ឧត្តមសេនីយ៍ទោ ឈាង ផាន់ណារ៉ា អញ្ជើញជួបសំណេះសំណាលសួរសុខទុក្ខជាមួយអតីតមន្រ្តីនគរបាលជាតិកម្ពុជា ចូលនិវត្តន៍ចំនួន ១៦នាក់

ភ្នំពេញ៖ នារសៀលថ្ងៃសុក្រ ១៤រោច ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៥ ខែកក្កដា ឆ្នាំ២០២៤ លោកឧត្តមសេនីយ៍ទោ ឈាង ផាន់ណារ៉ា ស្នងការ នៃស្នងការដ្ឋាននគរបាលខេត្តតាកែវ និងជាប្រធានគណៈកម្មាធិការមូលដ្ឋានសមាគមមិត្តនគរបាលខេត្ត បានអញ្ជើញជួបសំណេះសំណាលសួរសុខទុក្ខជាមួយអតីតមន្រ្តីនគរបាលជាតិកម្ពុជា ចូលនិវត្តន៍ចំនួន ១៦នាក់ និងបើកប្រាក់គោលនយោបាយចំនួន ១៥៤,៦១២,៥០០រៀល (មួយរយហាសិបបួនលានប្រាំមួយសែនមួយម៉ឺនពីពាន់ប្រាំរយរៀល) និងបានប្រគល់ថវិកាសមាគមមិត្តនគរបាលជាតិកម្ពុជា ចំនួន ០៣គ្រួសារ ស្មើនឹងទឹកប្រាក់ចំនួន ១៨,០០០,០០០រៀល (ដប់ប្រាំបីលានរៀល) ដោយមានការចូលរួមពីលោកឧត្តមសេនីយ៍ លោកវរសេនីយ៍ ស្នងការរង លោកនាយ នាយរងការិយាល័យជំនាញពាក់ព័ន្ធ និងក្រុមការងារ នៃស្នងការដ្ឋាននគរបាលខេត្ត។

សូមជម្រាបថា៖ ថវិកាដែលត្រូវប្រគល់ជូនគ្រួសារសពមានឈ្មោះដូចខាងក្រោម៖

គ្រួសារទី១៖ ទទួលបានថវិកាចំនួន ៦,០០០,០០០រៀល (ប្រាំមួយលានរៀល) ជូនដល់លោកស្រី វង់ សាវ៉ន ត្រូវជាកូនបង្កើតសព លោក វង់ ឈៀក អតីតមន្រ្តីនគរបាលចូលនិវត្តន៍ អធិការដ្ឋាននគរបាលស្រុកទ្រាំងខេត្តតាកែវ នៃស្នងការដ្ឋាននគរបាលខេត្តតាកែវ មរណៈភាពកាលពីថ្ងៃទី១៩ ខែមីនា ឆ្នាំ២០២៤ ដោយជំងឺ (ដាច់សរសៃឈាមក្រពះ) ស្ថិតនៅភូមិអង្គប្រាង្គ ឃុំសន្លុង ស្រុកទ្រាំង ខេត្តតាកែវ។

គ្រួសារទី២៖ ទទួលបានថវិកាចំនួន ៦,០០០,០០០រៀល (ប្រាំមួយលានរៀល) ជូនដល់លោកស្រី មាស មុំ ត្រូវជាភរិយាសពលោក នួន សៀន អតីតមន្រ្តីនគរបាលចូលនិវត្តន៍ អធិការដ្ឋាននគរបាលស្រុកទ្រាំង ខេត្តតាកែវ នៃស្នងការដ្ឋាននគរបាលខេត្តតាកែវ មរណៈភាពកាលពីថ្ងៃទី១២ ខែមីនា ឆ្នាំ២០២៤ ដោយជំងឺ (ទឹកនោមផ្អែម) ស្ថិតនៅភូមិអង្គរការ ឃុំអង្កាញ់ ស្រុកទ្រាំង ខេត្តតាកែវ។

គ្រួសារទី៣៖ ទទួលបានថវិកាចំនួន ៦,០០០,០០០រៀល (ប្រាំមួយលានរៀល) ជូនដល់លោកស្រី ភឹម ចាន់ភារុន ត្រូវជាកូនបង្កើតសពលោក ភឹម ចាន់សាវ៉េត អតីតមន្រ្តីនគរបាលជាតិ ចូលនិវត្តន៍ អធិការដ្ឋាននគរបាលក្រុងដូនកែវ ខេត្តតាកែវ នៃស្នងការដ្ឋាននគរបាលខេត្តតាកែវ មរណៈភាពកាលពីថ្ងៃទី២៣ ខែកុម្ភៈ ឆ្នាំ២០២៤ ដោយជំងឺ (លើសឈាម និងទឹកនោមផ្អែម) ស្ថិតនៅភូមិចុងថ្នល់ សង្កាត់បារាយណ៍ ក្រុងដូនកែវ ខេត្តតាកែវ។

ថ្លែងក្នុងឱកាសជួបសំណេះសំណាលនោះលោកឧត្តមសេនីយ៍ទោ ស្នងការ បានសំដែងនូវមនោសញ្ជេតនា ការអាឡោះអាល័យ សោកស្តាយជាពន់ពេក ចំពោះការបាត់បង់ស្វាមី ភរិយា ឪពុក ម្តាយ ដ៏ល្អដែលបានបម្រើប្រទេសជាតិ មាតុភូមិកន្លងមកមានស្នាដៃ និងបានពាំនាំនូវប្រសាសន៍ផ្ដាំផ្ញើចូលរួមរំលែកទុក្ខ ពីសំណាក់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានកិត្តិយសសមាគមមិត្តនគរបាលជាតិកម្ពុជា និងឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងជាប្រធានគណៈកម្មាធិការកណ្ដាលសមាគមមិត្តនគរបាលជាតិកម្ពុជាផងដែរ ៕