ឯកឧត្តម វ៉ា ថន អញ្ជើញចូលរួមសូត្រមន្តវេប្រគេនចង្ហាន់-បច្ច័យ និងរាប់បាត្រ និងចូលរួមពិធីសង្រ្កានឆ្នាំថ្មីប្រពៃណីជាតិខ្មែរ ស្ថិតក្នុងវត្តបទុមរង្សី សង្កាត់ក្រគរ ក្រុងក្រចេះ

ភ្នំពេញ៖ នាព្រឹកថ្ងៃសៅរ៍ ៥កើត ខែចេត្រ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៣ ខែមេសា ឆ្នាំ ២០២៤ រដ្ឋបាលខេត្តក្រចេះ បានរៀបចំសង្រ្កានឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស.២៥៦៨ គ.ស ២០២៤ ដែលនឹងឈានចូលនៅម៉ោង២២និង១៧នាទី ថ្ងៃទី១៣ ខែមេសា ដែលរដ្ឋបាលខេត្ត បានកំណត់យកវត្តបទុមរង្សី សង្កាត់ក្រគរ ក្រុងក្រចេះ ដើម្បីបង្កើតព្រឹត្តិការណ៍សប្បាយរីករាយ ផ្សារភ្ជាប់ទំនាក់ទំនងវប្បធម៌រស់នៅប្រជាពលរដ្ឋ ជាពិសេសកាត់បន្ថយគ្រោះថ្នាក់ចរាចរណ៍។

ក្នុងឱកាសដ៏ប្រពៃថ្លៃថ្លានោះ ឯកឧត្តម វ៉ា ថន អភិបាលខេត្តក្រចេះ និងលោកជំទាវ ព្រមទាំងបុត្រាបុត្រី រួមនិងថ្នាក់ដឹកនាំមន្រ្តីរាជការ អាជ្ញាធរក្រុង-សង្កាត់ យុវជន និងប្រជាពលរដ្ឋ បានអញ្ជើញចូលរួមសូត្រមន្តវេប្រគេនចង្ហាន់-បច្ច័យ និងរាប់បាត្រ និងបន្តចូលរួមពិធីសង្រ្កានឆ្នាំថ្មីប្រពៃណីជាតិខ្មែរ ដែលមានការលេងល្បែងកម្សាន្តតាមប្រពៃណីជាតិដូនតាខ្មែរ ដោយក្នុងនោះមាន៖ ចោលឆួង ទាញព្រ័ត បោះអង្គុញ វាយក្អម ស្វាដណ្តើមស្លឹកឈើ រាំទូលក្អម រាំដណ្តើមកៅអី និងរបាំជូនពរ របាំត្រុដ្ឋ គោះត្រឡោក របាំក្ងោក និងរាំងវង់ជាដើម។

តាមរយៈព្រឹត្តិការណ៍សង្ក្រានឆ្នាំថ្មីនេះ គឺដើម្បីបង្កើនភាពស្និតស្នាលសប្បាយរីករាយ ផ្សារភ្ជាប់ផ្សព្វផ្សាយនូវវប្បធម៌ ប្រពៃណី ទំនៀមទម្លាប់ដូនតាខ្មែរ ហើយថ្នាក់ដឹកនាំ មន្រ្តីរាជការ និងប្រជាពលរដ្ឋពិតជាមានមោទនភាព ព្រោះព្រឹត្តិការណ៍បានប្រារព្ធឡើងនាំមកនូវបរិយាកាស ប្រកបដោយមនោសញ្ចេតនា រីករាយ សាមគ្គីភាព មិត្តភាព ស្ថិតក្រោមដំបូលសន្តិភាព និងក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នឹងជាការបញ្ជាក់ឲ្យឃើញពីការស់នៅរបស់ប្រជាពលរដ្ឋប្រកបដោយសិទ្ធិសេរីភាព សេដ្ឋកិច្ចជីវភាពធូធារ និងសន្តិសុខសណ្តាប់ធ្នាប់ល្អប្រសើរ ជាពិសេសបង្ហាញឲ្យឃើញថា កម្ពុជាកំពុងដើរឆ្ពោះទៅរកការអភិវឌ្ឍន៍រីកចម្រើន ស្រមតាមសម័យកាលបរិបទបច្ចេកវិទ្យាឌីជីថល ៕