ឯកឧត្ដម សួស ប្រាថ្នា ណែនាំឲ្យរដ្ឋបាលរាជធានី ខេត្ត និងមន្រ្តីពាក់ព័ន្ធ អនុវត្តកិច្ចការសំខាន់ៗមួយចំនួន ដើម្បីត្រៀមអន្តរាគមន៍ គាំទ្រដល់រដ្ឋបាលរាជធានី ខេត្ត ក្នុងការរៀបចំពិធីប្រកាសចូលកាន់តំណែងរបស់ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤

ភ្នំពេញ៖ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាលក្រសួងមហាផ្ទៃ នាថ្ងៃទី២៧ ខែឧសភា ឆ្នាំ២០២៤ បានអញ្ជើញជាអធិបតីបើកកិច្ចប្រជុំស្តីពីការផ្សព្វផ្សាយកិច្ចការត្រៀមចូលកាន់តំណែង ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤
នៅទីស្តីការក្រសួងមហាផ្ទៃ ។

ក្នុងឱកាសនោះដែត ដើម្បីត្រៀមអន្តរាគមន៍ គាំទ្រដល់រដ្ឋបាលរាជធានី ខេត្ត ក្នុងការរៀបចំពិធីប្រកាសចូលកាន់តំណែងរបស់ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ នាពេលដ៏ខ្លីខាងមុខ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានធ្វើការណែនាំដល់រដ្ឋបាលរាជធានី ខេត្ត និងមន្រ្តីជំនាញពាក់ព័ន្ធ អនុវត្តនូវកិច្ចការសំខាន់ៗមួយចំនួន ដូចខាងក្រោម៖

-ត្រៀមរៀបចំ និងសម្របសម្រួលជាមួយប្រធានក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត ដើម្បីអញ្ជើញជាអធិបតីក្នុងពិធីប្រកាសចូលកាន់តំណែងក្រុមប្រឹក្សាអាណត្តិទី៤ ឲ្យបានចប់សព្វគ្រប់ យ៉ាងយូរ១៤ថ្ងៃ បន្ទាប់ពីថ្ងៃប្រកាសលទ្ធផលជាផ្លូវការរបស់គ.ជ.ប

-ទន្ទឹមគ្នានេះ រដ្ឋបាលរាជធានី ខេត្ត ត្រូវចាត់ចែង រៀបចំសមាសភាពគណៈអធិបតី និងសម្របសម្រួលជាមួយរដ្ឋបាលក្រុង​ ស្រុក ខណ្ឌ ដើម្បីចុះប្រកាសចូលកាន់តំណែងរបស់ក្រុមប្រឹក្សាក្រុង ស្រុក ខណ្ឌ ឲ្យបានចប់សព្វគ្រប់យ៉ាងយូរ១៤ថ្ងៃ បន្ទាប់ពីថ្ងៃប្រកាសលទ្ធផលជាផ្លូវការរបស់គ.ជ.ប

-បន្ទាប់ពីថ្ងៃប្រកាសចូលកាន់តំណែងក្រុមប្រឹក្សា អាណត្តិទី៤ ក្រុមប្រឹក្សារាជធានី ខេត្ត ក្រុង ស្រុក ខណ្ឌ ត្រូវរៀបចំកិច្ចប្រជុំសាមញ្ញលើកទី១របស់ខ្លួន ដែលត្រូវប្រារព្ធធ្វើឡើងមិនឲ្យហួសពី១៥ថ្ងៃ ។

-ក្រុមប្រឹក្សារាជធានី ខេត្ត ក្រុង ស្រុក ខណ្ឌ ត្រូវរៀបចំកិច្ចប្រជុំសាមញ្ញលើកទី២ ដើម្បីអនុម័ត បទបញ្ជាផ្ទៃក្នុងរបស់ខ្លួន ស្របតាមសេចក្តីណែនាំរបស់ក្រសួងមហាផ្ទៃ មិនឲ្យមុន២៥ថ្ងៃ និងមិនឲ្យលើស៣៥ថ្ងៃ បន្ទាប់ពីកិច្ចប្រជុំសាមញ្ញលើកទី១ ។

-កិច្ចប្រជុំបន្ទាប់ ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ត្រូវរៀបចំកសាងផែនការអភិវឌ្ឍរយៈពេល៥ឆ្នាំ និងកម្មវិធីវិនិយោគ៣ឆ្នាំរំកិលរបស់ខ្លួន ឲ្យបានគ្រប់ជ្រុងជ្រោយ ស្របតាមស្មារតីនៃអនុក្រឹត្យ​លេខ២១៩ អនក្រ.បក ចុះថ្ងៃទី១៤ ខែធ្នូ ឆ្នាំ២០០៩ ស្តីពី ផែនការអភិវឌ្ឍ និងកម្មវិធី វិនិយោគ៣ឆ្នាំរំកិលរបស់រដ្ឋបាលរាជធានី ខេត្ត ក្រុង ស្រុក ខណ្ឌ ។

ជាមួយគ្នានោះឯកឧត្ដម សួស ប្រាថ្នា ក៏បានអរគុណសារជាថ្មីម្តងទៀតចំពោះការខិតខំប្រឹងប្រែងរបស់ឯកឧត្តម លោកជំទាវ លោក លោកស្រី មន្រ្តីរាជការ និងបុគ្គលិកទាំងអស់ក្នុងការអនុវត្តតួនាទី ភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ ៕