សម្តេច ហេង សំរិន៖ គណបក្សប្រជាជនកម្ពុជាប្រកាន់ខ្ជាប់នូវទស្សនៈសត្យានុម័ត និងគ្រប់ជ្រុងជ្រោយ

ភ្នំពេញ៖ សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា បានថ្លែងថា គណបក្សប្រជាជនកម្ពុជា មានភាពជាម្ចាស់ការលើកិច្ចការងារជាយុទ្ធសាស្រ្តរបស់ខ្លួនជានិច្ច ហើយមួយវិញ ទៀតគណបក្សប្រជាជនកម្ពុជា ប្រកាន់ខ្ជាប់នូវទស្សនៈសត្យានុម័ត គ្រប់ជ្រុងជ្រោយ និងទស្សនៈអភិវឌ្ឍជានិច្ចផងដែរ។

ក្នុងពិធីបើកមហាសន្និបាតវិសាមញ្ញតំណាងទូទាំងប្រទេស របស់គណបក្សប្រជាជនកម្ពុជា នៅវិមាន៧មករា នាព្រឹកថ្ងៃទី៩ ខែធ្នូ ឆ្នាំ២០២៣នេះ សម្តេចអគ្គមហាពញាចក្រី ហេង សំរិន បានលើកឡើងថា «គណបក្សប្រជាជនកម្ពុជាពុំដែលធ្វេសប្រហែស ឬក៏បាត់ម្ចាស់ការលើកិច្ចការងារជាយុទ្ធសាស្រ្តរបស់ខ្លួននោះឡើយ។ រាល់ការវិភាគពិចារណារបស់គណបក្សប្រជាជនកម្ពុជា តែងតែប្រកាន់ខ្ជាប់នូវទស្សនៈសត្យានុម័ត ដែលគ្របដណ្តប់លើទស្សនៈគ្រប់ជ្រុងជ្រោយ ទស្សនៈប្រវត្តិសាស្រ្តជាក់ស្តែងនិងទស្សនៈអភិវឌ្ឍជានិច្ច។ យ៉ាងណាមិញការត្រៀមលក្ខណៈសម្រាប់ការបន្តវេនគឺជារឿងចាំបាច់ ហើយពេលវេលាដែលត្រូវប្តូរជំនួសគ្នានៅ ពេលណានោះ ក៏ត្រូវបានពិនិត្យពិច័យយ៉ាងល្អិតល្អន់ផងដែរ ដើម្បីរក្សាបាននូវសន្តិភាព ស្ថេរភាព សន្តិសុខ និងការអភិវឌ្ឍបន្តទៀត»។

សម្តេចអគ្គមហាពញាចក្រី ក៏បានលើកឡើងផងដែរថា គណបក្សប្រជាជនកម្ពុជា តែងតែប្រកាន់ខ្ជាប់ផងដែរ នូវគោលការណ៍មួយចំនួន ដោយក្នុងនោះជាគោលការណ៍ប្រមូលផ្តុំប្រជាធិបតេយ្យ គោលការណ៍សមូហភាពដឹកនាំបុគ្គលទទួលខុសត្រូវ គោលការសាមគ្គីភាពផ្ទៃក្នុង គោលការណ៍ស្វ័យត្រួតពិនិត្យ និងការជួយគ្នាទៅវិញទៅមក គោលការណ៍រក្សាភ្ជាប់ជិតស្និទ្ធរវាងគណបក្ស និងប្រជាជន និងគោលការណ៍គោរពរដ្ឋធម្មនុញ្ញ និងច្បាប់ជាធរមានជាដើម។

សម្តេចប្រធានកិត្តិយស បានបន្ថែមទៀតថា ផ្តើមចេញពីការអនុវត្តនូវគោលការណ៍ខាងលើនេះ ហើយបានធ្វើឲ្យគណបក្សប្រជាជនកម្ពុជាបានរីកធំធាត់ពេញកម្លាំង រឹងមាំទាំងខាងនយោបាយ សតិអារម្មណ៍ និងចាត់តាំង ហើយមានគ្រប់លក្ខណសម្បត្តិអាចដឹកនាំគ្រប់គ្រងប្រទេសយូរអង្វែងតទៅ។

សូមបញ្ជាក់ថាមហាសន្និបាតវិសាមញ្ញនេះមានរយៈពេល២ថ្ងៃ គឺនៅថ្ងៃទី៩-១០ ខែធ្នូ ឆ្នាំ២០២៣ ក្រោមអធិបតិភាព សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា និងសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា។

របៀបវារៈនៃមហាសន្និបាតវិសាមញ្ញនេះ គឺពិនិត្យសេចក្តីព្រាង«របាយការណ៍ស្តីពីសភាពការណ៍ទូទៅ និងការងារគណបក្សឆ្នាំ២០២៣និងទិសដៅ ភារកិច្ចឆ្នាំ២០២៤»។ បោះឆ្នោតជ្រើសរើសតាំងបំពេញបន្ថែមសមាជិកគណៈកម្មាធិការកណ្តាលមួយចំ នួន។ បោះឆ្នោតជ្រើសតាំងបំពេញបន្ថែមសមាជិកគណៈអចិន្ត្រៃយ៍គណៈកម្មាធិការកណ្តាល បោះឆ្នោត ជ្រើសតាំងបន្ថែមអនុប្រធានគណបក្ស ព្រមទាំងបោះឆ្នោតជ្រើសតាំងគណៈកម្មាធិការហិរញ្ញវត្ថុ និងប្រធានគណៈកម្មាធិការហិរញ្ញវត្ថុគណៈកម្មាធិការកណ្តាលថ្មីជាដើម ៕