គណៈកម្មការគ្រប់គ្រង និងការពារសត្វផ្សោតទន្លេមេគង្គ របស់ក្រសួងកសិកម្ម រៀបចំកិច្ចប្រជុំពង្រឹងលើការគ្រប់គ្រង និងការពារសត្វផ្សោត

ភ្នំពេញ៖ នៅព្រឹកថ្ងៃព្រហស្បតិ៍ ១២រោច ខែមាឃ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៧ ខែមីនា ឆ្នាំ២០២៤ គណៈកម្មការគ្រប់គ្រង និងការពារសត្វផ្សោតទន្លេមេគង្គ ដឹកនាំឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកិច្ចប្រជុំដើម្បីពង្រឹងលើការគ្រប់គ្រង និងការពារសត្វផ្សោតទន្លេមេគង្គ។

កិច្ចប្រជុំនេះមានគោលបំណងបង្ហាញពីវឌ្ឍនភាពនៃការគ្រប់គ្រងផ្សោត ដែលទទួលបាននាឆ្នាំកន្លងមក ពិនិត្យនិងដោះស្រាយបញ្ហានានាដែលកំពុងប្រឈមទៅនឹងការគ្រប់គ្រងសត្វផ្សោត ជំរុញការចូលរួមសហការរវាងស្ថាប័ន អង្គការពាក់ព័ន្ធ រដ្ឋបាលថ្នាក់ជាតិ ដៃគូពាក់ព័ន្ធលើកិច្ចការពារផ្សោតប្រកបដោយប្រសិទ្ធភាព ពង្រឹងសកម្មភាពរបស់ក្រុមឆ្មាំទន្លេការពារសត្វផ្សោតទន្លេមេគង្គ និងជំរុញការចូលរួមពីអាជ្ញាធរមូលដ្ឋានលើការគ្រប់គ្រងឧបករណ៍នេសាទក្នុងតំបន់ផ្សោត។

ដោយមានការចូលរួមពី ឯកឧត្តម វ៉ា ថន អភិបាលខេត្តក្រចេះ និងឯកឧត្តម ស្វាយ សំអ៊ាង អភិបាលខេត្តស្ទឹងត្រែង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល មន្ដ្រីជំនាញនៃរដ្ឋបាលជលផល ប្រធានមន្ទីរកសិកម្ម ប្រធានមន្ទីរបរិស្ថាន ប្រធានមន្ទីរសេដ្ឋកិច្ច និងហិរញ្ញវត្ថុ ប្រធានមន្ទីរទេសចរណ៍ ប្រធានមន្ទីរអប់រំ យុវជន និងកីឡា ស្នងការនគរបាលខេត្ត កងរាជអាវុធហត្ថ នាយខណ្ឌរដ្ឋបាលជលផល និងជាប្រធានឆ្មាំទន្លេខេត្តក្រចេះ និងខេត្តស្ទឹងត្រែង អភិបាលស្រុក មន្ត្រីពាក់ព័ន្ធ រួមទាំងតំណាងអង្គការ WWF ៕