កម្ពុជា-ថៃ ប្តេជ្ញាចិត្តរួមគ្នាការពារការបំពុលទៅក្នុងបរិយាកាស ដើម្បីការពារសុខភាពសាធារណៈឆ្ពោះទៅភាពស្អាត៣ គឺស្អាតទាំងបរិយាកាសជុំវិញ ស្អាតចិត្ត និងស្អាតទាំងសុខភាព

ភ្នំពេញ៖ ថ្នាក់ដឹកនាំក្រសួងបរិស្ថាននៃព្រះរាជាណាចក្រកម្ពុជា និងក្រសួងការបរទេសនៃប្រទេសថៃ បានប្តេជ្ញាចិត្តរួមគ្នាទប់ស្កាត់ផ្សែងអ័ព្ទ និងការបំពុលទៅក្នុងបរិយាកាស ដើម្បីការពារសុខមាលភាពរបស់ប្រជាពលរដ្ឋនៃប្រទេសទាំងពីរ។

ការប្តេជ្ញាចិត្តបានធ្វើឡើងក្នុងជំនួបសម្តែងការគួរសម និងពិភាក្សាការងាររវាង ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងឯកឧត្តម ចាក់កាពុង សុងម៉ានី អនុរដ្ឋមន្រ្តីក្រសួងការបរទេសនៃប្រទេសថៃ តាមទូរស័ព្ទ នារសៀលថ្ងៃទី០២ ខែកុម្ភៈ ឆ្នាំ២០២៤។

នៅក្នុងជួបគ្នានេះ ក៏មានវត្តមាន ឯកឧត្តម ឈឺតគៀត អាតថាខន (Cherdkiat ATTHAKOR) ឯកអគ្គរាជទូតប្រទេសថៃប្រចាំនៅកម្ពុជា ដែលបានទទួលការអនុញ្ញាត អញ្ជើញចូលរួមជួបសម្តែង ការគួសមដោយផ្ទាល់ នាទីស្តីការក្រសួងបរិស្ថាន។ ឯកឧត្តម ឈឺតគៀត អាតថាខន (Cherdkiat ATTHAKOR) បានថ្លែងនូវការអរគុណចំពោះ ឯកឧត្តមបណ្ឌិតរដ្ឋមន្រ្តីក្រសួងបរិស្ថានកម្ពុជា ដែលបានអនុញ្ញាតឱ្យឯកឧត្តម បានចូលជួបសម្តែងការគួរសម ជាពិសេសគឺបានអនុញ្ញាតឱ្យឯកឧត្តម ចាក់កាពុង សុងម៉ានី បានជួបពិភាក្សាការងារ តាមទូរស័ព្ទផងដែរ។

ជាមួយគ្នានេះ ឯកឧត្តមរដ្ឋមន្រ្តីក្រសួងការបរទេសនៃប្រទេសថៃ បានជម្រាបជូនឯកឧត្តមរដ្ឋមន្រ្តី អ៊ាង សុផល្លែត អំពីបញ្ហាផ្សែងអ័ព្ទ ដែលតែងកើតឡើងជារៀងរាល់ឆ្នាំ ហើយបានបង្កផលប៉ះពាល់ដល់សុខភាព របស់ប្រជាពលរដ្ឋ នៃប្រទេសទាំងពីរ ចំពោះបញ្ហានេះប្រទេសថៃ ចាំបាច់ត្រូវការការរួមចំណែក ពីប្រទេសកម្ពុជា ដើម្បីឆ្លើយតបនឹងបញ្ហាតំបន់ តាមរយៈកិច្ចសហប្រតិបត្តិការទ្វេភាគី ដោយបង្កើតឱ្យមាន ក្រុមការងារ ឧបករណ៍បច្ចេកទេស សម្រាប់ត្រួតពិនិត្យ និងដោះស្រាយលើបញ្ហានេះ ព្រមទាំងបង្កើតជាប្រព័ន្ធHot-Lineពិសេស រវាងថៃនិងកម្ពុជា។ កន្លងមកឯកឧត្តម ស្រេតដ្ឋា ទវីសិន នាយករដ្ឋមន្រ្តីថៃ ធ្លាប់បានជួបពិភាក្សាចំនួន២ដងរួចមកហើយ ជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

ឯកឧត្តមបណ្ឌិត អ៊ាង សុផល្លែត បានថ្លែងអំណរគុណចំពោះឯកឧត្តមអនុរដ្ឋមន្រ្តី ប្រទេសថៃ ដែលបានយកចិត្តទុកដាក់ខ្លាំង ចំពោះបរិស្ថានក្នុងតំបន់។ ឯកឧត្តមបណ្ឌិតរដ្ឋមន្រ្តី បានថ្លែងថា ជាការពិតបរិស្ថានមិនមានដែនកំណត់ ដូចព្រំប្រទល់ នៃប្រទេសនីមួយៗនោះទេ ហើយការណ៍នេះ យើងចាំបាច់ត្រូវរួមគ្នាទប់ស្កាត់ និងសំអាតប្រទេសយើង ឱ្យស្អាតដូចដែលយុទ្ធសាស្រ្តចក្រាវិស័យបរិស្ថានឆ្នាំ២០២៣- ២០២៨របស់កម្ពុជា បានដាក់ចេញ ហើយដែលក្រសួងបរិស្ថានបានកំពុង អនុវត្តលើគោលដៅអាទិភាព៣ គឺភាពស្អាត ភាពបៃតង និងចីរភាព។

ជាការឆ្លើយតបចំពោះក្តីបារម្ភលើផ្សែងអ័ព្ទនេះ ឯកឧត្តមរដ្ឋមន្រ្តីក្រសួងបរិស្ថាន បានលើកបង្ហាញ នូវរបាយការណ៍ ដែលកម្ពុជាបានតាមដានគុណភាពខ្យល់ជាប្រចាំ តាមរយៈឧបករណ៍ស្វ័យប្រវត្តិ និងស្ថានីយតាមដាន ត្រួតពិនិត្យគុណភាពខ្យល់ ទាំងនៅរាជធានីភ្នំពេញ និងនៅតាមបណ្តាខេត្តនានា។ ជាលទ្ធផល សន្ទស្សន៍គុណភាពខ្យល់ ត្រូវបានស្រង់និងបង្ហាញស្ថិតក្នុងកម្រិតល្អប្រសើរ ដោយមានការប្រែប្រួលក្នុងកម្រិតតិចតួចប៉ុណ្ណោះ គឺកម្រិតភាគល្អិតនិចល PM2.5 មានជាមធ្យមចន្លោះពី ៩,២១ µg/m3 ទៅ ៣២,៦៨ µg/m3 (កម្រិតស្តង់ដារ PM2.5 គឺតូចជាង ៥០ µg/m3)។ កម្រិតសន្ទស្សន៍គុណភាពខ្យល់នៅកម្ពុជា នាពេលកន្លងមកនេះ មិនមានការបង្កហានិភ័យ ដល់សុខភាពប្រជាពលរដ្ឋកម្ពុជាទេ។

ឯកឧត្តមបណ្ឌិតរដ្ឋមន្រ្តី អ៊ាង សុផល្លែត បានបញ្ជាក់បន្ថែមថា កម្ពុជាបានត្រៀមខ្លួនរួចជាស្រេច ក្នុងការឆ្លើយតបនឹងការបំពុល ទាំងនៅលើគោក លើអាកាស និងនៅក្នុងទឹក ទើបក្នុងរយៈពេលជាង១០០ថ្ងៃកន្លងមកនេះ ឯកឧត្តមបានដាក់ចេញ នូវយុទ្ធនាការ ផ្ទៃមេឃពណ៌ខៀវ (blue sky campaign) ដែលស្រដៀងនឹងកម្មវិធី Clear Sky របស់ប្រទេសថៃដែរ។

យោងតាមប្រសាសន៍ឯកឧត្តមរដ្ឋមន្រ្តី កម្ពុជា និងថៃបានប្តេជ្ញាចិត្តរួមគ្នា ពង្រឹងកិច្ចសហប្រតិបត្តិការទ្វេភាគី តាមរយៈការផ្លាស់ប្តូរបទពិសោធន៍ល្អ ទៅវិញទៅមក ឆ្លើយតបនឹងការទប់ស្កាត់ផ្សែងអ័ព្ទ ការបំពុលដោយសំណល់ និងប្លាស្ទិក នៅក្នុងបរិយាកាស ដើម្បីជំរុញឱ្យប្រទេសជាមិត្ត ក្នុងតំបន់អាស៊ានមានភាពស្អាត គឺស្អាតទាំងបរិយាកាស ជុំវិញ ស្អាតចិត្ត និងស្អាតទាំងសុខភាព ៕