រដ្ឋមន្ត្រីអប់រំ ដឹកនាំប្រជុំស្តីពី ការត្រៀមរៀបចំពិធីប្រគល់សញ្ញាបត្រជូនគរុសិស្សជំនាន់ទី៣១ និងគរុនិស្សិតជំនាន់ទី២ និងសម្ពោធដាក់ឱ្យប្រើប្រាស់អគារអន្តេវាសិកដ្ឋានគ្រូ នៅវិទ្យាស្ថានគរុកោសល្យរាជធានីភ្នំពេញ

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៦ ខែមិថុនា ឆ្នាំ២០២៤ បានដឹកនាំកិច្ចប្រជុំស្តីពី ការត្រៀមរៀបចំពិធីប្រគល់សញ្ញាបត្រជូនគរុសិស្សជំនាន់ទី៣១ និងគរុនិស្សិតជំនាន់ទី២ និងសម្ពោធដាក់ឱ្យប្រើប្រាស់អគារអន្តេវាសិកដ្ឋានគ្រូ នៅវិទ្យាស្ថានគរុកោសល្យរាជធានីភ្នំពេញ ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំ មន្ត្រីពាក់ព័ន្ធក្រោមឱវាទ នាយក នាយករងវិទ្យាស្ថានគរុកោសល្យរាជធានីភ្នំពេញ សរុបប្រមាណ២៨នាក់។

ពិធីប្រគល់សញ្ញាបត្រ និងពិធីសម្ពោធដាក់ឱ្យប្រើប្រាស់អគារអន្តេវាសិកដ្ឋានគ្រូ គ្រោងនឹងប្រារព្ធឡើងនៅព្រឹកថ្ងៃទី៤ ខែកក្កដា ឆ្នាំ២០២៤ ខាងមុខនេះ នៅវិទ្យាស្ថានគរុកោសល្យរាជធានីភ្នំពេញ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដោយក្នុងឱកាសនោះផងដែរ ក៏មានការដាក់តាំងបង្ហាញនូវស្នាដៃរបស់សិស្សនិស្សិត និងសមិទ្ធផលនានាផងដែរ។

ដើម្បីឱ្យកម្មវិធីប្រព្រឹត្តទៅដោយរលូន ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានណែនាំក្រុមការងារ សូមឱ្យយកចិត្តទុកដាក់លើការរៀបចំការតាំងពិព័រណ៌ ពិនិត្យទីកន្លែងឱ្យបានច្បាស់លាស់ ក៏ដូចជាសម្រាំងការដាក់បង្ហាញសមិទ្ធផលសំខាន់ៗ ស្របតាមទីតាំងជាក់ស្តែង ដូចជាការដាក់បង្ហាញអំពីសៀវភៅទាក់ទងនឹងអំណានដំបូង និងគណិតវិទ្យាថ្នាក់ដំបូង រួមទាំងសម្ភារៈឧបទេសផ្សេងៗសម្រាប់ការរៀននិងបង្រៀន ក៏ដូចជាការបង្ហាញពីស្នាដៃសិស្សនិស្សិតជាដើម និងធ្វើរបាយការណ៍បង្ហាញពាក់ព័ន្ធពីការធ្វើកំណែទម្រង់គ្រឹះស្ថានបណ្តុះបណ្តាលគ្រូ ការដាក់អនុវត្តនូវកញ្ចប់អំណានដំបូង និងកញ្ចប់គណិតថ្នាក់ដំបូង បង្ហាញពីការផ្លាស់ប្តូរវិធីសាស្ត្របង្រៀន ពោលគឺវិធីសាស្ត្របង្រៀនសាលាជំនាន់ថ្មី រៀបចំសៀវភៅលំអិតអំពីកំណែទម្រង់គ្រឹះស្ថានបណ្តុះបណ្តាលគ្រូ យុទ្ធសាស្ត្រកំណែទម្រង់សាលាគរុកោសល្យ និងសមិទ្ធផលផ្សេងៗ ក៏ដូចជា ការជួសជុល សាងសង់ ឬកែលម្អអគារនាពេលកន្លងមកនេះ។

គួរបញ្ជាក់ផងដែរថា កម្មវិធីនេះត្រូវបានរៀបចំឡើងក្នុងគោលបំណងលើកទឹកចិត្តទៅដល់គរុនិស្សិតទាំងអស់ ទាំងគរុនិស្សិតជ័យលាភី ទាំងគរុនិស្សិតកំពុងសិក្សា ក៏ដូចជាគណៈគ្រប់គ្រង លោកគ្រូអ្នកគ្រូឧទ្ទេស និងបុគ្គលិកអប់រំ នៃវិទ្យាស្ថានគរុកោសល្យរាជធានីភ្នំពេញ ដែលបានរួមគ្នាបណ្ដុះបណ្ដាលធនធានមនុស្ស ជាពិសេសធនធានគ្រូបង្រៀនដែលជាកត្តាដ៏សំខាន់មិនអាចខ្វះបានក្នុងការកសាងមូលធនមនុស្សសម្រាប់ការអភិវឌ្ឍប្រទេសជាតិ ស្របតាមយុទ្ធសាស្ត្របញ្ចកោណ ដំណាក់កាលទី១របស់រាជរដ្ឋាភិបាល៕