ឯកឧត្តមរដ្ឋមន្ត្រី ប៊ិន ត្រឈៃ អញ្ជើញជួបសំណេះសំណាល និងសួរសុខទុក្ខថ្នាក់ដឹកនាំ និងមន្ត្រីរាជការនៃមន្ទីរផែនការខេត្តកែប
ភ្នំពេញ៖ នាព្រឹកថ្ងៃទី១៧ ខែកក្កដា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ អមដោយសហការីនៃក្រសួងផែនការ អញ្ជើញជួបសំណេះសំណាល និងសួរសុខទុក្ខថ្នាក់ដឹកនាំនិងមន្ត្រីរាជការ នៃមន្ទីរផែនការខេត្តកែប។ ពិធីនេះមានការអញ្ជើញចូលរួមពី ឯកឧត្តមរដ្ឋលេខាធិការ លោកអគ្គនាយករង ប្រធាននាយកដ្ឋាននៃក្រសួងផែនការ ព្រមទាំងថ្នាក់ដឹកនាំនិងមន្ត្រីរាជការគ្រប់លំដាប់ថ្នាក់នៃមន្ទីរផែនការខេត្តកែប។
ជាកិច្ចចាប់ផ្ដើម លោក គង់ សាវ៉ាត ប្រធានមន្ទីរផែនការខេត្តកែប បានឡើងថ្លែងសុន្ទរកថាស្វាគមន៍ និងរបាយការណ៍សង្ខេបគោរពជូនគណៈអធិបតី និងអង្គពិធីទាំងមូល។ លោកប្រធានមន្ទីរ បានលើកឡើងអំពី (១) ស្ថានភាពរបស់មន្ទីរនិងមន្ត្រីរាជការនៃមន្ទីរផែនការខេត្តកែប (២) លទ្ធផលការងារសំខាន់ៗ ដែលមន្ទីរផែនការខេត្តកែបសម្រេចបានក្នុងឆមាសទី១ ឆ្នាំ២០២៤ (៣) ភាពងាយស្រួលក្នុងការអនុវត្តការងារ (៤) បញ្ហាប្រឈម និង (៥) សំណូមពរ។
បន្ទាប់ពីសុន្ទរកថាស្វាគមន៍និងរបាយការណ៍សង្ខេបរបស់លោកប្រធានមន្ទីរ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បាទអញ្ជើញមានមតិសំណេះសំណាល និងសួរសុខទុក្ខថ្នាក់ដឹកនាំនិងមន្ត្រីរាជការ នៃមន្ទីរផែនការខេត្តកែប។ ឯកឧត្តមរដ្ឋមន្ត្រី បានពាំនាំនូវការផ្តាំផ្ញើសួរសុខទុក្ខពីសំណាក់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត មកដល់ថ្នាក់ដឹកនាំនិងមន្ត្រីរាជការទាំងអស់ នៃមន្ទីរផែនការខេត្តកែប។
ក្នុងឱកាសនេះដែរ ឯកឧត្តមរដ្ឋមន្ត្រី បានកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ថ្នាក់ដឹកនាំនិងមន្ត្រីរាជការនៃមន្ទីរផែនការខេត្តកែប ជាពិសេសការលើកកម្ពស់សមភាពយេនឌ័រ ដែលបានបង្ហាញឲ្យឃើញតាមរយៈចំនួនមន្ត្រីរាជការជាស្ត្រី នៅក្នុងមន្ទីរផែនការខេត្តកែប។ ជាមួយគ្នានេះ ឯកឧត្តមរដ្ឋមន្ត្រី បានលើកឡើងពីការងារអាទិភាពរបស់រាជរដ្ឋាភិបាល នីតិកាលទី៧ ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់បំផុតរបស់ សម្ដេចមហាបវរធិបតីនាយករដ្ឋមន្ត្រី ស្ដីពី “យន្តការតាមដានត្រួតពិនិត្យ និងវាយតម្លៃ”។
ឯកឧត្តមរដ្ឋមន្ត្រី បានលើកទឹកចិត្តចំពោះការបន្តកសាងសមត្ថភាពមន្ត្រី និងលើកទឹកចិត្តដល់មន្ត្រីរាជការទាំងអស់ឲ្យខិតខំដុះខាត់សមត្ថភាពផ្ទាល់ខ្លួន ដើម្បីក្លាយជា “មនុស្សស្នូល” សម្រាប់អង្គភាព ក៏ដូចជាធនធានមនុស្សដ៏មានតម្លៃសម្រាប់សង្គមជាតិ។ បន្ថែមពីនេះ ឯកឧត្តមរដ្ឋមន្ត្រី បានចែករំលែកនូវវឌ្ឍនភាព សមិទ្ធផលការងារ ដែលក្រសួងផែនការសម្រេចបាននាពេលកន្លងមក ព្រមទាំងទិសដៅការងារ និងអនុសាសន៍តម្រង់ទិសសម្រាប់ថ្នាក់ដឹកនាំនិងមន្ត្រីរាជការ នៃមន្ទីរផែនការខេត្តកែប។
មុននឹងការអញ្ជើញនិវត្តន៍ ឯកឧត្តមរដ្ឋមន្ត្រី បានអញ្ជើញជួបពិនិត្យ និងសំណេះសំណាលជាមួយមន្ត្រីរាជការនៃការិយាល័យជំនាញនានារបស់មន្ទីរ ព្រមទាំងថតរូបអនុស្សាវរីយ៍ជាមួយថ្នាក់ដឹកនាំនិងមន្ត្រីរាជការនៃមន្ទីរផែនការខេត្តកែប។ ពិធីនេះបានបញ្ចប់ ប្រកបដោយបរិយាកាសមនោរម្យ និងភាពស្និទ្ធស្នាលជាទីបំផុត ៕
