ក្រុមការងារនាយកដ្ឋានតម្រង់ទិសវិជ្ជាជីវៈ នៃក្រសួងអប់រំ ចុះជួយតម្រង់ទិសវិទ្យាល័យចំណេះទូទៅ និងបច្ចេកទេសបាវិត ខេត្តស្វាយរៀង

ភ្នំពេញ៖ ក្នុងក្របខណ្ឌនៃការអនុវត្តស្ដង់ដាសាលារៀនគំរូ នាថ្ងៃទី៥ ខែមីនា ឆ្នាំ២០២៤
ក្រុមការងារនាយកដ្ឋានតម្រង់ទិសវិជ្ជាជីវៈ នៃក្រសួងអប់រំ យុវជន និងកីឡា បានចុះជួយវិទ្យាល័យចំណេះទូទៅ និងបច្ចេកទេសបាវិត ខេត្តស្វាយរៀង។

កម្មវិធីនេះ ប្រព្រឹត្តទៅក្រោមអធិបតីភាព ឯកឧត្តម កុលផេង វឌ្ឍនា អនុរដ្ឋលេខាធិការនៃក្រសួងអប់រំ យុវជន និងកីឡា និងមានការចូលរួមពីបុគ្គលិកអប់រំនាយកដ្ឋានតម្រង់ទិសវិជ្ជាជីវៈ ថ្នាក់ដឹកនាំមន្ទីរអប់រំ យុវជន និងកីឡា ខេត្ត ថ្នាក់ដឹកនាំការិយាល័យអប់រំ យុវជន និងកីឡានៃរដ្ឋបាលក្រុងបាវិត អាជ្ញាធរមូលដ្ឋាន គណៈកម្មការគ្រប់គ្រងសាលារៀន គណៈគ្រប់គ្រងសាលារៀន លោកគ្រូអ្នកគ្រូជាប្រធាន-អនុប្រធានក្រុមបច្ចេកទេស លោកគ្រូ អ្នកគ្រូបង្រៀនផ្នែកបច្ចេកទេស និងផ្នែកចំណេះទូទៅ សហគមន៍មាតាបិតា អ្នកអាណាព្យាបាលសិស្ស សរុបចំនួន ៣៥២នាក់។

កម្មវិធីនេះ មានគោលបំណងបោះឆ្នោតរៀបចំគណៈកម្មការគ្រប់គ្រងសាលារៀន និងចែករំលែកចំណេះដឹង និងបំណិនដល់គណៈគ្រប់គ្រង និងគ្រូបង្រៀនលើការងារពាក់ព័ន្ធនឹងការអនុវត្តស្ដង់ដាសាលារៀនគំរូ។ ជាមួយគ្នានេះដែរ ក្រុមការងារចុះជួយបានធ្វើបទបង្ហាញពីសារៈសំខាន់នៃការចូលរួមរបស់សហគមន៍ដល់អ្នកចូលរួម និងធ្វើបទបង្ហាញស្ដីពីការអនុវត្តស្តង់ដាសាលាគំរូ និងវិភាគចំណុចខ្លាំង ចំណុចខ្សោយ ឱកាស និងឧបសគ្គរបស់សាលារៀនដល់ថ្នាក់ដឹកនាំសាលារៀន និងលោកគ្រូ អ្នកគ្រូចំនួន ៥២នាក់ ស្រី ១០នាក់។

គណៈគ្រប់គ្រង លោកគ្រូ អ្នកគ្រូ ដែលបានចូលរួមស្តាប់អនុសាសន៍ និងសិក្សារៀនសូត្រ បានសម្ដែងនូវការប្តេជ្ញាចិត្តខ្ពស់ក្នុងការសហការគ្នាដឹកនាំរៀបចំការងារតេស្តស្តង់ដា និងខិតខំបំពេញការងារឱ្យបានតាមផែនការរៀងៗខ្លួន ដើម្បីចូលរួមចំណែកក្នុងការលើកកម្ពស់សកម្មភាព និងគុណភាពសិក្សារបស់សិស្ស ឆ្លើយតបនឹងស្តង់ដាទី១ នៃស្តង់ដាសាលារៀនគំរូ៕