ឧត្ដមសេនីយ៍ត្រី ជឹម ប៊ុនអាន បើកវគ្គផ្សព្វផ្សាយសភាពការណ៍ថ្មី និងឯកសារជំនួយស្មារតី ជូនដល់ នាយទាហាន ពលទាហាន តំបន់ប្រតិបត្តិការសឹករងបន្ទាយមានជ័យ

ភ្នំពេញ៖ នៅថ្ងៃទី៩ ខែឧសភា ឆ្នាំ២០២៤ ឧត្ដមសេនីយ៍ត្រី ជឹម ប៊ុនអាន មេបញ្ជាការ តំបន់ប្រតិបត្តិការសឹករងបន្ទាយមានជ័យ បានអញ្ជើញជាអធិបតីក្នុងពិធីផ្សព្វផ្សាយសភាពការណ៍ថ្មីៗ និងឯកសារជំនួយស្មារតីឆ្នាំ២០២៤ ដល់នាយទាហាន នាយទាហានរង និងពលទាហាន ស្ថិតនៅសាលប្រជុំទីបញ្ជាការ តំបន់ប្រតិបត្តិការសឹករងបន្ទាយមានជ័យ។

ឧត្ដមសេនីយ៍ត្រី មេបញ្ជាការ បានមានប្រសាសន៍ក្នុងពិធីបើកវគ្គផ្សព្វផ្សាយនេះ គឺ សំដៅឱ្យ នាយទាហាន នាយទាហានរង ពលទាហាន បានយល់ជ្រួតជ្រាបពីគុណតម្លៃនៃសន្តិភាពដែលបានមកដោយលំបាក និង សភាពការណ៍វិវត្តន៍ថ្មីៗ ជាតិ អន្តរជាតិ ពិសេសការប្រកាន់ភ្ជាប់ច្បាប់ លក្ខន្តិកៈ បទវិន័យទូទៅ បទបញ្ញត្តិ ៦មិន ៨ត្រូវ របស់កងយោធពលខេមរភូមិន្ទ និងប្រឆាំងដាច់ខាតបណ្តាព័ត៌មានតាមបណ្តាញសង្គមនាពេលថ្មីៗនេះរបស់ជនអគតិមួយចំនួនក្នុងគោលបំណងបង្កភាពចលាចល បង្កអសន្តិសុខដល់ប្រជាពលរដ្ឋ ក្នុងសង្គមជាតិទាំងមូល និងមិនត្រូវធ្វើអ្វីឱ្យប៉ះពាល់ដល់កិត្តិយស និង សេចក្តីថ្លៃថ្នូររបស់ កងយោធពលខេមរភូមិន្ទឡើយ។

លោកមេបញ្ជាការ បានណែនាំដល់យោធិនទាំងអស់ត្រូវស្មោះត្រង់ដាច់ខាតចំពោះជាតិ សាសនា ព្រះមហាក្សត្រ និង រាជរដ្ឋាភិបាលស្របច្បាប់ដែលប្រសូត្រចេញពីឆន្ទៈបោះឆ្នោតរបស់ប្រជាពលរដ្ឋ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ព្រមទាំងចូលរួមគោរពអនុវត្តច្បាប់ចរាចរណ៍ ក៏ដូចជាចៀសឆ្ងាយពីគ្រឿងញៀន៕