សម្តេចធិបតី វាយតម្លៃខ្ពស់ចំពោះកិច្ចប្រឹងប្រែងរបស់អគ្គមហាឧបាសិកាធម្មបណ្ឌិត ញឹក ប៊ុនថា ដែលលះបង់កម្លាំងកាយចិត្ត កសាងមជ្ឈមណ្ឌលវប្បធម៌ព្រះពុទ្ធសាសនា
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍សម្តែងក្តីសោមនស្ស និងវាយតម្លៃខ្ពស់ ចំពោះកិច្ចប្រឹងប្រែងរបស់អ្នកឧកញ៉ាអគ្គមហាឧបាសិកាធម្មបណ្ឌិត ញ៉ឹក ប៊ុនថា ដែលបានលះបង់កម្លាំងកាយចិត្ត និងបញ្ញាញាណ កសាងមជ្ឈមណ្ឌលវប្បធម៌ព្រះពុទ្ធសាសនា។
ក្នុងពិធីសម្ពោធឆ្លង «ធម្មចេតិយទី១ តម្កល់ ព្រះត្រៃបិដកចម្លាក់ថ្មម៉ាប ១,១៧០ផ្ទាំង ផ្លូវបេតុង ៩ខ្សែ និងសមិទ្ធផលនានា ក្នុងមជ្ឈមណ្ឌលវប្បធម៌ព្រះពុទ្ធសាសនាកម្ពុជា» ស្ថិតនៅឧទ្យានជាតិព្រះសុរាម្រិត-កុសមៈ «គិរីរម្យ» នាព្រឹកថ្ងៃទី៣០ ខែឧសភា ឆ្នាំ២០២៤នេះ សម្តេចធិបតី ហ៊ុន ម៉ាណែត បានថ្លែងអំណរគុណប្រជាពលរដ្ឋនៅក្នុងខេត្តកំពង់ស្ពឺ ដែលតែងផ្តល់ជំនឿចិត្តចំពោះការដឹកនាំរបស់គណបក្សប្រជាជនកម្ពុជា ហើយតែងបោះឆ្នោតគាំទ្របក្សប្រជាជនកម្ពុជាឱ្យដឹកនាំប្រទេស។
ក្នុងឱកាសនោះ សម្តេចធិបតី ហ៊ុន ម៉ាណែត បានថ្លែងថា សមិទ្ធផលមជ្ឈមណ្ឌលវប្បធម៌ព្រះពុទ្ធសាសនា មិនត្រឹមជួយលើកកម្ពស់ការគោរពប្រណិប័តន៍ផ្នែកព្រះពុទ្ធសាសនាប៉ុណ្ណោះទេ តែក៏បានក្លាយទៅជាកន្លែងសម្រាប់ការទាក់ទាញអ្នកទេសចរផងដែរ។
សម្តេចធិបតី នាយករដ្ឋមន្ត្រី បានថ្លែងបន្តថា បើគ្មានសុខសន្តិភាព គឺមិនអាចផ្តល់ឱកាសក្នុងការកសាងសមិទ្ធផលផ្នែកសាសនា និងផ្តល់សិទ្ធិសេរីភាពសម្រាប់ប្រជាពលរដ្ឋគោរពប្រណីប័តន៍ផ្នែកសាសនា។
សម្តេចធិបតី ហ៊ុន ម៉ាណែត បានគូសបញ្ជាក់ថា មូលដ្ឋានធំរបស់រាជរដ្ឋាភិបាល គឺការធ្វើបុណ្យ។ ធ្វើបុណ្យធំបំផុតដំបូងគេ គឺការរំដោះប្រជាពលរដ្ឋចេញពីរបបប្រល័យពូជសាសន៍ និងការជួយដល់ប្រជាពលរដ្ឋ ៕
