ប្រមុខរាជរដ្ឋាភិបាល៖ ដោយសារតម្លៃស្រូវកើនឡើងខ្ពស់ ទើបប្រជាកសិករ នាំគ្នាសម្រុកធ្វើស្រូវប្រាំងលើសផែនការ

ភ្នំពេញ៖ សម្ដេចមហាបវរធិបធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកឡើងថា ដោយសារតម្លៃស្រូវមានការកើនឡើងខ្ពស់ថ្លៃ ទើបប្រជាកសិករ សម្រុកធ្វើស្រូវប្រាំងលើសផែនការ ។

ក្នុងឱកាសអញ្ជើញជាអធិបតីបិទសន្និបាតបូកសរុបការងារឆ្នាំ២០២៣ និងលើកទិសដៅការងារបន្ត ឆ្នាំ២០២៤ របស់ក្រសួងកសិកម្ម នារសៀលថ្ងៃទី៣០ ខែមករា ឆ្នាំ២០២៤នេះ សម្ដេចធិបតី ហ៊ុន ម៉ាណែត បញ្ជាក់ថា «កិច្ចការងារនេះ គឺជាកិច្ចការងារត្រូវតាមដាន ជាប់ជាប្រចាំ ហើយពិសេសនៅឆ្នាំនេះ ដែលពិភពលោកវាយតម្លៃគ្រោះហានិភ័យ អាចមានរយៈពេលវែង។ ពិតណាស់ឆ្នាំទៅ យើងបានអំណាយផលច្រើនក្នុងការធ្វើ ទាំងស្រូវវស្សា ទាំងស្រូវប្រាំង តម្លៃក៏ឡើងខ្ពស់ល្អ ប៉ុន្ដែដោយសារតម្លៃខ្ពស់នេះ ប្រជាកសិករ ក៏បានសម្រុកធ្វើស្រូវប្រាំងលើសផែនការ»។

សម្ដេចធិបតី បន្ដថា ពិតណាស់នេះ គឺជាកិច្ចការងារល្អ ប៉ុន្ដែមិនត្រូវមើលចំពោះមុខនោះទេ ដូច្នេះនាពេលកន្លងទៅ មានគេសួរថា «ហេតុអ្វីខេត្តខ្លះ ដាក់ចេញណែនាំមិនឱ្យប្រជាជនធ្វើស្រូវប្រាំងជុំទីពីរ»។ ទឹកនៅក្នុងអាង គឺប្រើប្រាស់ទាំងស្រូវ ទាំងសម្រាប់ប្រជាជនប្រើប្រាស់។ ដូច្នេះ ការធានាទឹកនេះ ត្រូវគិតក្នុងនៅផែនការជាក់ស្ដែង ហើយ សម្ដេច ក៏បានថ្លែងអំណរគុណចំពោះអាជ្ញាធរខេត្ត បានចេញសង្គ្រោះជូនប្រជាជនដែលខ្វះទឹកធ្វើស្រូវប្រាំង ។

សម្ដេចធិបតី ថ្លែងថា ថ្មីៗនេះ ក្រសួងធនធានទឹក ក្រសួងកសិកម្ម ព្រមទាំងរដ្ឋបាលខេត្តចំនួន១០ ក៏បានតាមដានវាយតម្លៃផលប៉ះពាល់ ដោយសារបញ្ហាខ្វះទឹកស្រោចស្រព និងសង្គ្រោះដំណាំស្រូវលើផ្ទៃដីទំហំជាង ២ម៉ឺនហិចតា ជូនប្រជាពលរដ្ឋ។