ឯកឧត្តមរដ្ឋមន្ត្រី ថោ ជេដ្ឋា នឹងដឹកនាំគណៈប្រតិភូជាន់ខ្ពស់ អញ្ជើញបំពេញទស្សនកិច្ចផ្លូវការទៅកាន់សាធារណរដ្ឋសិង្ហបុរី

ភ្នំពេញ៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នឹងដឹកនាំគណៈប្រតិភូជាន់ខ្ពស់ អញ្ជើញបំពេញទស្សនកិច្ចផ្លូវការទៅកាន់សាធារណរដ្ឋសិង្ហបុរី នៅថ្ងៃទី១៨-២០ ខែមិថុនា ឆ្នាំ២០២៤ តបតាមការអញ្ជើញរបស់សមភាគីសិង្ហបុរី។

ឯកឧត្តមរដ្ឋមន្ត្រី នឹងអញ្ជើញចូលរួមក្នុងកម្មវិធីសប្តាហ៍ទឹកអន្តរជាតិសិង្ហបុរីលើកទី១០ ដែលប្រព្រឹត្ត ទៅចាប់ពីថ្ងៃទី១៨ ដល់ថ្ងៃទី២២ ខែមិថុនា ឆ្នាំ២០២៤ នៅមជ្ឈមណ្ឌលពិព័រណ៍និងសន្និបាត Marina Bay Sands ក្នុងប្រទេសសិង្ហបុរី រួមជាមួយនឹងកម្មវិធី CleanEnviro Summit Singapore ដែលរៀបចំដោយ ទីភ្នាក់ងារបរិស្ថានជាតិរបស់ប្រទេសសិង្ហបុរី។

កម្មវិធីសប្តាហ៍ទឹកអន្តរជាតិសិង្ហបុរីជាវេទិកាមួយក្នុងចំណោមវេទិកាសំខាន់ៗរបស់ពិភពលោក ដើម្បី ចែករំលែក និងសហការបង្កើតដំណោះស្រាយទឹក ឆ្នេរសមុទ្រ និងទឹកជំនន់ប្រកបដោយភាពច្នៃប្រឌិត។ កម្មវិធីសប្តាហ៍ទឹកអន្តរជាតិសិង្ហបុរី ប្រព្រឹត្តទៅក្នុងរយៈពេលពីរឆ្នាំម្តង ហើយនៅឆ្នាំ២០២៤ កម្មវិធីសប្តាហ៍ ទឹកអន្តរជាតិសិង្ហបុរី នឹងបន្តការចែករំលែកបទពិសោធន៍ និងការយល់ដឹងនៅក្នុងចំណោមថ្នាក់ដឹកនាំ និងអ្នកជំនាញ។

ក្នុងឱកាសនោះ ឯកឧត្តមរដ្ឋមន្ត្រី ក៏នឹងជួបពិភាក្សាទ្វេភាគីជាមួយលោកជំទាវ Grace Fu Hai Yien រដ្ឋមន្ត្រីក្រសួងបរិស្ថាន និងចីរភាព នៃប្រទេសសិង្ហបុរី ៕