ស្ថាប័នផ្សព្វផ្សាយអប់រំកម្ពុជា ចុះ MOU ជាមួយក្រុមហ៊ុន Smart Axiata ដើម្បីបើកទំព័រថ្មី រួមចំណែកអភិវឌ្ឍ និងលើកកម្ពស់វិស័យអប់រំនៅកម្ពុជា

ភ្នំពេញ៖ នាថ្ងៃទី៧ ខែមិថុនា ឆ្នាំ២០២៤ ស្ថាប័នផ្សព្វផ្សាយអប់រំកម្ពុជា (EBC) និងក្រុមហ៊ុនស្មាត អាស្យតា ខូ អិលធីឌី (Smart Axiata Co., Ltd.) បានរៀបចំពិធីចុះហត្ថលេខាលើអនុស្សរណៈនៃការយោគយល់គ្នាក្រោមអធិបតីភាព លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា និង ឯកឧត្ដម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ ព្រមទាំងថ្នាក់ដឹកនាំ និងមន្ត្រីដែលអញ្ជើញមកពី ក្រសួងអប់រំ យុវជន និងកីឡា ក្រសួងប្រៃសណីយ៍ និងទូរគមនាគមន៍ ក្រុមហ៊ុន ស្មាត បណ្ឌិត្យសភាបច្ចេកវិទ្យាឌីជីថលកម្ពុជា វិទ្យាស្ថានគរុកោសល្យរាជធានីភ្នំពេញ មន្ទីរអប់រំ យុវជន និងកីឡា ខេត្តកណ្តាល ស្ថាប័នផ្សព្វផ្សាយអប់រំកម្ពុជា (EBC) និងថ្នាក់ដឹកនាំ លោកគ្រូ អ្នកគ្រូ និងប្អូនៗសិស្សានុសិស្សនៃវិទ្យាល័យហ៊ុន សែន សេរីភាព សរុប ៨០ រូប។

ពិធីចុះអនុស្សរណៈនាថ្ងៃនេះ គឺដើម្បីបើកទំព័រថ្មីនៃកិច្ចសហប្រតិបត្តិការរវាងស្ថាប័នទាំងពីរ ធ្វើឡើងដើម្បីរួមចំនែកក្នុងការចូលរួមអភិវឌ្ឍ និងលើកកម្ពស់វិស័យអប់រំនៅកម្ពុជា ដោយប្រើប្រាស់បច្ចេកវិទ្យាឌីជីថល ដែលត្រូវការយ៉ាងចាំបាច់នូវប្រព័ន្ធអ៊ីនធឺណិត ដែលនឹងអនុញ្ញាតអោយសិស្សានុសិស្ស លោកគ្រូ អ្នកគ្រូអាចអភិវឌ្ឍ និងសិក្សាបន្ថែមអំពីរបៀបបង្រៀន និងរៀនដោយប្រើប្រាស់បច្ចេកវិទ្យាឌីជីថល។

ភាគីទាំងពីរបានព្រមព្រៀងគ្នាលើគម្រោងផ្ដល់ទិន្នន័យអ៊ីនធឺណិតរបស់ក្រុមហ៊ុន Smart Axiata Co., Ltd. សម្រាប់ការប្រើប្រាស់ថ្នាល និងមាតិកាឌីជីថលរបស់ EBC ដែលមានភាពបត់បែន និងផ្ដល់ឱកាសឱ្យសិស្សានុសិស្ស គ្រូបង្រៀន មន្ត្រីរាជការ និងប្រជាពលរដ្ឋ អាចបង្កើនបទពិសោធន៍ និងភាពពេញចិត្តក្នុងការសិក្សាស្រាវជ្រាវ ក៏ដូចជាពង្រឹងគុណភាពវិស័យអប់រំផងដែរ។

ជាចុងបញ្ចប់ ស្ថាប័នផ្សព្វផ្សាយអប់រំកម្ពុជា (EBC) និងក្រុមហ៊ុន ស្មាត អាស្យតា ខូ អិលធីឌី (Smart Axiata Co Ltd) បានប្តេជ្ញាបន្តសហការឱ្យកាន់តែល្អប្រសើរឡើង ព្រមទាំងផ្តល់ការគាំទ្រ និងលើកទឹកចិត្តឱ្យក្រុមការងារបច្ចេកទេស នៃស្ថាប័នទាំងពីរបំពេញការងារក្នុងក្របខ័ណ្ឌ នៃកិច្ចសហប្រតិបត្តិការដូចមានកំណត់ ក្នុងអនុស្សរណៈនៃការយោគយល់គ្នា ដែលត្រូវបានចុះហត្ថលេខានាថ្ងៃនេះ៕