ឧបនាយករដ្ឋមន្ត្រី ហង់ជួន ណារ៉ុន៖ ការអានផ្ដល់នូវចំណេះដឹងទូលំទូលាយ ជាមូលដ្ឋានគ្រឹះផ្នែកត្រិះរិះពិចារណា និងសម្រេចចិត្តប្រកបដោយប្រសិទ្ធភាព

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជននិងកីឡា នៅថ្ងៃទី១១ ខែមីនា ឆ្នាំ២០២៤ បានអញ្ជើញជាអធិបតីភាព កម្មវិធីប្រារព្ធទិវាជាតិអំណានលើកទី៩ ឆ្នាំ២០២៤ ក្រោមប្រធានបទ «អំណានជាមូលដ្ឋានគ្រឹះ សម្រាប់ទាំងអស់គ្នាក្នុងជីវិត» នៅវិទ្យាស្ថានជាតិកម្ពុជា។

ក្នុងឱកាសនោះដែរ ឯកឧត្តមបណ្ឌិតសភាចារ្យ មានប្រសាសន៍ថា ទិវាជាតិអំណាន ដែលក្រសួងអប់រំ យុវជននិងកីឡា សហការជាមួយក្រសួងពាក់ព័ន្ធ តែងតែរៀបចំឡើងជារៀងរាល់ឆ្នាំ គឺដើម្បីលើកកម្ពស់តម្លៃនៃការអាន បណ្ដុះគំនិតឱ្យយុវជនស្រឡាញ់សៀវភៅ ព្រោះការអានបានផ្ដល់នូវចំណេះដឹងទូលំទូលាយ ជាមូលដ្ឋានគ្រឹះក្នុងការផ្ដល់ចំណេះដឹងផ្នែកត្រេះរិះពិចារណា និងសម្រេចចិត្តប្រកបដោយប្រសិទ្ធភាព។

ឯកឧត្តម បានបញ្ជាក់ថា យោងតាមការស្រាវជ្រាវ ការអានមិនត្រឹមតែផ្ដល់ចំណេះដឹងប៉ុណ្ណោះទេ ថែមទាំងអាចជួយឱ្យផ្លូវចិត្តមានសុខភាពល្អ អារម្មណ៍ស្រស់ថ្លា ដូច្នេះហើយគេសង្កេតឃើញថា ចំពោះអ្នកដែលចូលចិត្តអានសៀវភៅ គឺតែងតែក្មេងជាងវ័យជានិច្ច។

បន្ថែមពីនេះ ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកឡើងថា បច្ចុប្បន្នមធ្យោបាយសម្រាប់អានគឺសម្បូរបែប មិនត្រឹមតែសៀវភៅប៉ុណ្ណោះទេ ថែមទាំងមានជាលក្ខណៈសៀវភៅអេឡិចត្រូនិក (E-Book) និងឧបករណ៍អេឡិចត្រូនិកជាច្រើនទៀត ដែលអ្នកអានអាចផ្ទុកសៀវភៅរាប់រយមុខនៅលើឧបករណ៍តែមួយ។

យ៉ាងណាមិញចំណុចនេះ ឯកឧត្តមបណ្ឌិតសភាចារ្យ បានសង្កត់ធ្ងន់ថា ឧបករណ៍អេឡិចត្រូនិកជាអាវុធមុខពីរ ប្រសិនបើអ្នកប្រើប្រាស់មិនអាចម្ចាស់ការបានទេនោះ ការអានមិនអាចប្រសើរបានឡើយ ដោយសារតែវានឹងរំខានអារម្មណ៍របស់យើងឱ្យមានទំនោរទៅលើកម្មវិធីផ្សេងទៀតដូចជា វីដេអូ និងកម្មវិធីកម្សាន្តដទៃ ខុសពីសៀវភៅ ដែលតែងតែផ្ដល់នូវភាពស្ងប់ស្ងាត់ដល់អ្នកអាន។

ទាក់ទងជាមួយនឹងមធ្យោបាយអាននេះផងដែរ ឯកឧត្តមបណ្ឌិតសភាចារ្យ បានលើកទឹកចិត្តដល់យុវជន សិស្ស និស្សិត ប្រជាពលរដ្ឋ ត្រូវយកចិត្តទុកដាក់ជាថ្មីទៅលើសាស្ត្រាស្លឹករឹត ដែលជាមធ្យោបាយបុរាណខ្មែរសម្រាប់ចារទុកនូវឯកសារមានអាយុកាលរាប់រយឆ្នាំមកហើយ ហើយសាស្ត្រាស្លឹករឹតនេះផងដែរ ក៏ត្រូវបានបរទេសចាប់អារម្មណ៍ និងផ្ដល់តម្លៃយ៉ាងខ្លាំង ដូច្នេះក្នុងនាមយើងជាកូនខ្មែរ ត្រូវតែយកចិត្តទុកដាក់ចំពោះមរតកដែលដូនតាបានបន្សល់ទុកឱ្យ។

ឯកឧត្តមបណ្ឌិតសភាចារ្យ ហង់ជួន ណារ៉ុន បានបញ្ជាក់ម្ដងហើយម្ដងទៀតថា ទិវាជាតិអំណាន ក៏មានគោលដៅចម្បងលើកកម្ពស់ការតែងនិពន្ធឱ្យកាន់តែល្អ មិនឱ្យប្រាស់ចាកពីក្រមសីលធម៌ ពង្រឹងស្នាដៃតែងនិពន្ធឱ្យមានភាពល្អប្រសើរ យកស្នាដៃអ្នកនិពន្ធពីបុរាណជាគំរូ ដូចជាស្នាដៃសម្ដេចព្រះសង្ឃរាជ ជួន ណាត ជាដើម។

ជាចុងក្រោយ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា បានវាយតម្លៃខ្ពស់ចំពោះ ការបើកទិវាជាតិអំណានលើកទី៩ ឆ្នាំ២០២៤ ក្រោមប្រធានបទ «អំណានជាមូលដ្ឋានគ្រឹះ សម្រាប់ទាំងអស់គ្នាក្នុងជីវិត» នេះឡើងប្រកបដោយភាពរលូន និងអធិកអធម ក៏ដូចជាថ្លែងអំណរគុណដល់ក្រសួង និងស្ថាប័នពាក់ព័ន្ធ ដែលបានជួយជ្រោមជ្រែង លះបង់កម្លាំងកាយចិត្ត ក្នុងស្មារតីលើកកម្ពស់វិស័យអំណាននៅកម្ពុជា៕