ឧបនាយករដ្ឋមន្ត្រី ហ៊ុន ម៉ានី៖ យុទ្ធនាការ «កម្ពុជាស្អាត ខ្មែរធ្វើបាន» ដែលដាក់ចេញដោយក្រសួងបរិស្ថាន នឹងទទួលបានជោគជ័យ ដូចការគ្រោងទុក
ភ្នំពេញ៖ ក្នុងឱកាសអញ្ជើញបើក “ពិព័រណ៍ផ្សព្វផ្សាយនិងចែកកូនឈើក្រោមមូលបទ «ពន្លកបៃតង» និងវេទិកាកេសរកូលជាតិលើកទី៤” នាថ្ងៃទី១០ ខែកក្កដា ឆ្នាំ២០២៤ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្រ្តីក្រសួងមុខងារសាធារណៈ បានបង្ហាញសុទិដ្ឋិនិយមចំពោះ យុទ្ធនាការ «កម្ពុជាស្អាត ខ្មែរធ្វើបាន» ដែលបានដាក់ចេញដោយក្រសួងបរិស្ថាននាពេលថ្មីៗនេះ នឹងទទួលបានជោគជ័យ ដូចការគ្រោងទុក ។
ឯកឧត្ដមឧបនាយករដ្ឋមន្ត្រីមានប្រសាសន៍ថា ការរៀបចំពិព័រណ៍ផ្សព្វផ្សាយនិងចែកកូនឈើ និង វេទិកាកេសរកូលជាតិលើកទី៤ នាពេលនេះ ក៏ជាការបង្ហាញអំពីសុឆន្ទៈ និងការប្តេជ្ញាចិត្តរបស់រាជរដ្ឋាភិបាលអាណត្តិទី៧ និងគោលនយោបាយរបស់ក្រសួងបរិស្ថាន ចំពោះការចូលរួមចំណែកយ៉ាងសកម្មក្នុងការអនុវត្ត អនុសញ្ញាសហប្រជាជាតិស្តីពីជីវៈចម្រុះ និងអនុសញ្ញាក្របខណ្ឌ សហប្រជាជាតិស្តីពីការប្រែប្រួលអាកាសធាតុ ក្នុងនាមជារដ្ឋភាគី។
ក្នុងឱកាសដ៏មានអត្ថន័យនេះ ឯកឧត្ដមបានអបអរសាទរចំពោះ ពិព័រណ៍ផ្សព្វផ្សាយនិងចែកកូនឈើក្រោមមូលបទ «ពន្លកបៃតង» និង វេទិកាកេសរកូលជាតិលើកទី៤ ដែលជាផ្នែកដ៏សំខាន់មួយនៃយុទ្ធនាការ «ដាំដើមឈើ១លានដើមយ៉ាងតិចក្នុង១ឆ្នាំ» និងសូមសំដែងការគាំទ្រពេញយ៉ាងទំហឹងចំពោះយុទ្ធសាស្ត្រចក្រាវិស័យបរិស្ថាន ឆ្នាំ២០២៣-២០២៨ ដែលបានផ្តោតការយកចិត្តទុកដាក់លើ ភាពស្អាត ភាពបៃតង និងចីរភាព ឆ្លើយតបចំពោះមុខទៅនឹង ការកាត់បន្ថយជាអតិបរមានូវការបំពុល ក្នុងខ្យល់ ក្នុងទឹក និងលើដី ជាពិសេស ការកាត់បន្ថយការប្រើប្រាស់ប្លាស្ទិក តាមរយៈ យុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» ដែលរហូតមកដល់បច្ចុប្បន្ននេះ មានសិស្សានុសិស្ស និងសាធារណជន ចំនួនជាង៨លាននាក់ បានចូលរួមក្នុងយុទ្ធនាការនេះ។
ឯកឧត្ដម ហ៊ុន ម៉ានី មានជំនឿជាក់យ៉ាងមុតមាំថា “ពិព័រណ៍ផ្សព្វផ្សាយ និងចែកកូនឈើក្រោមមូលបទ«ពន្លកបៃតង» និង វេទិកាកេសរកូលជាតិលើកទី៤” នាថ្ងៃនេះ គឺជាឱកាសដ៏ល្អសម្រាប់ឱ្យយើងទាំងអស់គ្នាស្វែងយល់បន្ថែមអំពីតម្លៃមិនអាចកាត់ថ្លៃបានរបស់ព្រៃឈើ ធនធានធម្មជាតិ ជីវៈចម្រុះ និងសេវាកម្មប្រព័ន្ធអេកូឡូស៊ី ដែលបានផ្តល់សម្រាប់ការរក្សាលំនឹងបរិស្ថាន ការធ្វើនិយ័តកម្មអាកាសធាតុ និងការរួមចំណែកលើកកម្ពស់ជីវភាពរស់នៅប្រចាំថ្ងៃ របស់ប្រជាជនកម្ពុជា។
ឯកឧត្ដមឧបនាយករដ្ឋមន្ត្រី ក៏បានយកឱកាសនេះធ្វើការអំពាវនាវ ដល់សាធារណជនទូទៅ រួមទាំង មន្រ្តីរាជការ ដៃគូអភិវឌ្ឍន៍ អង្គការសង្គមស៊ីវិល និយោជក-និយោជិត ប្រជាសហគមន៍ លោកគ្រូ អ្នកគ្រូ ប្អូនៗយុវជន និងក្មួយៗសិស្សានុសិស្សទាំងអស់ ចូលរួម «ដាំដើមឈើនិងដាំស្តារព្រៃឈើនៅកម្ពុជា» ដើម្បីថែរក្សា ការពារ និងអភិរក្សធនធានធម្មជាតិ សម្រាប់ជាផលប្រយោជន៍របស់ជាតិយើង ទាំងក្នុងពេលបច្ចុប្បន្ននិងអនាគត ៕
