នាយករដ្ឋមន្ត្រី៖ បើសិនជាគ្មានវិបត្តិកូវីដ១៩ ប្រហែលជីវភាពរស់នៅ របស់ប្រជាជនកម្ពុជា កាន់តែកើន
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា វិបត្តិជំងឺកូវីដ១៩ និងវិបត្តិអតិផរណា ធ្វើឱ្យស្ថានភាពសេដ្ឋកិច្ច និងជីវភាពប្រជាពលរដ្ឋធ្លាក់ចុះ តែរាជរដ្ឋាភិបាលមិនអង្គុយយំកើតទុក្ខនោះទេ ហើយបានប្រឹងប្រែងដោះស្រាយបញ្ហាទាំងអស់នោះ ។ ហើយបើសិនជាគ្មានវិបត្តិកូវីដ១៩ នោះទេ មិនដឹងថា ប្រទេសយើងឈានដល់ណា ប្រហែលជីវភាពរស់នៅរបស់ប្រជាជនយើង កាន់តែកើន។
ក្នុងឱកាសអញ្ជើញបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសង្គមកិច្ច នាថ្ងៃទី៦ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត បានមានប្រសាសន៍ថា ភាពក្រីក្ររបស់ប្រជាពលរដ្ឋ ត្រូវបានកាត់បន្ថយជាង ៥០ភាគរយនៅឆ្នាំ១៩៩៧ ចុះមកដល់ ១៧ភាគរយ នៅឆ្នាំនេះ ដែលកើនបន្តិច។
សម្តេចធិបតី បន្តថា កំណើនសេដ្ឋកិច្ចជាតិ ៧ភាគរយ តាំងពីពេលបានសន្តិភាព រហូតដល់កូវីដ១៩ បានន័យថា ជីវភាពប្រជាជនបានរីកចម្រើន។ អ្នកនៅក្រោមបន្ទាប់ក្រីក្រ បានក្លាយទៅជាអ្នកមានជីវភាពមធ្យម និងអ្នកមានជីវភាពមធ្យមជាច្រើន បានវិវត្តទៅជាអ្នកមានជីវភាពខ្ពស់ នៅក្នុង ២០ឆ្នាំក្រោយពីបញ្ចប់សង្គ្រាម។ ប៉ុន្តែ ដោយសារកូវីដ១៩ អតិផរណា និងសង្គ្រាមនានាលើពិភពលោក ក៏បានធ្វើឲ្យប៉ះពាល់ដល់សេដ្ឋកិច្ចកម្ពុជា។
សម្តេចធិបតី ហ៊ុន ម៉ាណែត បញ្ជាក់ថា «ជាការសោកស្តាយណាស់ ដែលកូវីដ១៩ បានឈានមកដល់។ បើសិនជាគ្មានវិបត្តិកូវីដ១៩ នោះទេ មិនដឹងថា ប្រទេសយើងឈានដល់ណា ប្រហែលជីវភាពរស់នៅរបស់ប្រជាជនយើង កាន់តែកើន។ ប៉ុន្តែ យើងនិយាយនេះ មិនមែនបានន័យថា យើងអង្គុយយំកើតទុក្ខ ចំពោះអ្វីដែលបានកើតឡើងនោះទេ។ យើងត្រូវទទួលស្គាល់ការពិត យើងត្រូវធ្វើយ៉ាងណា ដើម្បីបន្តជួយនិរន្តរភាព និងចីរភាពនៃការអភិវឌ្ឍ។ ធម្មតា ការឡើងចុះនៃសេដ្ឋកិច្ចជាតិ ជាការធម្មតា។ បើអត់មានវិបត្តិកូវីដ១៩ ក៏មានវិបត្តិអតិផរណាពិភពលោក ឬក៏កត្តាណាមួយ ដែលយើងតែងតែមាន ប៉ុន្តែនៅក្នុងប៉ុន្មានឆ្នាំនេះ ដែលវិបត្តផ្ទួនៗ មានវិបត្តិកូវីដ១៩ ក៏ដូចជា វិបត្តិអតិផរណា និងសង្គ្រាមផ្សេងៗដែលកំពុងកើតមាន ក៏ជិះឥទ្ធិពលដល់កម្ពុជាយើង»។
សម្តេចធិបតីថ្លែងបន្ថែមថា «ហេតុដូច្នេះហើយ ទាមទារឲ្យកម្ពុជាយើងត្រូវដៃម្ខាងដោះស្រាយបញ្ហាចំពោះមុខ ដៃម្ខាងគឺពង្រឹងមូលដ្ឋានអនាគតសម្រាប់វែងឆ្ងាយរបស់ប្រទេសជាតិ។ ដោះស្រាយបញ្ហាចំពោះមុខ គឺអ្វីគេ? គឺធ្វើយ៉ាងណាទប់សភាពការណ៍កុំឲ្យវាអាក្រក់បំផុត ទៅតាមលទ្ធភាព ដែលអាចធ្វើទៅបាន។ បើនិយាយពីជីវភាពប្រជាជន ត្រូវធ្វើយ៉ាងណា កុំឲ្យប្រជាពលរដ្ឋយើង ធ្លាក់នៅក្នុងជ្រោះលំបាក ជាពិសេសបញ្ហាជីវភាព។ អីចឹងហើយ បានជាចាំបាច់ឲ្យរាជរដ្ឋាភិបាល ដាក់ចេញនូវគោលនយោបាយជាច្រើន គោលនយោបាយអន្តរាគមន៍សង្គម» ៕
