តុលាការថៃ នឹងបើកសវនាការលើសំណុំរឿងដកតំណែងនាយករដ្ឋមន្ត្រី សេដ្ឋា នៅថ្ងៃ១៨ មិថុនា
បាងកក៖ តុលាការធម្មនុញ្ញរបស់ប្រទេសថៃ បានបញ្ជាក់នៅថ្ងៃពុធទី១២ ខែមិថុនានេះថា នៅថ្ងៃទី១៨ ខែមិថុនាខាងមុខ ខ្លួននឹងបើកសវនាការលើសំណុំរឿងដែលអាចឈានទៅដល់ការបណ្តេញនាយករដ្ឋមន្ត្រី លោក សេដ្ឋា ថាវីស៊ីន ចេញពីតំណែងពាក់ព័ន្ធនឹងការតែងតាំងគណៈរដ្ឋមន្ត្រី ដែលត្រូវបានចោទប្រកាន់ថា បានបំពានរដ្ឋធម្មនុញ្ញ។
សំណុំរឿងប្រឆាំងនឹងលោក សេដ្ឋា ត្រូវបានចាប់ផ្តើមបន្ទាប់ពីមានបណ្តឹងរបស់សមាជិកព្រឹទ្ធសភាយោធាចំនួន៤០នាក់ កាលពីខែឧសភា ត្រូវបានទទួលយកដោយតុលាការធម្មនុញ្ញ។ តុលាការធម្មនុញ្ញនៅថ្ងៃពុធ ក៏បានកំណត់ថ្ងៃទី១៨ ខែមិថុនា ដើម្បីបើកសវនាការលើសំណុំរឿង ស្វែងរកការរំសាយគណបក្សចលនាឆ្ពោះទៅមុខ។ សវនាការនេះ គឺជាផ្នែកមួយនៃសំណុំរឿងតុលាការដ៏រសើបចំនួនបី ដែលបានបង្កើនភាពមិនច្បាស់លាស់ផ្នែកនយោបាយនៅក្នុងប្រទេសមានសេដ្ឋកិច្ចធំទីពីររបស់អាស៊ីអាគ្នេយ៍មួយនេះ។
គួរបញ្ជាក់ថា ចៅក្រមតុលាការធម្មនុញ្ញចំនួន៦រូបក្នុងចំណោម៩រូប បានទទួលយកញត្តិពីសមាជិកព្រឹទ្ធសភាចំនួន៤០រូប ដែលបានចោទប្រកាន់លោក សេដ្ឋា ថាបានបំពានក្រមសីលធម៌នយោបាយ ដោយតែងតាំង លោក ភីឈីត ឈឿនបាន (Pichit Chuenban) ជារដ្ឋមន្ត្រីទីស្តីការគណៈរដ្ឋមន្ត្រី ខណៈរូបលោកធ្លាប់ត្រូវបានផ្តន្ទាទោសពីមុន ពីបទមើលងាយតុលាការ។ តុលាការមិនបានព្យួរឈ្មោះ នាយករដ្ឋមន្ត្រីពីការបំពេញតួនាទីរបស់ខ្លួននោះទេ ប៉ុន្តែបានទាមទារការពន្យល់ជាលាយលក្ខណ៍អក្សរ។ លោក សេដ្ឋា បានចូលប្រឡូកនយោបាយក្នុងការបោះឆ្នោតសកលនៅខែឧសភា ឆ្នាំ២០២៣ ក្នុងនាមជាបេក្ខភាពនាយករដ្ឋមន្ត្រីម្នាក់របស់គណបក្សភឿថៃ។
ប្រសិនបើត្រូវបានដកចេញពីតំណែង នោះសភាត្រូវបោះឆ្នោតជ្រើសរើសនាយករដ្ឋមន្ត្រីថ្មី ពីបេក្ខជននាយករដ្ឋមន្ត្រី ដែលស្នើឡើងក្នុងការបោះឆ្នោតចុងក្រោយ ដោយគណបក្សនយោបាយ ដែលមានសមាជិកសភាយ៉ាងតិច២៥រូប៕
