សូមបង្កើនការប្រុងប្រយ័ត្ន! ភ្លៀងធ្លាក់មួយមេលាយឡំ ជាមួយខ្យល់កន្ត្រាក់ និងផ្គរ រន្ទះ ឆក់យកជីវិតមនុស្សម្នាក់

ភ្នំពេញ៖ ឃុំល្វា​​ និងឃុំក្តុលតាហែន ក្នុងខេត្តបាត់ដំបង កាលពីថ្ងៃទី១២ ខែឧសភា ឆ្នាំ២០២៤ មានភ្លៀងធ្លាក់មួយមេលាយឡំជាមួយខ្យល់កន្ត្រាក់ និងផ្គរ រន្ទះ ធ្វើឱ្យមនុស្សម្នាក់ស្លាប់។

សមត្ថកិច្ចបានបញ្ជាក់ថា ឃុំចំនួន២ដែលរងគ្រោះដោយខ្យល់កន្ត្រាក់ ផ្គរ ន្ទះ ក្នុងនោះមាន ឃុំល្វា រន្ទះបាញ់ស្លាប់មនុស្សម្នាក់ឈ្មោះ ផា ណារ៉ាំង ភេទប្រុស អាយុ៤៨ឆ្នាំ រស់នៅភូមិតានី ឃុំល្វា ស្រុកបវេល ខេត្តបាត់ដំបង និងឃុំក្តុលតាហែន រងនូវការខូចខាតរបើកដំបូលផ្ទះប្រជាពលរដ្ឋសរុបចំនួន០៤ខ្នង។ យ៉ាងណា បើតាមក្រសួងធនធានទឹក និងឧតុនិយម កាលពីព្រឹកថ្ងៃទី១២ ខែឧសភា ឆ្នាំ២០២៤ បានចេញសេចក្តីជូនដំណឹងថា សម្ពាធទាបគ្របដណ្ដប់មកលើឈូងសមុទ្ទថៃ ព្រះរាជាណាចក្រកម្ពុជា ភាគកណ្តាលនៃអាងទន្លេមេគង្គ និងសមុទ្ទចិនខាងត្បូង ដូច្នេះ ស្ថានភាពបែបនេះ នឹងធ្វើឱ្យខេត្តបាត់ដំបង បន្ទាយមានជ័យ សៀមរាប បាត់ដំបង ពោធិ៍សាត់ កំពង់ចាម កំពង់ឆ្នាំង កំពង់ធំ និងកណ្តាលអាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់គ្របដណ្ដប់លើផ្ទៃដី២០ភាគរយចាប់ពីថ្ងៃទី១២ដល់ថ្ងៃទី១៤ ខែឧសភា ឆ្នាំ២០២៤។

សូមរំឭកថា កាលពីថ្ងៃទី៦ ខែឧសភា ឆ្នាំ២០២៤ នៅក្នុងភូមិសាស្ត្រស្រុកសំពៅលូន ស្រុកបាណន់ និងស្រុកថ្មគោល ក៏មានភ្លៀងកក់ខែមួយមេលាយទ្បំដោយផ្គររន្ទះ បាញ់មកលើពលរដ្ឋ៣នាក់បណ្តាលឱ្យរងរបួស ព្រមទាំងផ្ទះពលរដ្ឋចំនួន៣៧ខ្នងទៀតរងនូវការខូចខាតយ៉ាងដំណំ។ ដើម្បីរក្សាសុវត្ថិភាពពីរន្ទះអំឡុងពេលនៅក្នុងផ្ទះ បងប្អូនប្រជាពលរដ្ឋ គួរបិទបង្អួចផ្ទះឱ្យជិតព្រោះការបិទបង្អួចមិនត្រឹមតែជួយការពារមិនឱ្យទទឹកភ្លៀងទេ តែវាក៏ជារបាំងការពាររន្ទះបានមួយកម្រិតដែរ។ ហាមដាច់ខាតកុំរត់ទៅជ្រកនៅក្រោមដើមឈើណាមួយឱ្យសោះ ព្រោះពេលខ្លះរន្ទះអាចនឹងបាញ់ដើមឈើទាំងនោះ បានដោយស្មានមិនដល់ វាគ្មានសុវត្តិភាពទេ។ ទន្ទឹមនឹងនោះ ត្រូវចៀសវាងការប្រើទូរសព្ទគ្រប់ប្រភេទ ដូចជាការប្រើទូរសព្ទដៃលេងហ្គេម ឬលេងអ៊ីនធឺណិត។

ត្រូវបិទឧបករណ៍អគ្គិសនីគ្រប់ប្រភេទ បើមិនបិទវាហាក់បីដូចជាបង្កភាពងាយស្រួលឱ្យចរន្តអគ្គិសនីទាំងក្នុង និងក្រៅ (រន្ទះ) មានចរន្តរត់ឆ្លងកាត់គ្នាបានយ៉ាងល្អ ពេលនោះផ្ទះនឹងងាយរងគ្រោះថ្នាក់ដោយយថាហេតុ។ ត្រូវនៅឱ្យឆ្ងាយពីឧបករណ៍ដែលមានចរន្តអគ្គិសនីទាំងអស់ដូចជា៖ ទូរសព្ទ កុំព្យូទ័រ វិទ្យុ ទូរទស្សន៍ ហ្វ្រីភ្លើង ឬខ្សែភ្លើង និងឧបករណ៍ផ្សេងៗទៀត។ ត្រូវនៅឱ្យឆ្ងាយពីវត្ថុដែលធ្វើឡើងពីដែក និងកុំប៉ះពាល់វា។ ដោះគ្រឿងអលង្ការដែលធ្វើពីលោហៈធាតុចេញពីខ្លួនឱ្យអស់ និងត្រៀមរៀបចំភ្លើងបំភ្លឺនៅក្នុងផ្ទះឱ្យបានត្រឹមត្រូវក្នុងនោះអាចប្រើពិល ឬទៀនមកប្រើប្រាស់ជំនួសអំពូលបាន។

ដោយទ្បែក ដើម្បីកាត់បន្ថយហានិភ័យរន្ទះអំឡុងពេលស្ថិតនៅបរិវេណខាងក្រៅគ្មានកន្លែងសុវត្ថិភាពដូចជា៖ នៅតំបន់ខ្ពង់រាប មានដូចជា ទីទួល តំបន់ភ្នំ ឬកំពូលភ្នំត្រូវប្រញាប់ចាកចេញភ្លាម។ ហាមដាច់ខាតកុំក្រាបទៅលើដី និងហាមដាច់ខាតមិនត្រូវជ្រកក្រោមដើមឈើនោះឡើយ ក៏មិនត្រូវជ្រកក្រោមផ្ទាំងថ្ម ឬថ្មចោតដែរ ព្រោះវាអាចបាក់សង្កត់ ឬរអិលធ្លាក់មកលើយើងបាន។ ត្រូវចាកចេញឱ្យឆ្ងាយពីថ្លុកត្រពាំង បឹងបួរ និងកន្លែងផ្សេងទៀតដែលមានដក់ ឬស្តុកទឹក។ ហាមនៅកន្លែងអាចចម្លងចរន្តអគ្គិសនី ដូចជា លួសបន្លា ខ្សែភ្លើង និងម៉ាស៊ីនផ្សេងៗ។ ត្រូវរត់ចេញពីវាលស្រែព្រោះវាងាយនឹងមានរន្ទះបាញ់ណាស់។ បើចៃដន្យនៅនៅក្រោមបង្គោលភ្លើងពេលមានភ្លៀងធ្លាក់ មានផ្លេកបន្ទោរ ផ្គរ ត្រូវប្រញាប់បន្ទន់ខ្លួនដោយបញ្ឈរជង្គង់ទាំង២ជិតគ្នា និងយកដៃខ្ទប់ត្រចៀកទាំងសងខាង ៕