទៀតផង។ ក្នុងនោះការប្រើប្រាស់ថ្នាំទាំងនោះអាចធ្វើឱ្យអ្នកប្រើប្រាស់មិនអាចគ្រប់គ្រងកម្រិតជាតិស្ករក្នុងឈាមបានល្អ ដែលនាំឱ្យជាតិស្ករក្នុងឈាមមិនប្រក្រតី ហើយអាចបណ្តាលឱ្យសភាពជំងឺកាន់តែធ្ងន់ធ្ងរ និងមានផលវិបាកដល់អាយុជីវិតចំពោះមុខ និងរយៈពេលវែង។
ក្រសួងបន្តថា ការយឺតយ៉ាវក្នុងការទទួលបានការព្យាបាលបានត្រឹមត្រូវ ដោយការពឹងផ្អែកលើការព្យាបាលដែល គ្មានប្រសិទ្ធភាព អាចបង្កើនហានិភ័យ និងផលវិបាកជាច្រើនដូចជា នាំឱ្យមានជំងឺសរសៃប្រសាទ ជំងឺសរសៃបាតភ្នែក ជំងឺសរសៃឈាមបេះដូង និងងាយទទួលការឆ្លងមេរោគ។
ក្រសួងបានបន្ថែមថា ការខូចខាតសរីរាង្គបណ្តាលមកពីការប្រើប្រាស់ឱសថ ឬផលិតផលបំប៉នសុខភាព ឬឱសថ បុរាណគ្មានចុះបច្ឆិកា ដែលអាចមានសារធាតុប៉ះពាល់ដល់សរីរាង្គដូចជា ថ្លើម និងតម្រងនោម ជាពិសេសប្រសិនបើលេបរយៈពេលយូរ ឬក្នុងកម្រិតខ្ពស់ និងកង្វះអាហារូបត្ថម្ភ ដោយការព្យាបាលមិនសមស្របមួយចំនួនអាចពាក់ព័ន្ធនឹងការរឹតបន្តឹងរបបអាហារ ដែលអាចនាំឱ្យមានកង្វះអាហារូបត្ថម្ភ ធ្វើឱ្យការគ្រប់គ្រងជំងឺទឹកនោមផ្អែមកាន់តែមានភាពស្មុគស្មាញ។
ជាមួយគ្នានោះផងដែរ ក្រសួងសុខាភិបាលក៏អំពាវនាវឱ្យពលរដ្ឋកុំប្រើប្រាស់ថ្នាំទាំងអស់នោះ ហើយស្នើឱ្យដល់ប្រជាពលរដ្ឋ និងអ្នកជំងឺទឹកនោមផ្អែមទាំងអស់ត្រូវជួបពិគ្រោះជាមួយគ្រូពេទ្យជំនាញ ដើម្បីធ្វើរោគវិនិច្ឆយ និងធ្វើការព្យាបាលឱ្យបានត្រឹមត្រូវតាមក្បួនខ្នាតវេជ្ជសាស្ត្រនៅតាមមន្ទីរពេទ្យនិងមូលដ្ឋានសុខាភិបាលដែលនៅជិតបំផុត៕
