ក្រសួងការពារជាតិនីហ្សេរីយ៉ា បញ្ជាក់ថា ទាហាន ១៥នាក់ ត្រូវបានសម្លាប់ដោយក្រុមសកម្មប្រយុទ្ធប្រដាប់អាវុធ

បរទេស៖ កាលពីថ្ងៃអង្គារ ក្រសួងការពារជាតិនីហ្សេរីយ៉ា បានបញ្ជាក់នៅក្នុងសេចក្តីថ្លែងការណ៍មួយថា ទាហាននីហ្សេរីយ៉ា ១៥នាក់បានសម្លាប់ និង១៦នាក់ផ្សេងទៀតបានរងរបួស ខណៈដែលកំពុងប្រយុទ្ធជាមួយក្រុមសកម្មប្រយុទ្ធប្រដាប់អាវុធ។

រដ្ឋាភិបាលដឹកនាំដោយយោធាបានឲ្យដឹងថា នៅក្នុងការប្រយុទ្ធកាលពីថ្ងៃចន្ទ ក្រុមសកម្មប្រយុទ្ធប្រដាប់អាវុធចំនួន ២១នាក់ ត្រូវបានសម្លាប់នៅក្នុងការប្រយុទ្ធដែលបានកើតឡើងនៅទីតាំងចន្លោះទីប្រជុំជន Bankiare និង Tera ក្នុងតំបន់ Tillaberi។ រដ្ឋាភិបាលក៏បានបន្ថែមថា ទាហាន ០៣នាក់បានបាត់ខ្លួន។

នីហ្សេរីយ៉ា រួមទាំងម៉ាលី និងBurkina Faso ស្ថិតនៅជួរមុខនៃសមរភូមិដើម្បីទប់ស្កាត់ការគំរាមកំហែងរបស់ក្រុមជីហាដ ដែលបានកើនឡើងជាលំដាប់ចាប់តាំងពីឆ្នាំ២០១២ នៅពេលដែលពួកយុទ្ធជនពាក់ព័ន្ធនឹងអាល់កៃដាបានដណ្តើមយកផ្នែកខ្លះនៃប្រទេសម៉ាលីជាលើកដំបូង។

មនុស្សរាប់ពាន់នាក់ត្រូវបានសម្លាប់នៅក្នុងក្រុមបះបោរទាំងនោះ និងជាង៣លាននាក់ បានផ្លាស់ទីលំនៅ ដែលបង្កឲ្យមានវិបត្តិមនុស្សធម៌ដ៏ធ្ងន់ធ្ងរនៅក្នុងប្រទេសក្រីក្របំផុតមួយចំនួនរបស់ពិភពលោក។

ការខកចិត្តចំពោះការបរាជ័យរបស់អាជ្ញាធរក្នុងការការពារជនស៊ីវិលបានជំរុញ ឲ្យមានរដ្ឋប្រហារយោធានៅក្នុងប្រទេសម៉ាលី Burkina Faso និងនីហ្សេរីយ៉ា ចាប់តាំងពីឆ្នាំ២០២០។