សម្តេចធិបតី៖ គោលដៅធំរបស់រាជរដ្ឋាភិបាល គឺលើកកម្ពស់ជីវភាពរស់នៅ កាត់បន្ថយភាពក្រីក្ររបស់ប្រជាពលរដ្ឋ
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា គោលដៅចម្បងរបស់រាជរដ្ឋាភិបាលរយៈពេលជាង ៤០ឆ្នាំមកនេះ ដែលដឹកនាំដោយគណបក្សប្រជាជនកម្ពុជា គឺការលុបបំបាត់ភាពក្រីក្រ និងបង្កើនជីវភាពរស់នៅរបស់ប្រជាពលរដ្ឋ ។
ក្នុងឱកាសអញ្ជើញជាអធិបតីភាព បើកការដ្ឋានការសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) តម្លៃជាង៦០លានដុល្លារ នៅថ្ងៃទី១៩ ខែកុម្ភៈ ឆ្នាំ២០២៤នេះ សម្តេចធិបតី ហ៊ុន ម៉ាណែត មានប្រសាសន៍ថា សម្រាប់គោលដៅចម្បងរបស់រាជរដ្ឋាភិបាលក្នុងអាណត្តិទី៧ និងអាណត្តិមុនៗ គឺជំរុញកំណើនសេដ្ឋកិច្ចប្រកបដោយជីវភាព បង្កើតការងារឱ្យបានច្រើន។ ប្រែក្លាយពីបឹង ពីព្រៃ ពីវាលស្រែ កន្លែងអត់ផ្លូវទៅជាកន្លែងដែលមានបង្កបង្កើនផលកសិកម្ម រុញភ្លើងអគ្គិសនី រោងចក្រទៅដល់មូលដ្ឋាន ដែលបានបង្កើតការងារជូនប្រជាពលរដ្ឋជាច្រើនកន្លែង។
សម្តេចធិបតី ហ៊ុន ម៉ាណែត បញ្ជាក់ថា៖ «អញ្ចឹងគោលដៅចម្បងរបស់រាជរដ្ឋាភិបាលក្នុងអាណត្តិទី៧ និងអាណត្តិមុនៗ ជំរុញកំណើនសេដ្ឋកិច្ចប្រកបដោយជីវភាព បង្កើតការងារឱ្យបានច្រើន ហើយគោលដៅធំគឺលើកកម្ពស់ជីវភាពរស់នៅប្រជាពលរដ្ឋតាមរយៈការកាត់បន្ថយភាពក្រីក្ររបស់ប្រជាពលរដ្ឋ ហើយនេះជាគោលដៅតែមួយគត់របស់រាជរដ្ឋាភិបាល ៤០ឆ្នាំជាងនេះ ដែលយើងកាត់ពីប្រទេសបែកបាក់ធ្វើយ៉ាងណាឱ្យជីវភាពរស់នៅរបស់ប្រជាលរដ្ឋ តាមរយៈការបង្កើតបរិស្ថានចាំបាច់ គឺការបញ្ចប់សង្គ្រាម និងថែរក្សាសន្តិភាពឱ្យបាន ដើម្បីធានានូវភាពរីកចម្រើនរបស់យើង»។
សម្តេចធិបតី លើកឡើងថា ប្រសិនបើរាប់ត្រឹមចុងឆ្នាំ១៩៩៨ ដែលដាក់ចេញនយោបាយឈ្នះឈ្នះ របស់សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា នោះកម្ពុជា ទើបតែបញ្ចប់សង្គ្រាមស៉ីវិលទាំងស្រុងប្រមាណ២៥ឆ្នាំប៉ុណ្ណោះ។ ប៉ុន្តែ ក្រោមដំបូលនៃសន្តិភាពពេញផ្ទៃប្រទេសនេះ បានធ្វើឱ្យជីវភាពរបស់ប្រជាពលរដ្ឋកម្ពុជា មានការកើនឡើងយ៉ាងលឿនក្នុងរយៈពេល២៥ឆ្នាំមកនេះ ៕
