នាយករដ្ឋមន្ត្រី ជំរុញឲ្យក្រសួងការងារផ្សព្វផ្សាយឲ្យទូលំទូលាយ កម្មវិធីបណ្តុះបណ្តាលជំនាញវិជ្ជាជីវៈ ដើម្បីឲ្យពលរដ្ឋមានការយល់ដឹង ជៀសវាងការច្រឡំភាន់ណាមួយ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានជំរុញឱ្យក្រសួងការងារផ្សព្វផ្សាយឱ្យបានច្បាស់លាស់ និងចំគោលដៅកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងគ្រោះ ឱ្យបានទូលំទូលាយទៅដល់ប្រជាពលរដ្ឋ ដើម្បីពន្យល់ដល់ពលរដ្ឋឱ្យបានយល់ច្បាស់ ជៀសវាងការច្រឡំភាន់ណាមួយ។
ក្នុងឱកាសអញ្ជើញប្រកាសឱ្យអនុវត្តជាផ្លូវការ «កម្មវិធីរបបសន្តិសុខសង្គម ផ្នែកថែទាំសុខភាពតាមរបបភាគទានដោយស្ម័គ្រចិត្ត» និង «កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងងាយរងហានិភ័យ» នៅថ្ងៃទី១៤ ខែវិច្ឆិកា ឆ្នាំ ២០២៣ សម្តេចធិបតី ហ៊ុន ម៉ាណែត បញ្ជាក់ថា កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងគ្រោះប្រមាណ ១,៥ លាននាក់ គឺជារឿងសំខាន់ដែលក្រសួងការងារត្រូវយកចិត្តទុកដាក់ផ្សព្វផ្សាយបានច្បាស់លាស់និងចំគោលដៅទៅដល់ប្រជាពលរដ្ឋ ដើម្បីពន្យល់ឱ្យពួកគាត់បានយល់ច្បាស់ ជៀសវាងការភ័ន្តច្រឡំណាមួយ។
សម្តេចធិបតី បានប្រៀបធៀបការផ្សព្វផ្សាយរបស់ក្រសួងការងារទៅនឹងការធ្វើទីផ្សារ (Marketing) របស់ក្រុមហ៊ុនឯកជនដូច្នោះដែរ ដើម្បីឲ្យការផ្សព្វផ្សាយទទួលបានប្រសិទ្ធភាព និងដើម្បីឱ្យប្រជាពលរដ្ឋកម្ពុជាទូទៅបានដឹងពីសារៈសំខាន់ និងសារៈប្រយោជន៍ពីកម្មវិធីបណ្តុះបណ្តាលជំនាញវិជ្ជាជីវៈនេះ ពោលគឺបើគ្មានការផ្សព្វផ្សាយឲ្យបានទូលំទូលាយទេ គឺមិនអាចទទួលបានលទ្ធផលល្អឡើយ ៕