ភ្នំពេញ៖ នៅថ្ងៃទី០១ ខែមករា ឆ្នាំ២០២៤ វេលាម៉ោង០៥ និង៤០នាទី នៅត្រង់ចំណុចក្រុមទី០៩ ភូមិបឹងរាំង សង្កាត់អូរម៉ាល់ ក្រុងបាត់ដំបង ខេត្តបាត់ដំបង មានករណីលួច (កាបូបលុយ) មួយកើតឡើង ប្រព្រឹត្តដោយជនសង្ស័យមិនស្គាល់អត្តសញ្ញាណ បានលួចទ្រព្យសម្បត្តិរបស់ជនរងគ្រោះម្នាក់ឈ្មោះ ឈិន ចាន់ដារ៉ា ភេទប្រុស អាយុ ៣៦ឆ្នាំ មានទីលំនៅភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង។
សម្ភារៈបាត់បង់រួមមាន៖
-លុយដុល្លារចំនួន ៧៥០ដុល្លារ (ប្រាំពីររយហាសិបដុល្លារ)
-លុយខ្មែរ ចំនួន ៤,០០០,០០០រៀល (បួនលានរៀល)
-ចិញ្ចៀនប្លាទីន ០១វង់
-ទូរស័ព្ទម៉ាកអាយហ្វូន ១១ប្រូមែក ពណ៌មាស ចំនួន ០១គ្រឿង និងសម្ភារៈផ្សេងៗមួយចំនួន។
ក្រោយពីទទួលបណ្តឹងជនរងគ្រោះ អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង រួមនឹងយោបល់លោកឧត្តមសេនីយ៍ត្រី លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងមានការសម្របសម្រួលនីតិវិធីពីឯកឧត្តម កែវ សុជាតិ ព្រះរាជអាជ្ញាអមសាលាដំបូងខេត្តបាត់ដំបង កម្លាំងផ្នែកជំនាញព្រហ្មទណ្ឌ នៃអធិការដ្ឋាននគរបាលក្រុងបាត់ដំបង ដឹកនាំដោយលោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង បានចុះធ្វើការស៊ើបអង្កេតស្រាវជ្រាវកំណត់អត្តសញ្ញាណឈានដល់ការនាំខ្លួនជនសង្ស័យម្នាក់ឈ្មោះ ឆាង ផារុណ ភេទប្រុស អាយុ ៣៣ឆ្នាំ មានទីលំនៅភូមិកាប់គោថ្មី សង្កាត់អូរចារ ក្រុងបាត់ដំបង ខេត្តបាត់ដំបង មកកាន់អធិការដ្ឋាននគរបាលក្រុងបាត់ដំបងដើម្បីធ្វើការសាកសួរ។ ក្រោយពីបានសាកសួរជនសង្ស័យ បានឆ្លើយសារភាពថាខ្លួនបានធ្វើសកម្មភាពលួចទ្រព្យសម្បត្តិ របស់ជនរងគ្រោះពិតប្រាកដមែន។
សម្ភារៈដកហូតបានរួមមាន៖
-លុយដុល្លារ ចំនួន ៦៥០ដុល្លារ (ប្រាំមួយរយហាសិបដុល្លារ)
-លុយខ្មែរ ចំនួន ១,៧៥០,០០០រៀល (មួយលានប្រាំពីរសែនប្រាំម៉ឺនរៀល)
-ចិញ្ចៀនប្លាទីន ០១វង់
-ទូរស័ព្ទម៉ាក អាយហ្វូន ១១ប្រូមែក ពណ៌មាស ចំនួន០១គ្រឿង
-កាតគ្រីម៉ូតូ ០១សន្លឹក
-កាតចាក់វ៉ាសាំង ០១សន្លឹក
-ប័ណ្ណបើកបរ ០១សន្លឹក
-អត្តសញ្ញាណប័ណ្ណ ០១សន្លឹក។
បច្ចុប្បន្នជនសង្ស័យខាងលើ ត្រូវបានកម្លាំងនគរបាលក្រុងបាត់ដំបង កសាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធី ៕
