ប្រធានទីភ្នាក់ងារប្រឆាំងអំពើពុករលួយរបស់ឥណ្ឌូណេស៊ី ជាប់ឈ្មោះជាជនសង្ស័យក្នុងសំណុំរឿងពុករលួយ
ហ្សាការតា៖ ប៉ូលិសឥណ្ឌូណេស៊ីបានដាក់ឈ្មោះប្រធានទីភ្នាក់ងារប្រឆាំងអំពើពុករលួយរបស់ប្រទេសគឺលោក Firli Bahuri ជាជនសង្ស័យក្នុងសំណុំរឿងពុករលួយ ក្នុងភាពអន់ថយមួយទៀតចំពោះកេរ្តិ៍ឈ្មោះរបស់ទីភ្នាក់ងារនេះ។
Firli គឺជាជនសង្ស័យក្នុងការជំរិតទារប្រាក់ពី Syahrul Yasin Limpo អតីតរដ្ឋមន្ត្រីក្រសួងកសិកម្ម ដែលត្រូវបានចាប់ខ្លួនកាលពីខែមុន បន្ទាប់ពីត្រូវបានចោទប្រកាន់ពីបទដាក់ហោប៉ៅថវិកាសាធារណៈជាង ៨០០.០០០ ដុល្លារអាមេរិក។
លោក Ade Safri Simanjuntak មន្ត្រីប៉ូលិសទីក្រុងហ្សាកាតា បានប្រាប់អ្នកសារព័ត៌មានកាលពីយប់ថ្ងៃពុធ ទី២២ ខែវិច្ឆិកា ថា មាន ភស្តុតាងគ្រប់គ្រាន់ដើម្បីដាក់ឈ្មោះ ប្រធាន KPK ជាជនសង្ស័យក្នុងសំណុំរឿងពុករលួយក្នុងទម្រង់នៃការជំរិតទារប្រាក់។
លោកថា មន្ត្រីរដ្ឋបានជំរិតប្រាក់នៅក្រសួងកសិកម្មពីឆ្នាំ ២០២០ ដល់ឆ្នាំ ២០២៣។ លោក Ade បានបន្ថែមថា អាជ្ញាធរបានរឹបអូសឯកសារប្រតិបត្តិការប្តូរប្រាក់ពីប្រទេសសិង្ហបុរី និងប្រាក់ដុល្លារអាមេរិកដែលមានតម្លៃ ៧.៤ ពាន់លានរូពី (៤៧៧.៧៣០ ដុល្លារអាមេរិក) ពីការវាយឆ្មក់នៅទីតាំងពីរ។
ប្រភព៖ CNA
ប្រែសម្រួលដោយ៖ ហៃ ឆៃមុីនាង
