ឯកឧត្តម កើត ឆែ អញ្ជើញបើកសិក្ខាសាលាផ្សព្វផ្សាយ ស្តីពីការគាំពារវិនិយោគិន និងការពង្រឹងការអនុវត្តច្បាប់ក្នុងវិស័យមូលបត្រ

ភ្នំពេញ៖ នាព្រឹកថ្ងៃចន្ទ ២រោច ខែមាឃ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២៦ ខែកុម្ភៈ ឆ្នាំ២០២៤ ឯកឧត្តម កើត ឆែ អភិបាលរងរាជធានីភ្នំពេញ តំណាង ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ និងជាមួយឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃនិយ័តករមូលបត្រកម្ពុជា បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយ ស្តីពីការគាំពារវិនិយោគិន និងការពង្រឹងការអនុវត្តច្បាប់ក្នុងវិស័យមូលបត្រ នៅសាលាប្រជុំ នៃសាលរាជធានីភ្នំពេញ។

វគ្គបណ្តុះបណ្តាលក្នុងថ្ងៃនេះ មានសិក្ខាកាមអញ្ជើញចូលរួមដូចជាអភិបាលរងខណ្ឌទាំង១៤ មេបញ្ជាការកងរាជអាវុធហត្ថខណ្ឌទាំង១៤ អធិការនគរបាលខណ្ឌទាំង១៤ ចៅសង្កាត់ទាំង១០៥ និងនាយប៉ុស្តិ៍នគរបាលទាំង១០៥ ក្នុងរាជធានីភ្នំពេញ។

លើសពីនេះ វគ្គបណ្តុះបណ្តាលនាថ្ងៃនេះ ពិតជាមានសារៈសំខាន់ក្នុងគោលដៅរួមគឺដើម្បីទប់ស្កាត់ការឆបោក (scamming) តាមរយៈការកៀរគរថវិកាពីបងប្អូនប្រជាពលរដ្ឋថាយកទៅវិនិយោគដោយសន្យាថានឹងទទួលបានប្រាក់ចំណេញខ្ពស់ (investment fraud)។

វគ្គបណ្តុះបណ្តាលនេះ ក៏ផ្តល់ឱកាសដ៏គាប់ប្រសើរ សម្រាប់សិក្ខាកាមទាំងអស់អាចស្វែងយល់បានកាន់តែស៊ីជម្រៅ អំពីភារកិច្ចការងាររបស់និយ័តករមូលបត្រកម្ពុជា និងសកម្មភាពអាជីវកម្មមូលបត្រត្រឹមត្រូវតាមច្បាប់ក្នុងមូលដ្ឋានរាជធានីភ្នំពេញ។

ទន្ទឹមនេះ ឯកឧត្តម កើត ឆែ ក៏បានស្នើសិក្ខាកាមទាំងអស់ត្រូវយកចិត្តទុកដាក់ត្រងត្រាប់ស្តាប់ការធ្វើបទបង្ហាញរបស់វាគ្មិន និងមន្ត្រីជំនាញ ដើម្បីយកចំណេះដឹងទាំងនេះទៅអំពាវនាវ និងពន្យល់ដល់បងប្អូនប្រជាពលរដ្ឋនៅតាមមូលដ្ឋានរៀងៗខ្លួនឱ្យបានជ្រាបពីព័ត៌មាននេះ ដើម្បីពួកគាត់អាចចៀសឆ្ងាយ និងមានភាពប្រុងប្រយ័ត្នខ្ពស់ចំពោះសកម្មភាពអាជីវកម្មមូលបត្រខុសច្បាប់ខាងលើ ៕