អាជ្ញាធរក្រុងព្រះសីហនុ ចុះអន្តរាគមន៍ និងណែនាំដល់អាជីវករលក់ដូរតាមឆ្នេរមួយចំនួនដែលកាងដីឆ្នេរ បង្កផលប៉ះពាល់ដល់ភ្ញៀវទេសចរ

ភ្នំពេញ៖ នៅព្រឹកថ្ងៃទី២១ ខែមករា ឆ្នាំ២០២៤ គណៈបញ្ជាការឯកភាពរដ្ឋបាលក្រុងព្រះសីហនុ បានចុះអន្តរាគមន៍ និងណែនាំដល់អាជីវករខ្មែរដែលលក់ដូរតាមបណ្តោយឆ្នេរនានានៅក្នុងក្រុងព្រះសីហនុ មិនត្រូវកាងដីចំណីឆ្នេរ ឬដីឆ្នេរធ្វើជាកម្មសិទ្ធិរបស់ខ្លួនសម្រាប់លក់ដូរផ្តាច់មុខតាឯងនោះឡើយ ព្រោះវាបានបង្កផលប៉ះពាល់ដល់ភ្ញៀវទេសចរមកអង្គុយលេងកម្សាន្ត និងបាត់បង់សោភ័ណ្ឌភាពសម្រស់ឆ្នេរផងដែរ។

បន្ទាប់ពីការចុះអប់រំណែនាំលើការថែទាំអនាម័យសាធារណៈ និងការហាមឃាត់មិនឱ្យយកទីតាំងសាធារណៈធ្វើជាកម្មសិទ្ធិហើយនោះអាជ្ញាធរក្រុងក៏បានជំរុញបន្ថែមដល់បងប្អូនអាជីវករទាំងអស់ត្រូវរក្សាអនាម័យឱ្យបានខ្ជាប់ខ្ជួន ដោយមិនត្រូវបោះចោលសំរាមពាសវាលពាសកាល និងត្រូវសម្អាតជានិច្ចក្រោយភ្ញៀវទេសចរទទួលទានចំណីអាហាររួចហើយសល់សំណល់អាហារ ត្រូវតែសម្អាតភ្លាមៗតែម្ដង។ ទន្ទឹមនឹងនោះ មិនត្រូវឱ្យមានរូបភាពលួចបង់ថ្លៃសេវាណាមួយនៅលើឆ្នេរសាធារណៈដល់សមត្ថកិច្ច ឬអាជ្ញាធរខិលខូចណាម្នាក់ ដើម្បីជាថ្នូរនឹងការដាក់តុ កៅអី លក់ដូរផ្តាច់មុខ ឬធ្វើសកម្មភាពដេញភ្ញៀវទេសចរនោះឡើយ។ ប្រសិនបើមានករណីខាងលើ សូមផ្តល់ព័ត៌មានមកលេខទូរសព្ទ «០៩៦ ៧២៣ ៦៦ ០០» ដើម្បីឱ្យអាជ្ញាធរក្រុងចុះអន្តរាគមន៍បានទាន់ពេលវេលា។

សូមបញ្ជាក់ផងដែរថា អាជ្ញាធរក្រុងព្រះសីហនុបច្ចុប្បន្ន បានពង្រឹងលើការរៀបចំសេវាសាធារណៈតាមបណ្តោយឆ្នេររបស់រដ្ឋនៅទូទាំងក្រុងឱ្យមានសោភ័ណ្ឌភាព តាមលក្ខណស្ដង់ដារជាតិ ដើម្បីជួយសម្រួលដល់ភ្ញៀវទេសចរជាតិ-អន្តរជាតិ ដែលបានមកកម្សាន្តនៅក្រុងព្រះសីហនុ មានឆ្នេរសម្រាកលម្ហែកាយ ងូតទឹកសមុទ្ទលេងកម្សាន្ត ដោយគ្មានអ្នកកាងដីចំណីឆ្នេរ ឬយកដីឆ្នេរលក់ដូរស្រេចតែចិត្តដូចពេលមុនៗនោះឡើយ។ ការរៀបចំសណ្តាប់ធ្នាប់បានល្អបែបនេះ បានធ្វើឱ្យខេត្តព្រះសីហនុមានកំណើនទេសចរជាតិ និងអន្តរជាតិឡើងវិញនៅអំឡុងពិធីបុណ្យជាតិកន្លងទៅថ្មីៗនេះ។អំឡុងថ្ងៃឆ្លងឆ្នាំសកល៣ថ្ងៃថា  រយៈពេលបីថ្ងៃនៃពិធីបុណ្យឆ្លងឆ្នាំសកលគិតចាប់ពីថ្ងៃទី៣០ ខែធ្នូ ឆ្នាំ២០២៣ ដល់ថ្ងៃទី០១ ខែមករា ឆ្នាំ២០២៤ ខេត្តព្រះសីហនុស្រូបទាញបានអ្នកទេសចរជាតិ និងអន្តរជាតិទៅសម្រាកលេងកម្សាន្តសរុប ៤៧២,៦៩៧នាក់ កើនឡើង ២១,២៤ភាគរយ។ ហើយក្នុងចំណោមភ្ញៀវជិត៥០ម៉ឺននាក់នោះ មានភ្ញៀវជាតិ ៤៦៤,១០០នាក់ កើនឡើង ២១,៥ភាគរយ ខណៈដែលភ្ញៀវអន្តរជាតិមានការថយចុះ ១,៩៦ភាគរយ បើធៀបរយៈពេលដូចគ្នាឆ្នាំ២០២២ ៕