តំបន់ប្រតិបត្តិការសឹករងកណ្តាល រៀបចំប្រកួតកីឡាប៉េតង់ អបអរសាទរខួបអនុស្សាវរីយ៍លើកទី៤៥ នៃទិវាជ័យជម្នះ ៧មករា
ភ្នំពេញ៖ នៅថ្ងៃទី៩ ខែមករា ឆ្នាំ២០២៤ នៅទីបញ្ជាការតំបន់ប្រតិបត្តិការសឹករងកណ្តាល បានរៀបចំពិធីប្រកួតកីឡាប៉េតង់ ដើម្បីអបអរសាទរខួបអនុស្សាវរីយ៍លើកទី៤៥ នៃទិវាជ័យជម្នះ ៧មករា(៧.១.១៩៧៩-៧.១.២០២៤) ស្ថិតក្រោមអធិបតីភាព ឯកឧត្តម ឧត្តមសេនីយ៍ត្រី នៃ និយម មេបញ្ជាការតំបន់ប្រតិបត្តិការសឹករងកណ្តាល។
មានប្រសាសន៍នៅក្នុងឱកាសនេះ ឯកឧត្តម មេបញ្ជាការបានលើកឡើងអំពីគុណតម្លៃ នៃទិវាជ័យជម្នះ ៧មករា ដែលជាស្នាដៃនៃការតស៊ូ លះបង់សាច់ស្រស់ ឈាមស្រស់ និងការលះបង់អាយុជីវិត របស់ឥស្សរជន ពិសេសថ្នាក់ដឹកនាំគណបក្សប្រជាជនកម្ពុជា ដើម្បីរំដោះជាតិ និងប្រជាជនចេញពីគុគឥតជញ្ជាំង ៣ឆ្នាំ ៨ខែ និង២០ថ្ងៃ ចេញពីរបបសាហាវឃោរឃៅ យង់ឃ្នង ប្រល័យពូជសាសន៍ឯង ធ្វើឱ្យប្រជាពលរដ្ឋរស់រៀនមានជីវិត មានសិទ្ធិសេរីភាព ប្រទេសជាតិទទួលបាននូវសុខសន្តិភាព មានការអភិវឌ្ឍរីកចម្រើនជាបន្តបន្ទាប់។
ឧត្តមសេនីយ៍ត្រី នៃ និយម បានគូសបញ្ជាក់បន្តថា ចាប់តាំងពី រាជរដ្ឋាភិបាលថ្មី នីតិកាលទី៧ នៃរដ្ឋសភាបានបង្កើតឡើង នៅខែសីហា ឆ្នាំ២០២៣ ក្រោមការដឹកនាំដ៏ត្រឹមត្រូវ ម៉ឺងម៉ាត់ ឈ្លាសវៃ ប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជណាចក្រកម្ពុជា សម្តេចបានដាក់ចេញនូវ ផែនការ យុទ្ធសាស្ត្របញ្ចកោណ-ដំណាក់កាលទី១ ក្នុងនោះរាជរដ្ឋាភិបាល បានកំណត់យកអាទិភាពគន្លឹះទាំង៥ គោលដៅយុទ្ធសាស្រ្តទាំង៥ និងបញ្ហាប្រឈមទាំង៦ ដើម្បីអនុវត្តន៍ប្រកបដោយប្រសិទ្ធភាព។
នៅក្នុងឱកាសនេះផងដែរ ឧត្តមសេនីយ៍ត្រី នៃ និយម បានក្រើនរំលឹកដល់កងកម្លាំងទាំងអស់ ត្រូវប្ដេជ្ញាចិត្តដាច់ខាតការពារឲ្យបាន សុខសន្តិភាព ដែលយើងកំពុងមានដូចសព្វថ្ងៃនេះ ឲ្យនៅគង់វង្សជារៀងរហូត និងប្រកាសគាំទ្រយ៉ាងពេញទំហឹងនូវយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអាណត្តិទី ៧ ក្រោមការដឹកនាំប្រកបដោយគតិបណ្ឌិតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាឲ្យទទួលបានជោគជ័យ ។
គួរបញ្ជាក់ថា ការប្រគួតកីឡាប៉េតង់ នៅក្នុងអង្គភាពមានការចូលរួមប្រគួតចែកចេញជា១៦ក្រុម ឆ្លងកាត់តាមរយះការប្រគួតជម្រុះចុងក្រោ ក្រុមទទួលបានជ័យជំនៈចំណាត់ថ្មាក់លេខ១ទទួលបាន ថវិកា ៣០ ម៉ឺនរៀល លេខ២ ថវិកា ២០ ម៉ឺនរៀល និងលេខ ទទួលបានថវិកា ១០ម៉ឺនរៀល៕
