ឯកឧត្តម ថង សាវុន ដឹកនាំកិច្ចប្រជុំស្ដីពី វឌ្ឍនភាពការងារប្រចាំឆមាស ឆ្នាំ២០២៤ របស់សហភាពសហព័ន្ធយុវជនកម្ពុជា ខេត្តមណ្ឌលគិរី
ភ្នំពេញ៖ នារសៀលថ្ងៃទី២៧ ខែមិថុនា ឆ្នាំ២០២៤ ឯកឧត្តម ថង សាវុន អភិបាលនៃគណៈអភិបាលខេត្តមណ្ឌលគិរី និងជាសមាជិកអចិន្ត្រៃយ៍នៃគណៈកម្មាធិការកណ្តាល ស.ស.យ.ក ទទួលបន្ទុក ខេត្តមណ្ឌលគិរី និងរតនគិរី បានអញ្ជើញដឹកនាំកិច្ចប្រជុំ ស្ដីពី វឌ្ឍនភាពការងារប្រចាំឆមាស ឆ្នាំ២០២៤ របស់ សហភាពសហព័ន្ធយុវជនកម្ពុជា ខេត្តមណ្ឌលគិរី ដោយមានការចូលរួមពី លោក ឈឹម កាន ប្រធាន ស.ស.យ.កខេត្ដ ព្រមទាំង ប្រធាន អនុប្រធាន ស.ស.យ.ក ក្រុង/ស្រុក ទាំង០៥ និង សមាជិក សមាជិកា ស.ស.យ.ក ពិធីបានប្រព្រឹត្តទៅនៅសាលប្រជុំ ស.ស.យ.ក ខេត្ត។
ក្នុងឱកាសនោះ ឯកឧត្តម ថង សាវុន បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់សមាជិកអចិន្ត្រៃយ៍គណៈកម្មាធិការកណ្ដាលគ្រប់រូប រួមទាំងសមាជិក សមាជិកា ស.ស.យ.ក ទាំងអស់ ដែលបានលះបង់កម្លាំងកាយ ចិត្ត ប្រាជ្ញា ស្មារតី ពេលវេលា និងធនធានផ្ទាល់ខ្លួន ក្នុងការបំពេញតួនាទីភារកិច្ចយ៉ាងសកម្ម ប្រកបដោយស្មារតីទទួលខុសត្រូវ និងទឹកចិត្តស្រឡាញ់ជាតិមាតុភូមិ ព្រមទាំង សម្រេចបាននូវសមិទ្ធផលថ្មីៗជាច្រើនគួរជាទីមោទនៈ។
ឯកឧត្តមបានលើកឡើងថា ស.ស.យ.ក. បោះជំហានទៅមុខ យ៉ាងមោះមុតស្វាហាប់ បំពេញភារកិច្ចកាន់តែស៊ីជម្រៅ និងទូលំទូលាយ ប្រកបដោយស្មារតី ទទួលខុសត្រូវ ដោយបានផ្តួចផ្តើមគំនិតដឹកនាំ និងធ្វើសកម្មភាពគាំទ្រជាប់ ជាប្រចាំដល់យុវជនឱ្យមានលក្ខណៈសម្បត្តិជាវិជ្ជមានដល់សង្គម ដោយបន្តប្ដេជ្ញាជំរុញការអនុវត្តភាគ សកម្មភាពនានាក្នុង «ផែនការយុទ្ធសាស្ត្រ យុវជនក្នុងបុព្វហេតុជាតិមាតុភូមិ ២០២៣-២០២៨» លទ្ធផលជាក់ស្ដែងកាន់តែច្រើនថែមទៀតសម្រាប់យុវជន និងជាតិមាតុភូមិកម្ពុជា។
បើតាមលោក ឈឹម កាន ប្រធាន ស.ស.យ.ក ខេត្ដ បានឲ្យដឹងថា វឌ្ឍនភាពការងារប្រចាំឆមាស ឆ្នាំ២០២៤ សកម្មភាពការងារសង្គម និង មនុស្សធម៌ របស់សមាជិក សមាជិកា ស.ស.យ.កខេត្ដ និងមន្ទីរវិស័យ ក្រុង/ស្រុក០៥ រួមជាមួយសប្បុរសជន ចុះផ្ដល់អំណាយ ចុះសួរសុខទុក្ខជនចាស់ជរាគ្មានទីពឹង ស្រី្តមេម៉ាយទីទ័លក្រ អ្នកជំងឺ កុមារកំព្រា ជនរងគ្រោះផ្សេងៗ ចូលរួមរំលែកទុក្ខសពក្នុងទូទាំងខេត្ត សរុបចំនួន ១២លើក ស្មើនឹង ៦៧គ្រួសារ ប្រើប្រាស់អស់ថវិកា ៩.១៣០.០០០រៀល ឃីតចំនួន ៥៧កញ្ចប់ គ្រឿងឧបភោគបរិភោគ និងបរិច្ចាគឈាមចំនួន ០៣កំប្លោក និងសកម្មភាពការងារជាច្រើនទៀត ៕
