សមិទ្ធផល ២ធំៗ ក្នុងឆ្នាំ២០២៣នេះ ដែលជាគោលនយោបាយរបស់រាជរដ្ឋាភិបាល ក៏ជាតម្រូវការយ៉ាងចាំបាច់របស់ប្រជាពលរដ្ឋ
ភ្នំពេញ៖ សមិទ្ធផល ២ធំៗ រួមមាន៖ កម្មវិធីផ្ដល់ប្រាក់ឧបត្ថម្ភរបស់រាជរដ្ឋាភិបាលសម្រាប់សមាជិក ប.ស.ស. ជាស្រ្ដីមានផ្ទៃពោះ និងកុមារអាយុក្រោម ២ឆ្នាំ និងការដាក់ឱ្យអនុវត្តជាផ្លូវការនូវរបបសន្ដិសុខសង្គមផ្នែកថែទាំសុខភាពតាមរបបភាគទានដោយស័្មគ្រចិត្ត ដែលរាជរដ្ឋាភិបាល សម្រេចដាក់ឱ្យដំណើរការក្នុងឆ្នាំ២០២៣នេះ ជាអត្ថប្រយោជន៍ដ៏ល្អវិសេសវិសាលផ្ដល់ជូនបងប្អូនប្រជាពលរដ្ឋ ជាគោលនយោបាយអាទិភាពរបស់រាជរដ្ឋាភិបាល នីតិកាលទី៧ បង្ហាញពីការគិតគូរយ៉ាងច្បាស់អំពីសុខុមាលភាព និងជីវភាពរស់នៅរបស់បងប្អូនប្រជាពលរដ្ឋ។
ថ្លែងបែបនេះ ក្នុងឱកាសដែលឯកឧត្តម ម៉េង ហុង អគ្គនាយក ប.ស.ស. ស្ដីទី នៃក្រសួងការងារ និងបណ្ដុះបណ្ដាលវិជ្ជាជីវៈ អញ្ជើញដឹកនាំកិច្ចប្រជុំផ្ទៃក្នុង ប.ស.ស. នាព្រឹកថ្ងៃទី១៨ ខែធ្នូ ឆ្នាំ២០២៣ នេះ នៅសាលប្រជុំសន្ដិភាព ស្នាក់ការកណ្ដាល ប.ស.ស. រាជធានីភ្នំពេញ ដោយមានការអញ្ជើញចូលរួមដោយផ្ទាល់ពីថ្នាក់ដឹកនាំ ប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ និងប្រធានសាខាខេត្ត-ខណ្ឌ តាមរយៈប្រព័ន្ធ ZOOM MEETING សរុបប្រមាណជាង ១០០នាក់ ។
ជាមួយគ្នានេះ ឯកឧត្តមអគ្គនាយក ប.ស.ស. ស្ដីទី ក៏បានលើកឡើងផងដែរថា៖ តាមរយៈយុទ្ធនាការចុះផ្សព្វផ្សាយ ៣០ថ្ងៃ ដល់បុគ្គលស្វ័យនិយោជន៍ អ្នកក្នុងបន្ទុកសមាជិក ប.ស.ស. និងការអនុវត្តគោលនយោបាយអាទិភាពទាំងពីរខាងលើនេះ ថ្នាក់ដឹកនាំក្រសួងការងារ និងបណ្ដុះបណ្ដាលវិជ្ជាជីវៈ ក៏បានថ្លែងការកោតសរសើរយ៉ាងខ្លាំងចំពោះ ប.ស.ស. ប៉ុន្ដែក្នុងនាមជាអង្គភាពប្រតិបត្តិករលើប្រព័ន្ធសន្ដិសុខសង្គម ដូចនេះថ្នាក់ដឹកនាំ បុគ្គលិកទាំងអស់ ត្រូវរួមដៃគ្នាបន្ដខិតខំប្រឹងប្រែងអនុវត្តគោលនយោបាយអាទិភាពចម្បងរបស់រាជរដ្ឋាភិបាល ឱ្យបានកាន់តែល្អប្រសើរបន្ថែម ដើម្បីរក្សាការគាំពារសុខភាព និងអត្ថប្រយោជន៍ដល់ប្រជាពលរដ្ឋគ្រប់ៗគ្នា។
ឯកឧត្តមអគ្គនាយក ប.ស.ស. ស្ដីទី បានបន្ថែមថា៖ ការរក្សាឱ្យបាននូវជំហរការពារផលប្រយោជន៍បងប្អូនកម្មករនិយោជិត តម្រូវឱ្យគ្រប់អង្គភាពពាក់ព័ន្ធនៃ ប.ស.ស. ជាពិសេសអង្គភាពជួរមុខទាំងអស់ ត្រូវបន្ដតាមដានឱ្យបានច្បាស់លាស់ នូវរាល់បញ្ហាមិនប្រក្រតីដែលកើតមានឡើងនៅតាមសហគ្រាស គ្រឹះស្ថាន មន្ទីរពេទ្យដែលជាដៃគូ ប.ស.ស. និងត្រូវរកដំណោះស្រាយឱ្យបានទាន់ពេលវេលា សមស្របទៅតាមវិជ្ជាជីវៈរៀងៗខ្លួន ប្រកបដោយភាពទន់ភ្លន់ម៉ឺងម៉ាត់ និងមានទំនួលខុសត្រូវខ្ពស់។
ជាពិសេសសម្រាប់ឆ្នាំ២០២៤ ខាងមុខនេះ អង្គភាពជួរមុខនៃ ប.ស.ស. ត្រូវសហការគ្នាស្រាវជ្រាវជាបន្ទាន់ចំពោះសហគ្រាសដែលមានប្រើកម្មករនិយោជិតហើយមិនចុះបញ្ជីជាមួយ ប.ស.ស. ពិសេសសហគ្រាស គ្រឹះស្ថានដែលមិនអនុវត្តកាតព្វកិច្ចរបស់ខ្លួន ត្រូវចុះអង្កេត ពិនិត្យព័ត៌មានឱ្យបានគ្រប់ជ្រុងជ្រោយ ច្បាស់លាស់ ដើម្បីរៀបចំនីតិវិធីអនុវត្តទៅតាមច្បាប់ដែលបានកំណត់ ដើម្បីរក្សានូវអត្ថប្រយោជន៍របស់បងប្អូនកម្មករនិយោជិតយើង៕
